Bene Lefi 15 - Baibo Busansulushi Bwa Libuku Ili

Shintu shiswa mumubili shitasalalite kweelana aMilawo

¹ Mwaami Lesa wakaambila Mose aAloni ayi,

² “Lwiita bene Isilaeli ayi na musankwa uli woonse utooswa mashina kubusankwa, mashina ayo taasalalite kweelana aMilawo.

³ Inga kaaciswa nabi ashinka busankwa bwakwe, muntu uyo taasalalite kweelana aMilawo. Munshila iyi, mashina ayo mbwaamulengesha kutasalala.

⁴ Anu apo pabulo poonse mpweenga woona alimwi apacintu coonse mpeenga wekala tapasalalite kweelana aMilawo.

⁵ Uyo woonse weenga wakumya bulo bwakwe mpaaona, ulyeelete kucapa shakufwala nsheenga kaafwete akusamba. Nakubi boobo teshi akanoosalalite kushikila macolesha.

⁶ Uyo woonse wekala pacintu nceenga musankwa uyo weekalaawo, ulyeelete kucapa shakufwala nsheenga kaafwete akusamba, nakubi boobo teshi akanoosalalite kushikila macolesha.

⁷ Uyo woonse weenga wakumya musankwa uyo utooswa mashina kubusankwa, ulyeelete kucapa shakufwala nsheenga kaafwete akusamba. Nakubi boobo teshi akanoosalalite kushikila macolesha.

⁸ Ono na musankwa utooswa mashina washipila umwi usalalite kweelana aMilawo, uyo washipilwa ulyeelete kucapa shakufwala nsheenga kaafwete akusamba. Nakubi boobo teshi akanoosalalite kushikila macolesha.

⁹ Cuuna cili coonse nceenga weekalaawo musankwa utooswa mashina tacisalalite kweelana aMilawo.

¹⁰ Ono uyo woonse weenga wakumya cintu cili coonse ncaalinga kushiiteewo, teshi akanoosalalite kweelana aMilawo kushikila macolesha. Alakwe uyo woonse weenga wanyamuna cili coonse ncaalinga kushiiteewo, ulyeelete kucapa shakufwala nsheenga kaafwete akusamba. Nakubi boobo teshi akanoosalalite kushikila macolesha.

¹¹ Ono na musankwa uyo utooswa mashina wakumya umwi kaatana kusamba kumaansa, uyo ngwaakumya ulyeelete kucapa shakufwala nsheenga kaafwete akusamba. Nakubi boobo teshi akanoosalalite kushikila macolesha.

¹² Nongo yoonse njeenga wakumya musankwa uyo utooswa mashina ilyeelete kupwaikwa, ambale ya cisamu yoonse njeenga wakumya ilyeelete kusanshikwa.

¹³ “Na musankwa uyo waba kabotu, ulyeelete kulindila peenda nshiku shosanwe ashobilo, lyalo akacape shakufwala nsheshi akanoofwete akusamba mumaanshi abotu a mukantupu. Mpeeke ulaakuba muntu usalalite kweelana aMilawo.

¹⁴ Ingayi pabushiku bwasanu ashotatwe, ulyeelete kutola mpolobe shobilo nabi nkulimba shobilo kumulyango wa Tente ya Cipangano akushipa mupailishi.

¹⁵ Mpeeke mupailishi ulaakubengawo yomwi ayi ngumulambu wakulekelelwa shibiibi, alimwi imwi ayi ngumulambu wakutenta. Munshila iyi, ulaakucita kweelana aMilawo pakusalasha musankwa uyo.

¹⁶ “Na musankwa waliwaalila, ulyeelete kusamba pamubili. Nakubi boobo teshi akanoosalalite kushikila macolesha.

¹⁷ Pacintu ca cisani cili coonse nabi cipaya mpeenga wawaalila cilyeelete kucapwa, nakubi boobo teshi cikanoosalalite kushikila macolesha.

¹⁸ Na musankwa amwanakashi bakumana, boonse bobilo balyeelete kusamba. Nakubi boobo teshi bakanoosalalite kushikila macolesha.

¹⁹ “Ono na mwanakashi wakubala, teshi akanoosalalite kwanshiku shosanwe ashobilo. Uli woonse weenga wamukumya, teshi akanoosalalite kushikila macolesha.

²⁰ Coonse nceenga weekalaawo nabi koonaawo na wakubala, teshi cikanoosalalite kweelana aMilawo.

²¹ Uyo woonse weenga wakumya mpeenga woona ulyeelete kucapa shakufwala nsheenga kaafwete akusamba. Nakubi boobo teshi akanoosalalite kushikila macolesha.

²² Muntu uli woonse weenga wakumya cintu cili coonse nceenga wekalaawo, ulyeelete kucapa shakufwala nsheenga kaafwete akusamba. Nakubi boobo teshi akanoosalalite kushikila macolesha.

²³ Na mpaapo mpaalinga woona nabi cintu cili coonse ncaalinga kushiiteewo umwi muntu ncaakumya, nkokwaamba ayi muntu uyo teshi akanoosalalite kushikila macolesha.

²⁴ Ono na musankwa wakumanaakwe muciindi ca kukubala, musankwa uyo teshi akanoosalalite kwanshiku shili shosanwe ashobilo. Lyalo apaapo poonse mpeenga woona teshi pakanoosalalite kweelana aMilawo.

²⁵ “Alimwi na mwanakashi waswa bulowa kwanshiku shiinji muciindi ncaatakubaliliimo, nabi bwatolelela kuswa kwiinda munshiku isho nshaakubalilaamo, na bulowa kabuciswa teshi akanoosalalite bweenka mbwaatasalalite ciindi ncaakubala.

²⁶ Aboobo apo poonse mpeenga woona alimwi apaapo poonse mpeenga wekala paciindi ici, tapasalalite bweenka mbwaatasalalite ciindi ncaakubala.

²⁷ Uyo woonse weenga washikumya taasalalite alimwi ulyeelete kucapa shakufwala nsheenga kaafwete akusamba. Nakubi boobo teshi akanoosalalite kushikila macolesha.

²⁸ Na bulowa bwacileka kuswa, ulyeelete kulindila peenda nshiku shosanwe ashobilo, kuswawaawo ndyeshi akabe usalalite kweelana aMilawo.

²⁹ Pabushiku bwasanu ashotatwe ulaakutola mpolobe shobilo nabi nkulimba shobilo kumupailishi pamulyango wa Tente ya Cipangano.

³⁰ Mpomunyaawo mupailishi ulaakubengawo yomwi ayi ngumulambu wakulekelelwa shibiibi alimwi imwi ayi ngumulambu wakutenta. Munshila iyi, ulaakucita kweelana aMilawo pakumusalasha.

³¹ “Ulyeelete kutalamusha bene Isilaeli kuswa kushintu shilengesha kutanoosalalite kweelana aMilawo kwaamba ayi batakabishi Tente yangu ya Cipangano iyo ili pakati kabo. Na bakeebishe, balaakumana kufwa.”

³² Iyi njemilawo ya pamusankwa utooswa mashina kubusankwa nabi waliwaalila,

³³ pamwanakashi na wakubala nabi musankwa wakumana amwanakashi utasalalite kweelana aMilawo.