Bene Lefi 13 - Baibo Busansulushi Bwa Libuku Ili

Milawo ikumite kumanata

¹ Mpomunyaawo Mwaami Lesa wakaambila Mose aAloni ayi,

² “Na muntu umwi ulicite cilonda pamubili, cuute nabi kutumbwa bulwashi nsheenga shatola kumanata, ulyeelete kuletwa kuli Aloni nabi kumwanaakwe womwi mupailishi.

³ Mupailishi ulaakubona cilonda ico mbuli mbocitooboneka. Ono na booya buliimo bwatuba alimwi acilonda na cenjila bunene mukati kwiindilila pacikanda, nkokwaamba ayi ngamanata. Lyalo mupailishi ulyeelete kumwaamba ayi taasalalite kweelana aMilawo.

⁴ Sombi na cilonda ncituba alimwi tacina kwinjila bunene mukati kwiindilila cikanda, abooya mukati kabutana kutuba, mupailishi ulyeelete kupatula muntu uyo kwanshiku shosanwe ashobilo.

⁵ Kuswawaawo, mupailishi ulyeelete kumubona alimwi pabushiku bwasanu ashobilo. Na cilonda ico wacibona ayi cilibo mushobo womwi cakubula kwiindaawo, ulaakumunungilako nshiku shosanwe ashobilo ashimwi shakwikala eenka.

⁶ Mupailishi ulaakubona muntu uyo alimwi pabushiku bwasanu ashobilo. Ono na cilonda coosha cakubula kwiindaawo, ulaakumwaamba ayi ulisalalite kweelana aMilawo. Nkokwaamba ayi ncilondabo. Muntu uyo ulaakucapabo shakufwala shakwe lyalo ulaakunoosalalite kweelana aMilawo.

⁷ Sombi na cilonda ico ceendaawo kuswa lyeelyo mupailishi ndyaakacibona akumwaamba ayi ulisalalite, ulyeelete kuya kumupailishi alimwi.

⁸ Mpeeke mupailishi ulaakumubona alimwi. Ono na ceendaawo, ulaakumwaamba ayi taasalalite. Nkokwaamba ayi ngamanata.

⁹ “Na muntu ulicite manata, ulyeelete kuletwa kumupailishi

¹⁰ uyo weelete kumubona. Ono na pacikanda pali cilonda calengesha booya kutuba alimwi kaciswite mashina,

¹¹ nkokwaamba ayi ngamanata anene. Mupailishi ulaakumwaamba ayi taasalalite, sombi teelete kumupatula ayi anoocibonwa, ceebo cilibwenekete kale ayi taasalalite.

¹² Ono na manata anene akukumanabo muntu uyo kuswa kumutwi kushikila akumyeendo,

¹³ mupailishi ulyeelete kumubona alimwi. Na wacana ayi ncakwiila akumanabo mubili woonse, ulaakumwaamba ayi ulisalalite kweelana aMilawo. Na cikanda cakwe coonse catuba, nkokwaamba ayi ulisalalite kweelana aMilawo.

¹⁴ Sombi kuswa paciindi ico cilonda ciceneme ndyecaboneka, ingayi taasalalite.

¹⁵ Anu mupailishi ulaakumubona alimwi, ono na wacana cilonda ciceneme, ulaakumwaamba ayi taasalalite. Cilonda ciceneme cilabonesha ayi ngamanata, aboobo muntu uyo taasalalite.

¹⁶ Sombi na cilonda ico coosha akuboneka kutuba, muntu uyo ulyeelete kuya kumupailishi

¹⁷ uyo weelete kumubona alimwi. Na cilonda catuba, nkokwaamba ayi ulisalalite, alakwe mupailishi ulaakumwaamba ayi ulisalalite.

¹⁸ “Ono na muntu umwi wakalinga kucite cuute, lyalo coosha,

¹⁹ sombi kunembo paboneka cituba cimwi nceenga cashimba nabi kuboneka kalonda kafubela apo pakalinga cuute, ulyeelete kuya kumupailishi.

