Bene Lefi 16 - Baibo Busansulushi Bwa Libuku Ili

Bushiku bwaKusalashikwa kuswa kushibiibi

¹ Mpeeke Mwaami Lesa wakaamba aMose pesule lya lufu lwa bana bakwe Aloni basankwa bobilo, abo bakacaikwa ndibakabenga mulilo utasalalite kuMwaami Lesa.

² Wakaamba ayi, “Lwiita mukwanu Aloni ayi teelete kwiinjila muMusena Usalalite Wiindaawo uli kwisule lya cisani cakushitilisha kulilabo na wayanda, mukwiinga umo moombonekela mulikumbi peculu lya cifwekesho ca Libokoshi lya Cipangano. Na akabule kunyumfwila, ulaakufwa.

³ “Aloni ulyeelete kwiinjila muMusena Usalalite Wiindaawo na wamana kuleta mucende mwaana ayi ngumulambu wakulekelelwa shibiibi alimwi ambelele isankwa ya mulambu wakutenta.

⁴ Kaatana kwiinjila muMusena Usalalite Wiindaawo, ulyeelete kusamba akufwala shakufwala sha bupailishi, nkokwaamba ayi mungaanjo wa cisani citeshimite, kaputula kamukati ka cisani citeshimite, laamba alimwi acisani cakumutwi.

⁵ “Lyalo bene Isilaeli balaakupa Aloni mpongo shobilo shisankwa ayi ngumulambu wakulekelelwa shibiibi ambelele isankwa ayi ngumulambu wakutenta.

⁶ Mpeeke ulaakubenga mucende ayi ngumulambu wakukusha shibiibi shakwe alimwi asha bamuŋanda yakwe.

⁷ Lyalo ulaakutola mpongo shobilo isho akushishisha kunembo lya Mwaami Lesa kumulyango wa Tente ya Cipangano.

⁸ Uko nkomunya ulaakuuma cisolo kwiinda mukusebensesha mabwe obilo, limwi lya Mwaami Lesa, limwi lyakwe Asaselo, shikaswa.

⁹ Kuswawaawo Aloni ulaakubenga mpongo iyo yasalwa kwiinda mukuuma cisolo ayi njaMwaami Lesa, akwiibenga ayi ngumulambu wakulekelelwa shibiibi.

¹⁰ Ayalo mpongo yasalwa kuba yakwe Asaselo ilaakupekwa kuMwaami Lesa keeli yuumi, akwiitola muluyanga kuli Asaselo kwaamba ayi ikushe shibiibi sha bantu.

¹¹ “Na Aloni akabenge mucende ayi ngumulambu wakulekelelwa shibiibi shakwe alimwi asha bamuŋanda yakwe,

¹² ulaakubwesa mupika uswite makalangasha aswa kucipaililo alimwi amapaka obilo atununkila kabotu tupelekete, akushileta muMusena Usalalite Wiindaawo.

¹³ Mweenka umo kunembo lyangu neMwaami Lesa, ulaakubika tununkila kabotu pamulilo, mpeeke bwiishi bwa tununkila kabotu bulaakushisa cifwekesho ca Libokoshi lya Cipangano kwaamba ayi atacibooni akufwa.

¹⁴ Mpeeke ulaakubwesa bulowa bumwi bwa mucende, akasumpemo munwe akusanseela peculu lya cifwekesho alimwi akusanseela bumwi kunembo lya Libokoshi lya Cipangano mankanda osanwe aobilo.

¹⁵ “Kuswawaawo ulaakucaya mpongo ya mulambu wakulekelelwa shibiibi sha bantu, kutola bulowa bwa njiyo muMusena Usalalite Wiindaawo akubusanseela pacifwekesho ca nkumbu alimwi akunembo lya Libokoshi lya Cipangano, bweenka mbwaacita pabulowa bwa mucende.

¹⁶ Munshila iyi, ulaakucita kweelana aMilawo pakusalasha Musena Usalalite Wiindaawo kuswa kukutasalala kwa bene Isilaeli alimwi ashibiibi shabo shoonse. Ulyeelete kucita boobo kuTente ya Cipangano, ceebo iliyakitwe pakati lya misumba iyo itasalalite kweelana aMilawo.

¹⁷ Kuswa paciindi Aloni ncaanjila muMusena Usalalite Wiindaawo ayi akacite kweelana aMilawo pakusalasha kushikila akuciindi ncaaswitaamo, tamweelete kuba nabi womwi muTente ya Cipangano. Na wamanisha kucita kweelana aMilawo pakulisalasha mwiine, bamuŋanda yakwe alimwi abene Isilaeli boonse,

¹⁸ ulyeelete kuswa akuya kucipaililo ca milambu yakutenta mukucisalasha. Ulyeelete kubwesa bulowa bumwi bwa mucende abwa mpongo alimwi akubunanika kumeeca oonse a mumakonko one a cipaililo.

