Bene Ebulu 3 - Baibo Busansulushi Bwa Libuku Ili

Jesu ngumunene kwiinda Mose

¹ Nobamakwesu, nomwakeetwa kuli Lesa kwaamba ayi mube abuumi bwa kwiculu. Amuyeeye Jesu, Mutumwi alimwi Mupailishi Munene wa lushomo ndotushimikila.

² Wakashomeka kuli Lesa uyo wakamusala ayi acite mulimo uyu, bweenka mbuli Mose mbwaakashomeka mukutanjilila ŋanda iyo yakalinga mbantu bakwe Lesa.

³ Muntu wayaka ŋanda ulapekwa bulemu kwiinda ŋanda iine. Paceebo ceeco, Jesu ulalemekwa kwiinda Mose.

⁴ Ncakwiila, ŋanda yoonse ilayakwa aumwi muntu, sombi Lesa ngomuyaki wa shintu shoonse.

⁵ Mose wakalinga kushomeka kuli Lesa ceebo wakalinga musebenshi shikutanjilila bantu bakwe Lesa alimwi wakalinga kwaamba shintu isho Lesa nshaakalinga kubambite kwaamba kunembo.

⁶ Sombi Klistu mukuba Mwanaakwe Lesa, ulashomeka mukweendelesha bantu bakwe Lesa boonse. Nkokwaamba ayi swebo tuli bantu bakwe Lesa na twatolelela kutaloonda alimwi akulisumpwita mushintu ishi nshetutoolangila.

Kookesha kwa bantu bakwe Lesa

⁷ Ono aboobo, kweelana abwaamba Mushimu Usalashi ayi, “Na mwanyumfwa maswi akwe Lesa sunu,

⁸ mutabi beshicimpamya bweenka bwakacita bamashali banu bakulukulu ndibakabukila Lesa pabushiku ndibakamusunka muluyanga.

⁹ Muluyanga umo, bakansunka nabi bakabona nshendakacita mumyaaka ili makumi one.

¹⁰ Aboobo, ncendakakalalila bantu abo akwaamba ayi, ‘Lyoonse balakusha myoyo yabo kuli ndime, alimwi balakaka kukonkela milasho yangu lyoonse.’

¹¹ Ndakakalala akwaamba cakushinisha ayi, ‘Teshi bakenjileewo mumusena wangu mwakookeshesha.’ ”

¹² Nobamakwesu, amucenjele kwaamba ayi mutabi muntu nabi womwi mulikoto lyanu, ucite moyo ubiibi alimwi utashomi, weenga wamukusha kuli Lesa muumi.

¹³ Sombi cinene ncemweelete kucita nkuyumininshanya inshiku shoonse kwaamba ayi kutabi nabi womwi eshi abecekwe kwiinda mukubisha akuba shicimpamya, kulilabo liswi lya kwaamba ayi, “Sunu,” muMalembo akwe Lesa kalicitubikaako aswebo.

¹⁴ Mukwiinga soonse tulasebensela pantu pomwi aKlistu kulilabo na twatolelela mulushomo ndotwakatalikaalo kushikila akumeelelesho a buumi bwesu.

¹⁵ Malembo akwe Lesa alaamba ayi, “Na munyumfwe maswi akwe Lesa sunu, mutabi beshicimpamya, bweenka mbuli bamashali banu bakulukulu ndibakaashukila Lesa.”

¹⁶ Mbaani abo bakanyumfwa maswi akwe Lesa bamane bamubukila? Mbaabo boonse Mose mbwaakatanjilila pakuswa muIjipiti.

¹⁷ Ino mbaani abo bakakalasha Lesa myaaka ili makani one? Mbantu abo bakabisha akufwita muluyanga.

¹⁸ Ono Lesa ndyaakaamba cakushinisha ayi, “Teshi bakeenjileewo mucishi umo mondalinga kweelete kubapa kookesha,” mbaani mbwaakalinga kwaambila? Mbantu abo bakamubukila.

¹⁹ Anu tweshiiba ayi bakaalilwa kwinjila mumusena uyo ceebo tabakwe kushoma.