Bene Filipi 2 - Baibo Busansulushi Bwa Libuku Ili

Kuliceesha akusumpulwa kwakwe Klistu

¹ Na muli kuyuminishikwa muli Klistu, na muli lucafwo mulusuno lwakwe, na muli bwanabwankashi muMushimu Usalashi alimwi kunyumfwilana nkumbu,

² anu ndamusenga ayi munsangalashe abuumbi mukuba bweenka ubo. Amube alunyumfwano, bantu bacite lusuno alimwi bacatene pantu pomwi camoyo amuyeeyo womwi.

³ Mutaciti cintu nabi comwi cakulisuna nabi kulisumpula. Sombi muliceeshe, lyoonse kunoobona babyaanu anga balamwiindaawo.

⁴ Woonse muntu ulyeelete kucita shintu shicafwa bamwi, kutaambabo sheesho shicafwa ndimwe nweenka.

⁵ Amube amoyo mbuli wooyo wakalinga kucite Klistu Jesu.

⁶ Lakwe wakalingabo nguLesa lyoonse, sombi taakwe kuba amuyeeyo wakwaamba ayi eelane aLesa munkusu shakwe mwiine.

⁷ Wakaliceesha camaansa obilo, akulibika muciimo cabusha akushalwa mbuli bantu boonse.

⁸ Mubuumi bwa buntu ubo, wakaliceesha akunoonyumfwila Lesa kushikila palufu lwakwe, ee, lufu ulo lwa pamucilingano.

⁹ Paceebo ceeco, Lesa wakamusumpula camaansa obilo, akumupa liina liinda pameena oonse.

¹⁰ Aboobo ceebo ca bulemu bwa liina lyakwe Jesu, shoonse shilengwa sha kwiculu, sha pacishi ca panshi alimwi asheesho shili panshi lya cishi shilaakufukama kunembo lyakwe.

¹¹ Alimwi boonse balaakusumina patuba ayi Jesu Klistu nguMwaami, mukupa bulemu kuli Lesa Ishiwesu.

Bene Klistu babe anga njimimuni

¹² Ono nomusunikwi, kweelana ambomwalinga kunyumfwila ndindalingaanu, mulyeelete kwaamba ayi mwiindilishe kunoonyumfwila ciindi ici nceentabeteeko uko. Amutolelele kusebensa caboowa akututuma kwaamba ayi mumanishe mulimo wa lupulusho lwanu.

¹³ Mukwiinga Lesa ngoosebensa muli ndimwe ayi muyande akucita shintu kweelana amuyeeyo wakwe.

¹⁴ Amucite shintu shoonse cakutatongooka alimwi akupikishanya.

¹⁵ Amube bana bakwe Lesa basalalite, batabishi, batacite mulandu alimwi batacite kampenda. Pakati ka bantu batashomeki, bamucita shibi, mulyeelete kubala mbuli mimuni ili mwiculu,

¹⁶ pakubalwiita maswi abuumi. Na mwacita boobo, ndaakuba asheebo shakunsangalasha ceebo ca ndimwe paBushiku ubo aakuboola Klistu, mukwiinga cilaakutondesha ayi ndakacicila nabi kusebensela ciliiwo.

¹⁷ Nabi na bulowa bwangu butootilwa anga ncipo ca cakunwa pantu pomwi acipo ico lushomo lwanu ncelutoobenga kuli Lesa, ndasangalala akusekelela pantu pomwi amwebo noonse.

¹⁸ Aboobo amwebo noonse mulyeelete kusangalala akusekelela pantu pomwi anebo.

Timoti aEpafuloditasi

¹⁹ Na Mwaami mwiine wayanda, ntooyeeya kufwambaana kutuma Timoti kuli ndimwe kwaamba ayi moyo wangu ukale pakunyumfwa makani atooswa kumishaanu uko.

²⁰ Nshiciteewo aumwi muntu ngoonshoma ayi inga wamubikaako maano.

²¹ Mukwiinga bamwi baanji balalisukamabo shintu shakulisangalasha beene kutaamba makani akwe Jesu Klistu.

²² Mwebo noonse mulishi kale bubotu bwa milimo yakwe Timoti, mbuli mbondakasebensaakwe anga ngumwaana abaishi pakushimikila Makani Abotu.

²³ Paceebo ceeco, ntooshoma ayi ntoofwambaana kumutuma, ndaakubona mbweshi shikanyendele shintu.

²⁴ Ntooshoma ayi na Mwaami wayanda, anebo ndaakwisa uko coonoono.

²⁵ Ono ndayeeya kwaamba ayi inga cacafwa kumubooshesha mukwabesu uyu Epafuloditasi, uyo musebenshima alimwi shilumambama muli Klistu. Lakwe ngumuntu ngomwakatuma ayi ancaafwe.

²⁶ Ono wamuyeeya abuumbi noonse alimwi wapenshekwa mumoyo mukwiinga mwakanyumfwa ayi wakalinga mulwashi.

²⁷ Ncakwiila wakalinga mulwashi alimwi lwakalingabo lufu, sombi Lesa wakamunyumfwila nkumbu. Kuteshibo lakwe eenka, sombi wakanyumfwila anebo kwaamba ayi nteeliki buumba pabuumba.

²⁸ Ntoolangilabo ciindi ndyeshi nkamutume kuli ndimwe, kwaamba ayi amwebo mukasangalale alimwi pakumubona. Lyalo anebo kulisukama kwangu ndyeshi kukaceye.

²⁹ Aboobo amumutambule camaansa obilo akusangalala ayi ngumukwabesu muMwaami. Bantu bamushobo wooyu boonse, amubalemeke.

³⁰ Wakaboolelabo pakalindi ceebo ca milimo yakwe Klistu. Wakaaba buumi bwakwe kwaamba ayi ancaafwe musheesho nshemwatakalinga kukonsha kuncafwa.