¹⁹ Lyalo ulyeelete kusanseela bulowa bumwi amunwe wakwe mankanda osanwe aobilo pacipaililo. Munshila iyi, ulaakucisalasha kuswa kushibiibi sha bene Isilaeli ayi cinoosalalite.

Mpongo yakukusha shibiibi

²⁰ “Ono na Aloni wamanisha kucita kweelana aMilawo pakusalasha Musena Usalalite Wiindaawo, Tente yoonse ya Cipangano, alimwi acipaililo, mpongo yuumi yasalwa kuba yakwe Asaselo, shikaswa, ulaakwiileta kunembo lyangu neMwaami Lesa.

²¹ Ulaakubika maansaakwe oonse obilo pamutwi wa njiyo akwaamba bubi boonse, shibiibi, alimwi akwaaloka kwa bene Isilaeli koonse pali njiyo. Pakucita boobo ulaakushituntulwita pamutwi wa mpongo iyo. Lyalo palaakusalwa musankwa weshi akeetole muluyanga.

²² Mpongo iyo ilaakutola shibiibi shabo shoonse mumusena umwi mutekaali bantu.

²³ “Kuswawaawo Aloni ulaakwinjila muTente ya Cipangano, akafuule shakufwala sha bupailishi isho nshaalinga kufwete kaatana kwiinjila muMusena Usalalite Wiindaawo, akushishiya mweenka umo.

²⁴ Ulyeelete kusambila mumusena usalalite akufwala shakufwala shinekwe. Na akamanishe, ulaakuswa akuya mukubenga mulambu wakutenta ayi akushe shibiibi shakwe mwiine alimwi awakukusha shibiibi sha bene Isilaeli.

²⁵ Mpeeke ulaakutentela mafuta a munyama wa mulambu wakulekelelwa shibiibi pacipaililo.

²⁶ Musankwa uyo walinga watola mpongo muluyanga kuli Asaselo ulyeelete kucapa shakufwala nsheenga kaafwete alimwi akusamba kaatana kuboola mumisumba.

²⁷ Mucende ampongo shasebenseshekwa kumulambu wakulekelelwa shibiibi, shine bulowa bwaletwa muMusena Usalalite Wiindaawo ayi bukushe shibiibi, shilaakutolwa pansengwe lya misumba akutentwa. Cipaya, nyama alimwi amala shoonse shilaakutentwa.

²⁸ Alakwe uyo weshi akanooshitenta ulyeelete kucapa shakufwala nsheenga kaafwete alimwi akusamba kaatana kuboola kumisumba.

Bushiku bwaKusalashikwa kuswa kushibiibi mbobweelete kulama

²⁹ “Ono milawo njemweelete kunoolama lyoonsebo njeeyi. Pabushiku bwalikumi mumweenshi wasanu ayobilo, bene Isilaeli alimwi abaswamashi bashiite pakati lyabo balyeelete kulikasha kulya, alimwi tabeelete kusebensa mulimo uli woonse.

³⁰ Pabushiku ubo palyeelete kucitwa kweelana aMilawo pakubasalasha kuswa kushibiibi shoonse, kwaamba ayi basalashikwe.

³¹ Anu bushiku ubo bulyeelete kuba busalalite abuumbi ubo mbobeelete kulikasha kulya, alimwi akutasebensa mulimo nauceyi. Milawo iyi ilyeelete kunookonkelwa lyoonsebo.

³² Mupailishi munene uyo wakabikwa pabupailishi kweelana aMilawo alimwi akubengwa kuli ndime neMwaami Lesa ayi akapyane baishi, ulyeelete kucita kweelana aMilawo pakusalasha. Ulaakufwala shakufwala sha bupailishi

³³ alimwi akucita kweelana aMilawo pakusalasha Musena Usalalite Wiindaawo, Tente ya Cipangano yoonse, cipaililo, bapailishi alimwi abene Isilaeli boonse.

³⁴ Milawo iyi ilyeelete kunookonkelwa lyoonsebo. Kucita kweelana aMilawo uku kulyeeleete kunoocitwa linkanda lyomwi pamwaaka kwaamba ayi bene Isilaeli basalashikwe kuswa kushibiibi shabo shoonse.” Aboobo Mose wakacita kweelana abwakamwaambila Mwaami Lesa.