²⁰ Mupailishi ulaakumubona, ono na wabona ayi kalonda kenjila bunene mukati kwiinda cikanda alimwi na booya buliimo bwatuba, nkokwaamba ayi ulaakumwaamba ayi taasalalite. Ingayi ngamanata atalikila mucuute.

²¹ Sombi na mupailishi wabona mbuli mbokabete akucana ayi booya buliimo tabuna kutuba alimwi takana kwinjila mukati bunene kwiindilila cikanda, koosha, ulyeelete kumupatula kwanshiku shosanwe ashobilo.

²² Ono na kalonda ako keendaawo mupailishi ulaakumwaamba ayi taasalalite. Nkokwaamba ayi ulicite manata.

²³ Sombi na kacilibo mushobo womwi, akubula kwiindaawo, ngumubatabo wa cuute, lyalo mupailishi ulaakumwaamba ayi ulisalalite kweelana aMilawo.

²⁴ “Pacikani ca muntu wakapya, na pacilonda patalika kuboneka kutuba nabi kufubela,

²⁵ mupailishi ulyeelete kumubona. Na booya buli mucilonda bwatuba alimwi na cilonda cili mukati bunene kwiindilila cikanda, ingayi ngamanata atalika apo mpwaakapya. Aboobo mupailishi ulaakumwaamba ayi taasalalite.

²⁶ Ono na booya buliimo tabukwe kutuba, alimwi tacikwe kwinjila bunene mukati, sombi coosha, mupailishi ulyeelete kumupatula kwanshiku shosanwe ashobilo.

²⁷ Mupailishi uyo ulaakumubona alimwi pabushiku bwasanu ashobilo. Na wacana ayi ceendaawo, ingayi ngamanata. Lyalo mupailishi ulaakumwaamba ayi taasalalite kweelana aMilawo.

²⁸ Sombi na wacana ayi cilonda ico cilibo mushobo womwi, coosha cabula kwiindaawo, nkokwaamba ayi teshi manata. Anu mupailishi ulaakumwaamba ayi ulisalalite kweelana aMilawo ceebo ngumubatabo wakupya.

²⁹ “Na musankwa nabi mwanakashi ulicite cilonda pamutwi nabi pamubanga,

³⁰ mupailishi ulyeelete kumubona. Na cilonda caboneka ayi cakenjila bunene kwiinda pacikanda alimwi abooya buliimo kunooboneka mushobo wacibobo akuceyaceya, ingayi ngamanata. Aboobo ulaakumwaamba ayi taasalalite.

³¹ Ono mupailishi pakumubona na wacana ayi cilonda tacina kwinjila bunene, sombi kamutaboneki booya buli kabotu, ulyeelete kumupatula kwanshiku shosanwe ashobilo.

³² Mpomunyaawo mupailishi ulaakubona cilonda ico alimwi pabushiku bwasanu ashobilo. Ono na wacana ayi tacina kwiindaawo alimwi taamu booya bwacibobo, akutenjila bunene kwiindilila cikanda,

³³ muntu uyo ulyeelete kukulula misusu kukushakobo waawo pali cilonda. Mpeeke mupailishi ulaakumunungilako ashimwi nshiku shosanwe ashobilo shakunookala eenka.

³⁴ Pabushiku bwasanu ashobilo, mupailishi ulaakubona cilonda cakwe alimwi. Ono na tacikwe kwiindaawo akutenjila bunene kwiindilila cikanda, ulaakumwaamba ayi ulisalalite kweelana aMilawo. Muntu uyo ulyeelete kucapa shakufwala shakwe, lyalo ulaakunoosalalite.

³⁵ Sombi na cilonda ceendaawo kuswa lyeelyo mupailishi ndyaakamwaamba ayi ulisalalite,

³⁶ mupailishi ulyeelete kumubona alimwi. Na cilonda ceendaawo, teelete akwaamba ayi abone booya bwacibobo. Cilibwenekete kale ayi muntu uyo taasalalite.

³⁷ Ono na mupailishi mwiine wabona ayi tacina kwiindaawo alimwi na booya buli kabotu butookula mucilonda, ingayi camana. Nkokwaamba ayi mupailishi ulaakumwaamba ayi ulisalalite kweelana aMilawo.

