Bene Galatiya 6 - Baibo Busansulushi Bwa Libuku IliAmucafwane kunyamuna shimulemena 1 Nobamakwesu, ono na umwi mulikoto lyanu wacita cibiibi cimwi cili coonse, mwebo nomutanjililwa aMushimu Usalashi mulyeelete kumululamika. Mulyeelete kucita boobo cakulibombya, sombi amwebo mucenjele kwaamba ayi mutawiti mumasunko. 2 Amucafwane kunyamuna shimulemena. Na mwacita boobo, nkokwaamba ayi mwakonkela mulawo wakwe Klistu. 3 Ono na umwi kaalisumpula, sombi kakutaaku mbwaabete, ingayi utoolibecabo mwiine. 4 Muntu woonse ulyeelete kubona milimo yakwe mbuli mbweebete. Na ili kabotu, inga walisumpula ceebo ca njiyo, cakuteelanya aya umwi muntu. 5 Mukwiinga woonse muntu ulalinyamwita mukuli wakwe. 6 Uyo woonse utokwiishikwa maswi akwe Lesa ulyeelete kwaabana amufundishi wakwe shintu shoonse shibotu nshaacite. 7 Mutabecekwi, muntu inga taaleengi Lesa buluya. Muntu woonse ulatebula sheesho nshaakashanga. 8 Na muntu washanga sha buumi bwa buntu, ulaakutebula lufu lutamaani. Ono na washanga shisuni Mushimu Usalashi, ulaakutebula buumi butamaani. 9 Anu tutacileeki kucita shibotu mukwiinga paciindi ceelete, tulaakutebula na tubule kutyongooka. 10 Paceebo ceeco, bulya mbotucite ciindi ceelete, atucite shibotu kubantu boonse, bunene bunene abo bali mulikoto lya bashomi. Maswi akweelaako 11 Amubone ono mabala kukomena ngoontomulembela nemwiine alyaansa lyangu! 12 Abo boonse basuni kulibotesha kubantu, mbobatoomukakatisha ayi mupalulwe. Ncebacitila boobo nkwaamba ayi batapenshekwi ceebo ca mucilingano wakwe Klistu. 13 Nakubi boobo abo boonse bakapalulwa tabakonkeli Milawo. Balisunibo kwaamba ayi na mupalulwe, balisumpule ceebo ca kupalulwa kwanu. 14 Nebo nshikoonshi kulisumpula mucintu nabi comwi, sombi mumucilingano wa Mwaami wesu Jesu Klistu weenkabo. Mukwiinga kwiinda mumucilingano, shabuumi bwa buntu shakafwa kuli ndime alimwi anebo ndyaanga ngumuntu ufwite kuli nshisho. 15 Mukwiinga kupalulwa nabi kutapalulwa taaku mbokubeteewo, sombi cintu cinene nkuba abuumi bupya. 16 Lesa aape luumuno alimwi akunyumfwila nkumbu bantu boonse bakonkela kwiisha uku abantu bamwi boonse bakwe Lesa. 17 Cakweelaako, kutabi muntu nabi womwi ngweshi anoocimpensha, mukwiinga pamubili wangu pali mibata ibonesha ayi ndi musebenshi wakwe Jesu. 18 Luse lwa Mwaami wesu Jesu Klistu lube amwebo nobamakwesu noonse. Ameni. |
Lenje Bible with Deuterocanon © Bible Society of Zambia, 2003.
Bible Society of Zambia