Bene Lefi 18 - Baibo Busansulushi Bwa Libuku Ili

Kukumana kutasuminishikwi kweelana aMilawo

¹ Mpeeke Mwaami Lesa wakaambila Mose ayi,

² “Lwiita bene Isilaeli ayi nebo ndime Mwaami Lesa wanu.

³ Tamweelete kukonkela shicita bene Ijipiti uko nkomwakalinga kwikala, nabi shicita bantu ba mucishi ca Kenani umo moontoomutola bulya.

⁴ Mulyeelete kukonkela milawo yangu akucita nshentoomwaambila. Nebo ndime Mwaami Lesa wanu.

⁵ Amukonkele sheesho nshentoomulwiita amilawo njentoomupa. Pakunoocita boobo mulaakupulusha buumi bwanu. Nebo ndime Mwaami Lesa.

⁶ “Utakumani amukwanu mwanakashi uli woonse. Nebo ndime Mwaami Lesa.

⁷ “Utasebaanyi baiso kwiinda mukukumana abanyoko. Mbanyoko, tooelete kukumanaabo.

⁸ “Utasebaanyi baiso kwiinda mukukumana abakaabo bamwi.

⁹ “Utakumani anankashi yako nabi nankashi yako wakucanaamo, wakakulila muŋanda yomwi awebo nabi tau.

¹⁰ “Utakumani amwishikulu wako mwanakashi, mukwiinga nkulisebanya omwiine.

¹¹ “Utakumani anankashi yako umwi uli woonse, nkokwaamba ayi mwanaabo bakwababo baiso, nabi banyoko bamwi ceebo alakwe ngunankashi yako.

¹² “Utakumani abaisonkashi ceebo mbakwababo baiso.

¹³ “Utakumani amwanaabo bakwababo banyoko ceebo ngumukwanu.

¹⁴ “Utakumani abamukashimishaanu ceebo abalo mbanyoko.

¹⁵ “Utakumani amulokashi wako ceebo ngumuka mwanaako. Aboobo utakumani akwe.

¹⁶ “Utakumani amulamu wako mwanakashi ceebo uko nkusebaanya mukwanu.

¹⁷ “Utakumani amwaana wa mwanakashi uyo ngowakakumanaakwe nabi mwishikulu wakwe. Mpashi inga baba bamakwanu, aboobo kukumanaabo, ncimalwamalwa.

¹⁸ “Utabwesi mukwabo mukaako ayi abe mukaako umwi na mukaako uyo kaacili muumi.

¹⁹ “Utakumani amwanakashi na wakubala ceebo taasalalite kweelana aMilawo.

²⁰ “Utakumani amuka mwiine ceebo inga cakulengesha kutanoosalalite kweelana aMilawo.

²¹ “Utabengi mwanaako musankwa uli woonse ayi ngumulambu kuli lesa wiitwa ayi Moleki, ceebo uko nkucobola liina lyangu neLesa. Ndime Mwaami Lesa.

²² “Taaku musankwa weelete kukumana amusankwanyina, ceebo Mwaami Lesa ulipatite micito iyo.

²³ “Taaku musankwa nabi mwanakashi weelete kukumana amunyama. Kucita boobo kulamulengesha kutanoosalalite kweelana aMilawo.

²⁴ “Mutakalilengeshi kutanoosalalite kweelana aMilawo kwiinda mumicito iyi, ceebo bakunsengwe mbobakalilengesha kutanoosalalite kweelana aMilawo ubo, abo mbontootanda mucishi ca Kenani ayi mwebo mukenjileemo.

²⁵ Micito ya mushobo uyo yakalengesha cishi ico citanoosalalite kweelana aMilawo. Paceebo ceeci, nebo neMwaami Lesa ndakacipa mulandu, akucilengesha ayi cikake bantu bakalinga kwikalaamo.

²⁶ Sombi mwebo mulyeelete kukonkela milasho alimwi amilawo yangu. Mwebo noonse, nkokwaamba ayi bene Isilaeli abaswamashi bekala pakati kanu, tamweelete kucita shintu shibiibi isho,

²⁷ mukwiinga bantu bakalinga kwikala mucishi ici bakashicita akucilengesha ayi citanoosalalite kweelana aMilawo.

²⁸ Ono na mucilengeshe kutanoosalalite kweelana aMilawo, amwebo cilaakumukaka bweenka mbocakakaka baabo bakalinga kwikalaamo.

²⁹ Mulyeelete kwishiba ayi uyo woonse weenga wacita shintu shilensha nsoni ishi, teshi anoociyeeyelwa kuba mulikoto lya bantu bangu.

³⁰ “Amukonkele milawo iyo njendamupa, tamweelete kukonkela sheesho shakalinga kucita bantu bakalinga kwikala mucishi ico, alimwi mutakalilengeshi kutanoosalalite kweelana aMilawo kwiinda mukucita cintu ico cibiibi nabi comwi. Nebo ndime Mwaami Lesa wanu.”