Bene Kolose 4 - Baibo Busansulushi Bwa Libuku Ili

¹ Nomucite basha, amucite shiluleme asheelete kubasha banu, mukwiinga mulishi kwaamba ayi amwebo mulicite Mwaami kwiculu.

Milasho imwi

² Amucatishe kupaila, kunoolibambite lyoonse alimwi akulumba Lesa.

³ Kamutupaililaako aswebo kwaamba ayi Lesa atupe ciindi cibotu cakushimikila makani akwe akushimikila shabushishi shaamba pali Klistu. Ceebo ca makani abushishi aya, nebo ndyaangitwe.

⁴ Anu anebo kamumpaililaako kwaamba ayi nshimikile kabotu makani aya akwaasansulula bweenka mbuli mbwaaelete.

⁵ Bwikaalo bwanu pabantu batashomi muli Klistu abube bwa busongo alimwi mulyeelete kusebensesha kabotu ciindi cakushimikila Makani Abotu kuli mbabo.

⁶ Ciindi coonse myaambo yanu ibe ya luse iyaka bamwi alimwi mulyeelete kwishiba bwakukumbula kabotu muntu uli woonse.

Maswi akweelaako

⁷ Mukwabesu usunikwi Taikikasi, ulaakwisa mukumwishibisha makani oonse apali ndime. Ngumusebenshima ushomeka mumilimo ya Mwaami Jesu.

⁸ Nceceeco ncentoomutumina kooko, kwaamba ayi ese amwishibishe mbotutookala alimwi akumuyumyayumya.

⁹ Ulaakwisa aOnesimasi, mukwabesu ushomeka alimwi usunikwi uyo uswa mulikoto lyanu. Bobilo aba balaakumulwiita shoonse shitoocitika kuno.

¹⁰ Alisitakasi, kailima wamwaansha, alakwe Maako mupyala wakwe Banabasi wamwaansha. Mwakalwiitwa kale ayi na Maako akese kumishaanu uko, mukamutambule kabotu.

¹¹ Alakwe Joshuwa, uyo wiitwa ayi Jasitasi, utoomwaansha. Botatwe aba mbobaJuda beenkabo pabasebenshima batooncafwa mumulimo wa Bweene bwakwe Lesa alimwi balanjumyayumya abuumbi.

¹² Epafulasi wamwaansha. Alakwe ngwamulikoto lyanu alimwi ngumusebenshi wakwe Klistu Jesu. Lyoonse ulamupaililaako kuli Lesa kwaamba ayi mushimpe mulushomo amukucita kuyanda kwakwe Lesa.

¹³ Nebo ndikamboni kwaamba ayi muntu uyu ulasebensa abuumbi ceebo ca ndimwe abaabo bali kuLawodisiya alimwi akuAyilapolisi.

¹⁴ Luka mushiliki wesu usunikwi alimwi aDimasi bamwaansha.

¹⁵ Amutwaanshisheko bamakwabesu boonse ba mundabala ya Lawodisiya alimwi amukwabesu Nimfa, pantu pomwi abashomi babungana muŋanda yakwe.

¹⁶ Nkalata iyi yaakubelengwa kuli ndimwe, ilyeelete ikabelengwe amucoonde ca kuLawodisiya, lyalo amwebo mulyeelete kubelenga nkalata yeshi ikaswe kucoonde ca kuLawodisiya iyo njendakalemba.

¹⁷ Amulwiite Akipasi ayi, “Sebensa kabotu akumanisha milimo yoonse yakakupa Mwaami Jesu.”

¹⁸ Nebo nePaulo, ndaleemba alyaansa lyangu nemwiine ayi, “Ndamwaansha.” Mutaluubi kwaamba ayi ndi muntolongo! Luse lwakwe Lesa lube amwebo.