Bene Lefi 12 - Baibo Busansulushi Bwa Libuku Ili

Kusalashikwa kwa banakashi na batumbuka

¹ Mpeeke Mwaami Lesa wakaambila Mose ayi,

² “Lwiita bene Isilaeli ayi na mwanakashi watumbuka mwaana musankwa, taasalalite kweelana aMilawo kwanshiku shosanwe ashobilo kuswa pabushiku ndyaapulukaamo, bweenka mbwaatasalalite kweelana aMilawo na wakubala.

³ Pabushiku bwasanu ashotatwe, mwaana uyo ulyeelete kupalulwa.

⁴ Lyalo mwanakashi ulyeelete kulindilila kwanshiku shili makumi otatwe ashotatwe kwaamba ayi akasalashikwe kweelana aMilawo ceebo ca bulowa bwakwe bwakaswa. Paciindi ici, teelete kukumya cintu nabi comwi cisalalite nabi kwinjila muTente isalalite kushikila bushiku bwakusalashikwa kwakwe bukeende.

⁵ “Ono na wapulukamo mwaana mwanakashi, taasalalite kweelana aMilawo kwanshiku shili makumi obilo ashone kuswa pabushiku ndyaakapulukaamo, bweenka mbwaatasalalite na wakubala. Lyalo palaakwiinda nshiku shili makumi osanwe alyomwi alimwi anshiiku shosanwe abomwi, kwaamba ayi asalashikwe kweelana aMilawo ceebo ca bulowa bwakwe bwakaswa.

⁶ “Na ciindi cakusalashikwa kwamwanakashi uyu kweelana aMilawo ceenda, nabi wakapulukamo mwaana musankwa nabi mwanakashi, ulyeelete kuleta mwanaambelele ucite mwaaka womwi kumupailishi ayi ngumulambu wakutenta, alimwi ankulimba nabi mpolobe ya mulambu wakulekelelwa shibiibi. Uyeelete kupeta pamulyango wa Tente ya Cipangano.

⁷ Mpeeke mupailishi ulaakubenga mulambu wa mwanakashi uyu kuMwaami Lesa, akucita kweelana aMilawo ayi amusalashe, kuswawaawo ulaakunoosalalite kweelana aMilawo. Anu mwanakashi na waswa mukupulukaamo mbweelete kucita ubo.

⁸ “Ono na mwanakashi uyo waalilwa kucana mwanaambelele, ulyeelete kuleta mpolobe shobilo nabi nkulimba shobilo ayi yomwi ngumulambu wakutenta, alimwi imwi ngumulambu wakulekelelwa shibiibi. Alakwe mupailishi ulaakucita kweelana aMilawo ayi amusalashe, kuswawaawo ulaakunoosalalite.”