Bene Galatiya 1 - Baibo Busansulushi Bwa Libuku Ili

¹ Ndime Paulo mutumwi. Teshi muntu wakantuma sombi Jesu Klistu alimwi aLesa Ishiwesu uyo wakamubusha kuswa kubafu.

² Nebo abeensuma boonse mboondyaabo kuno twamwaansha noshoonde sha kuGalatiya.

³ Luse aluumuno shibe amwebo kuswa kuli Lesa Ishiwesu aMwaami Jesu Klistu.

⁴ Klistu wakalibenga ceebo ca shibiibi shesu ayi atufuune kububi bwa mucishi cino ca panshi, kweelana akuyanda kwakwe Lesa Ishiwesu.

⁵ Kuli Lesa akube bulemu lyoonse alyoonse. Ameni.

Taaku aamwi Makani Abotu

⁶ Ndakankamana abuumbi mukwiinga mwafwambaana kusuula Lesa, uyo wakamwiita kwiinda muluse lwakwe Klistu, akukonkela makani amwi.

⁷ Teshi kwaamba ayi kuli makani abotu amwi, sombi kuli bantu bamwi batooyanda kumufulunganya kwiinda mukusendeka Makani Abotu aamba shapali Klistu.

⁸ Muntu uli woonse, swebo nabi munjelo uswa kwiculu, na wamushimikila makani amwi apusene aMakani Abotu ayo ngotwakamushimikila, uyo Lesa amushingane muyayaya.

⁹ Twamulwiitawo kale alimwi ntooboshaawo sunu, na kuli umwi utoomushimikila makani amwi apusene aMakani Abotu ngotwakamushimikila, uyo Lesa amushingane muyayaya.

¹⁰ Sa mukwaamba boobo ntooyanda kulumbwa abantu? Napaceyi, sombibo Lesa eenka. Sa ndisuni kukondelesha bantu? Sobwe, nendalinga kucisuni kukondelesha bantu, naakwiinga nshibete musebenshi wakwe Klistu.

Paulo mbwaakaba mutumwi

¹¹ Nobamakwesu, ntomwishibisha kwaamba ayi Makani Abotu ayo ngoonshimikila, taakwe kuswa kubantu.

¹² Nshikwe kupekwa kumuntu nabi kwiishikwa kumuntu, sombi Jesu Klistu ngowakanjubulwita Makani Abotu ayo.

¹³ Mwakanyumfwa kale mbuli buumi bwangu mbobwakalinga ndindakalinga kukonkela kwiisha kwa baJuda. Ndakalinga kupensha bumbi coonde cakwe Lesa akweelesha kwaamba ayi ncinyonyoole.

¹⁴ Nebo ndakalinga kwiinda beensuma boonse mukukonkela kwiisha kwa baJuda. Ncakwiila ndakalinga muyumu abuumbi mukukonkela kwishibila kwa bakulukulu.

¹⁵ Sombi Lesa muluse lwakwe, wakansalilabo limwi kaantana kushalwa ayi nkamusebensele.

¹⁶ Cakamukonda kunjubulwita Mwanaakwe kwaamba ayi nkashimikile Makani Abotu aamba pali nguwe kubaswamashi bakunsengwe. Nshikwe kuya kumuntu mukwiipusha bwakucita,

¹⁷ nabi kuya kuJelusalemu mukwiipusha baabo bakataanguna kuba batumwi. Sombi ndakaya kuAlebya, kuswa kooko ndakaboola kuDamasikasi.

¹⁸ Ndipakeenda myaaka yotatwe, ndakaya kuJelusalemu mukufwakasha kuli Pita akwikalaakwe nshiku shili likumi ashosanwe.

¹⁹ Taaku mutumwi aumwi ngondakabona, sombibo Jemusi eenka, mukwabo Mwaami wesu Jesu.

²⁰ Ntoomulwiita calushinisho pameenso akwe Lesa ayi makani ayo ngontoomulembela ngancinencine.

²¹ Kuswawaawo, ndakaya mushishi sha Silya aSilisiya.

²² Ciindi ico, bashomi ba mushoonde sha kuJudeya kabatenshiiwo.

²³ Bakalinga kunyumfwabo ayi, “Uyo muntu wakalinga kutupensha ono ulashimikila shalushomo lweenka ndwaakalinga kusuni kunyonyoola!”

²⁴ Mpomunyaawo bakalumbaisha Lesa ceebo ca ndime.