Bene Lefi 22 - Baibo Busansulushi Bwa Libuku Ili

Milambu mboyeelete kunoosalalite

¹ Mpeeke Mwaami Lesa wakaambila Mose ayi,

² “Lwiita Aloni abana bakwe basankwa ayi, ‘Tamweelete kusebaanya liina lyangu lisalalite, paceebo ceeci mulyeelete kuba abulemu kumilambu isalalite iyo bene Isilaeli njebabenga kuli ndime. Nebo ndime Mwaami Lesa.

³ Ono pabantu bamulunyungu lwako na umwi uli woonse akese pafwaafwi amilambu isalalite iyo bene Isilaeli njebabenga kuli ndime paciindi nceshi atakanoosalalite kweelana aMilawo, muntu uyo inga taasebenseli lyobilo kucipaililo. Ici cilyeelete kunoocitika lyoonsebo mumashalane anu oonse acisa. Nebo ndime Mwaami Lesa.

⁴ “ ‘Taaku wamulunyungu lwakwe Aloni uyo ucite manata nabi utooswa mashina kubusankwa, weelete kulya milambu isalalite kushikila akasalale kweelana aMilawo. Mupailishi woonse teshi akanoosalalite kweelana aMilawo na wakumya cintu cili coonse citasalalite ceebo cakakumya kumutuntu alimwi na waliwaalila,

⁵ wakumya munyama, nabi muntu utasalalite kweelana aMilawo.

⁶ Anu mupailishi woonse weenga wabula kunoosalalite kweelana aMilawo, teshi akanoosalalite kushikila macolesha. Nakubi boobo, teelete kulya mulambu uli woonse usalalite kushikila wasamba pamubili.

⁷ Ono na lisuba lyepila, ulasalala kweelana aMilawo, lyalo inga walya amilambu isalalite ceebo nshakulya shakwe.

⁸ Teelete kulya nyama ya munyama wakalifwita nabi wakacaikwa kubanyama bamuluundu mukwiinga inga yamulengesha kutanoosalalite. Nebo ndime Mwaami Lesa.

⁹ “ ‘Bapailishi boonse balyeelete kukonkela milawo yangu. Ono na baalilwa kwiikonkela, balaakuba amulandu akufwa ceebo cakukaka kukonkela milawo iyo isalalite. Nebo ndime Mwaami Lesa ubasalasha.

¹⁰ “ ‘Eenkabo wa mulifumo lya bapailishi ngoweelete kulya milambu isalalite ili yoonse. Taaku aumwi weelete kwiilya, nabibo mweensu wa mupailishi nabi musebenshi wakwe.

¹¹ Sombi basha ba mupailishi abo mbwaakoola amaali akwe, nabi baabo bakashalilwa muŋanda yakwe, mbobeelete kulyaako kushakulya shitambula mupailishi.

¹² Alakwe mwaana mwanakashi wa mupailishi uyo weebetwe kumusankwa uteshi mupailishi, teelete kulya mulambu uli woonse usalalite.

¹³ Sombi na mwanaakwe mwanakashi waba mukalubinje nabi walekwa kaatacite baana, alimwi waboola mukwikala muŋanda ya baishi ayi banoomucafwa, ngoweelete kulya shakulya sha bupailishi isho baishi nshebatambula. Anu eenkabo wa mulifumo lya bapailishi ngoweelete kulya shakulya isho.

¹⁴ “ ‘Na muntu umwi uteshi wa mulifumo lya bapailishi walya cakulya ca milambu isalalite cakuteshiba, ulyeelete kulipila maali eenga akumana shakulya isho kumupailishi, akwiilikaawo comwi ca shosanwe ca mweelo wa nshisho.

¹⁵ Bapailishi tabeelete kulengesha ayi milambu isalalite ibule kunoosalalite

¹⁶ kwiinda mukusuminisha muntu uli woonse uteelete kulya ayi alyeeko. Camushobo wooyo inga caleta mulandu weelete kulipilwa pamuntu uyo. Nebo ndime Mwaami Lesa uyo usalasha milambu iyo.’ ”

¹⁷ Kuswawaawo Mwaami Lesa wakaambila Mose ayi,

¹⁸ “Lwiita Aloni abana bakwe basankwa alimwi abene Isilaeli boonse ayi na mwine Isilaeli uli woonse nabi muswamashi ukala muIsilaeli wabenga mulambu wakutenta, mukucita kweelana ambwaakashomesha cakulumbila, nabi mulambu wakulyaaba,

¹⁹ munyama uyo teelete kuba akampenda nabi komwi ayi mulambu utambulwe. Mulyeelete kubenga munyama musankwa kuswa mulitanga lya ŋombe, mbelele nabi mpongo.

²⁰ Ono na wabenga munyama uli woonse ucite kampenda, Mwaami Lesa teshi akamutambule.

²¹ Na umwi wabenga mulambu wa bwanabwankashi kuli ndime neMwaami Lesa, nacibi kwaamba ayi mukucita kweelana ambwaakashomesha cakulumbila, nabi mulambu wakulyaaba, munyama teelete kuba akampenda nakaceyi kwaamba ayi utambulwe.

²² Tamweelete kubenga kuli ndime neMwaami Lesa munyama uli woonse moofu, mulema myeendo, ucite cilondabo, nabi cilonda citooshi, bulwashi bwa pacikanda nabi shipele. Kuteelesha kubenga munyama wa mushobo wooyo pacipaililo ayi ngumulambu wa cakulya.

²³ Ono mbuli mulambu wakulyaaba, inga wabenga munyama utintilite nabi utabete kabotu mubili. Sombi munyama wa mbuli wooyo taatambulwi na ngumulambu utoopekwa mukucita kweelana ambwaakashomesha cakulumbila.

²⁴ Tamweelete kubenga kuli ndime neMwaami Lesa munyama uli woonse ucite macende akapwaikwa, akatimbulwa, akafwalulwa, nabi akakwamunwa. Ici tacisuminishikwi mucishi canu.

²⁵ “Tamweelete kubenga munyama wakaswa kumuswamashi ayi ngumulambu wa cakulya. Banyama ba mushobo wooyo balalangwa ayi mbakampenda, aboobo tabatambulwi.”

²⁶ Mpeeke Mwaami Lesa wakaambila Mose ayi,

²⁷ “Na moombe, mwanaambelele nabi mwanaampongo washalwa, ulyeelete kunooli anyina kwanshiku shosanwe ashobilo. Sombi kuswa pabushiku bwasanu ashotatwe, ulatambulwa ayi ngumulambu wa cakulya.

²⁸ Kuteelesha kubenga mpwishi amoombe wa njiyo, mbelele amwanaanjiyo nabi mpongo amwanaanjiyo pabushiku bomwi.

²⁹ Ono na mwabenga mulambu wakulumba kuli ndime neMwaami Lesa, kamukonkela milawo kwaamba ayi mukatambulwe.

³⁰ Mulyeelete kulya nyama yoonse pabushiku mbomunya ubo, cakutashiyaawo nabi iniini pabushiku buboolaawo. Nebo ndime Mwaami Lesa.

³¹ “Kamukonkela milawo yangu. Nebo ndime Mwaami Lesa.

³² Tamweelete kunsebaanya liina lyangu lisalalite. Bene Isilaeli boonse balyeelete kunshiba ayi ndisalalite. Nebo ndime Mwaami Lesa umusalasha,

³³ alimwi ndakamukusha mucishi ca Ijipiti ayi mbe Lesa wanu. Nebo ndime Mwaami Lesa.”