Bene Ebulu 7 - Baibo Busansulushi Bwa Libuku Ili

Mupailishi Melikisedeki

¹ Uyu Melikisedeki wakalinga mwaami wa kuSalemu alimwi wakalinga mupailishi wakwe Lesa wa kwiculu Wiindaawo. Ono Abulaamu ndyaakalinga kuswa kunkondo uko nkwaakakoma bamaami bone, Melikisedeki wakamukumanya akumupa coolwe.

² Mpomunyaawo Abulaamu wakapa Melikisedeki calikumi pashintu shoonse nshaakanyaya baabo mbwaakakoma. Busansulushi bwakutaanguna bwa liina lya Melikisedeki mbwakwaamba ayi “Mwaami wa Bululami.” Alimwi wakalinga mwaami wa Salemu, nkokwaamba ayi “Mwaami wa Luumuno.”

³ MuMalembo akwe Lesa taaku palembetwe shabaishi Melikisedeki, banyina nabi bamashali bakwe bakulukulu. Taaku ushi shakushalwa nabi kufwa kwakwe. Ulibo anga nguMwanaakwe Lesa mukwiinga ngumupailishibo lyoonse muyayaya.

⁴ Ono inga mwaboona kwaamba ayi muntu uyu wakalinga mulemu abuumbi! Abulaamu mushali wesu mukulukulu wakamupa calikumi pashintu shoonse nshebakanyaya baabo mbobakakoma.

⁵ Milawo ilaamba ayi bapailishi bamulunyungu lwakwe Lefi balyeelete kupekwa calikumi kuswa pashintu shoonse shicite bene mishaabo, nkokwaamba ayi bene Isilaelinyinaabo, nakubi kwaamba ayi abalo mbamulunyungu lwakwe Abulaamu.

⁶ Melikisedeki taakalinga wamulunyungu lwakwe Lefi, sombi wakapekwa calikumi kuswa kuli Abulaamu. Kuswawaawo wakapa coolwe Abulaamu, muntu uyo Lesa ngwaakashomesha kumucitila shintu shiinji.

⁷ Aboobo muntu uli woonse ulishi kwaamba ayi muntu upa coolwe ngumunene kwiinda wooyo utoopekwa coolwe.

⁸ Ono kwaamba pamakani a bapailishi, bakalinga kupekwa calikumi mbantu bafwa. Sombi pali Melikisedeki, Malembo alaamba ayi ngumuntu muumi wakapekwa calikumi.

⁹ Anu inga twaamba ayi Abulaamu ndyaakapa calikumi, alakwe Lefi, mushali mukulukulu wa bantu abo bakalinga kupekwa calikumi, wakacipa.

¹⁰ Mukwiinga Lefi kaatana kushalwa, sombi inga twaamba ayi wakalinga kucili mumubili wakwe Abulaamu mushali wakwe mukulukulu, Melikisedeki ndyaakakumanaakwe.

¹¹ Milawo yakapekwa bene Isilaeli yakapekwa kweendelana abupailishi bwa bene Lefi. Ono bapailishi bamulunyungu lwakwe Lefi nebakasebensela Lesa kweelana ambocakalinga kuyandika, naakwiinga takuyandiki mupailishi umwi upusene ambabo, wa wooyo uswa mumushobo wa bupailishi bwakalinga kucite Melikisedeki, kuteshi Aloni.

¹² Mukwiinga na bupailishi bwaba mushobo umwi, ayalo Milawo ilyeelete kupusana.

¹³ Alimwi Mwaami wesu, uyo utokwaambwa, wakalinga wamulunyungu lumwi alimwi taaku nabi womwi mulunyungu lwakwe wakasebensawo kale mulimo wa bupailishi.

¹⁴ Cilishibikitwe ayi Mwaami wesu wakalinga wamulunyungu lwakwe Juda alimwi Mose taakwe kulwaambaawo lunyungu ulu ndyaakalinga kwaamba shabapailishi.

Mupailishi umwi uli mbuli Melikisedeki

¹⁵ Ono kupusana kwa mushobo wa bupailishi kweendaawo kushibikwa ceebo kwaboneka mupailishi umwi upusene, uli anga nguMelikisedeki.

¹⁶ Lakwe taakwe kuba mupailishi kwiinda mumilawo yaamba palunyungu mwaakashalwa, sombi wakaba mupailishi kwiinda munkusu sha buumi bwakwe butamaani.

¹⁷ Mukwiinga Malembo akwe Lesa alaamba ayi, “Ulaakunoolibo mupailishi lyoonse, bupailishi bweenka mbuli bwakalinga kucite Melikisedeki.”

¹⁸ Paceebo ceeco, mulawo ukulukulu walekwa mukwiinga tewakalinga kucite nkusu alimwi taucafwi.

¹⁹ Mukwiinga Milawo yakwe Mose taikwe kululika muntu nabi womwi. Sombi bulya tulicite kulangila kwiindaawo kubota uko kutusenya kufwaafwi aLesa.

²⁰ Kwiilika pakulangila uku, Lesa wakalumbila. Sombi pabapailishi bamwi abo, Lesa taakwe kulumbilaawo pabupailishi bwabo.

²¹ Sombi Jesu wakaba mupailishi kwiinda mukulumbila, Lesa ndyaakaamba kuli nguwe ayi, “Nebo neMwaami ndalumbila alimwi teshi nkayeeyewo bumbi ayi, ‘Ulaakunoolibo mupailishi lyoonse.’ ”

²² Aboobo, bupusano ubu buliiwo bulatubonesha ayi Jesu ngoolengesha ayi cipangano cibotu ici cicitike.

²³ Bupusano bumwi buliiwo mbwakwaamba ayi, bapailishi abo bakulukulu bakalinga baanji ceebo bakalinga kufwa. Aboobo tebakalinga kutolelela mumulimo wabo.

²⁴ Sombi Jesu ngwamuyayaya alimwi bupailishi bwakwe teshi bukamaane.

²⁵ Nceceeco bulya anshiiku shoonse, ulakonsha kupulushisha baabo besa kuli Lesa kwiinda muli nguwe mukwiinga ngumuumi lyoonse kwaamba ayi anoobasengelaako kuli Lesa.

²⁶ Jesu anu ngoMupailishi Munene utucafwa munshila shoonse shiyandika. Ulisalalite alimwi taacite kampenda nabi bubi muli nguwe. Wakapusanishikwa abamucita shibi alimwi wakasumpulwa kwiinda shoonse sha kwiculu.

²⁷ Peculu lya waawo taabete mbuli bapailishi banene bamwi tau. Lakwe taceelete kunoocaya banyama nshiku shoonse pacipaililo ceebo ca shibiibi shakwe, kuboolaawo asha bantu. Wakacita boobo linkanda lyomwibo ndondoli, ndyaakalibenga mwiine ayi abe mulambu kuli Lesa.

²⁸ Milawo yakwe Mose ilabika bantu balefukite kuba bapailishi banene. Sombi kwiinda mukulumbila uko kwakesa pesule lya Milawo, Lesa wakabika Mwanaakwe ululeme, kwaamba ayi abe Mupailishi Munene wamuyayaya.