Bene Ebulu 8 - Baibo Busansulushi Bwa Libuku Ili

Jesu ngoMupailishi wesu Munene

¹ Makani eene eene ngakwaamba ayi tulicite Mupailishi Munene wa mbuli wooyu, uyo ushiite kululyo lwa cuuna ca bwaami cakwe Lesa Wiindaawo kwiculu.

² Ngowooyo usebensela Lesa muMusena Usalalite Wiindaawo, nkokwaamba ayi mutente yancinencine Mwaami Lesa njaakayaka, kuteshi muntu tau.

³ Mupailishi munene woonse ulapekwa mulimo wakupa shipo alimwi amilambu kuli Lesa, aboobo Mupailishi wesu Munene alakwe ulyeelete kuba ashintu shakupa kuli Lesa.

⁴ Naalinga mucishi ca panshi, naakwiinga teshi mupailishi napaceyi mukwiinga mpobali kale bapailishi abo bapa shipo isho shaambwa muMilawo ya baJuda.

⁵ Milimo bapailishi njebacita ilibo anga ncimfule nabi cikoshanyo ca sheesho sha kwiculu. Cilibo bweenka mbuli mbocakalinga kuli Mose. Mukwiinga Mose ndyaakalinga kusuni kuyaka Tente ya Cipangano Lesa wakamwaambila ayi, “Ulyeelete kuyaka akucita shoonse kweelana ambuli mbowakaboneshekwa pakalundu.”

⁶ Sombi kuswawaawo, Lesa wakapa Jesu mulimo wa bupailishi unene kwiinda pawaabo, bweenka mbuli cipangano cili pakati kakwe Lesa alimwi abantu bashoma muli nguwe mbocibete cibotu kwiinda cikulukulu mukwiinga nshaakashomesha Lesa pali ncico shileendaawo kubota.

⁷ Cipangano cakutaanguna necakalinga kululeme naakwiinga takuyandiki cipangano acimwi cabili.

⁸ Sombi Lesa wakacana kampenda mubantu bakwe akwaamba ayi, “Nebo neMwaami Lesa ntokwaamba ayi, ‘Inshiku shilaakwisa, ndyeshi nkapangane cipangano cipya abene Isilaeli alimwi abene Juda.

⁹ Teshi cikabe mbuli ceeco cakalinga pakati ka bamashali babo bakulukulu ndindakabatanjilila kuswa muIjipiti. Tabakwe kutolelela kucita kweelana ambotwakapangana, aboobo, ndakabasuula.

¹⁰ Ono nebo neMwaami Lesa mbulya mbweshi nkapangane abene Isilaeli munshiku shitoosa. Ndaakubika milawo yangu mumiyeeyo yabo akwiilemba mumyoyo yabo. Ndaakuba Lesa wabo abalo balaakuba bantu bangu.

¹¹ Taaku weshi akanokwiisha mubye nabi kwiisha mukwabo ayi eshibe nebo neMwaami Lesa mukwiinga boonse balaakunshiba, kuswa kumuniini kushika akumunene.

¹² Ndaakulekelela bubi bwabo, alimwi shibiibi shabo teshi nkashiibalukeewo.’ ”

¹³ Kwiinda mumaswi akwaamba ayi, “Cipangano cipya,” Lesa walengesha ayi cipangano citaanshi cibule mulimo. Ono na cintu coonse cabula mulimo alimwi cakubuluka, ingayi cili pafwaafwi kuloba.