³⁸ “Na musankwa nabi mwanakashi ulicite tulonda tutuba pacikanda,

³⁹ mupailishi ulyeelete kubona muntu uyo. Ono na tulonda tutootubulukatubuluka, ingayi nkufumukwabo pacikanda. Nkokwaamba ayi ulisalalite kweelana aMilawo.

⁴⁰ “Na musankwa waba lubala, ingayi ulisalalite kweelana aMilawo.

⁴¹ Na wabeta lubala kukatuutu, pamutwi nabi kufwaafwi ankumo, ulisalalite.

⁴² Sombi na waba cilonda cifubela palubala, nkokwaamba ayi ngamanata.

⁴³ Aboobo mupailishi ulyeelete kumubona. Ono na pali cilonda cifubela

⁴⁴ mupailishi ulaakumwaamba ayi taasalalite mukwiinga wa manata ali pamutwi wakwe.

⁴⁵ “Anu muntu ucite manata ulyeelete kufwala shakufwala sha masempele. Teelete kusakula alimwi ulyeelete kufweka camulomo akunokoolobesha ayi, ‘Nshisalalite! Nshisalalite!’

⁴⁶ Kulilabo na akanoocicite bulwashi ubo, teshi akanoosalaliteewo, alimwi ulyeelete kwikala pansengwe lya misumba kantalamukila abamwi boonse.

Milawo ikumite kukubunda

⁴⁷ “Na kubunda kwaboneka pacakufwala ca booya bwa mbelele nabi cakufwala ca cisani citeshimite,

⁴⁸ nabi cintu cili coonse ca cisani citeshimite, ca booya bwa mbelele, pacipaya nabi cimwi cintu coonse ca cipaya,

⁴⁹ na citooboneka canyansabili nabi kufubela, ingayi nkubunda kuya ciindaawo. Aboobo cilyeelete kuboneshekwa kumupailishi.

⁵⁰ Mupailishi uyo ulyeelete kucibona akucibika palubasu ceenka kwanshiku shosanwe ashobilo.

⁵¹ Ulyeelete kucibona alimwi pabushiku bwasanu ashobilo. Na kubunda kweendaawo, ingayi cintu ico tacisalalite.

⁵² Kuswawaawo mupailishi ulaakucitenta mukwiinga nkubunda kuya ciindaawo. Nkokwaamba ayi cilyeelete kunyonyoolwa amulilo.

⁵³ “Sombi na mupailishi pakucibona wacana ayi kubunda takuna kwiindaawo,

⁵⁴ ulaakwaamba ayi cilyeelete kucapwa akubikwa palubasu ceenka kwanshiku shosanwe ashobilo.

⁵⁵ Ono na cacapwa, mupailishi ulyeelete kucibona. Na mubala wa kubunda uko tauna kusanduka nabi kubunda uko kwabula kwiindaawo, ingayi tacisalalite. Nkokwaamba ayi cilyeelete kutentwa mumulilo nacibi kwaamba ayi cabundabo lubasu lomwi nabi lumwi.

⁵⁶ Sombi na mupailishi wacibona akucana ayi mubala wa kubunda watubulukatubuluka ulyeelete kutimbulaako kushakufwala nabi kucipaya.

⁵⁷ Lyalo na kubunda uko kwatalika alimwi, nkokwaamba ayi kubunda kutooyabo ciindaawo. Anu mwine cintu ulyeelete kucitenta.

⁵⁸ Na wacicapa, mpeeke kubunda kwamana, ulyeelete kucicapa alimwi. Lyalo cilaakunoosalalite kweelana aMilawo.”

⁵⁹ Anu iyi njemilawo ya kubunda kwa pacakufwala ca booya bwa mbelele, cakufwala ca cisani citeshimite, cintu cili coonse ca cisani citeshimite, ca booya bwa mbelele, nabi cintu cili coonse ca cipaya. Iyi njenshila yakwishiba na cilisalalite nabi tacisalalite kweelana aMilawo.