Bene Ebulu 2 - Baibo Busansulushi Bwa Libuku Ili

Shalupulusho lunene

¹ Nceceeco ncetweelete kwiindilaawo kubikaako maano kushalushinisho isho nshetwakanyumfwa kwaamba ayi tutakasoweki.

² Makani Lesa ngaakaamba kwiinda mubaanjelo, akatondeshekwa ayi ngancinencine. Aboobo uyo woonse utakwe kucita kweelana amakani ayo, Lesa wakamupa mulandu weelete.

³ Ino swebo tulaakupuluka buyani na tatutoonyumfwila makani a lupulusho lunene bobulya? Mwaami Jesu mwiine ngowakataanguna kwaamba shalupulusho ulu, abalo abo bakamunyumfwa bakatulwiitilisha ayi ngalushinisho.

⁴ Alakwe Lesa wakalinga kuyumya bukamboni bwabo kwiinda mukucita shaankamiko shipusenepusene ashitondesho sha nkusu sha kwiculu alimwi akwiinda mukubapa shipo sha Mushimu Usalashi kweelana akuyanda kwakwe.

Shawooyo utulengesha kupulushikwa

⁵ Lesa taakwe kubika baanjelo pabweendeleshi bwa cishi citoosa ico ncetutokwaambaawo.

⁶ Sombi umwi wakaambisha pamwi muMalembo akwe Lesa ayi, “NobaLesa, anu muntu nciinshi ngweenga kamumuyeeya? Muntubo nciinshi cakwaamba ayi kamumulama?

⁷ Paciindi ciniini mwakamuceesha kwiinda baanjelo banu, sombi bulya mwamupa bulemu abwaami

⁸ akumupa bweendeleshi bwa shintu shoonse.” Twanyuumfwa ayi Lesa wakapa muntu bweendeleshi bwa shintu shoonse. Ici cilaamba ayi taaku cintu citabete mubweendeleshi bwakwe. Nakubi boobo abobulya muntu tatumuboniiwo kweendelesha shintu shoonse.

⁹ Sombi ngotubona nguJesu, uyo wakaceeshekwa kwiinda baanjelo paciindi ciniini, watambula mushini wa bulemu abwaami ceebo ca mapensho ngaakeendaamo ndyaakafwa. Cakaba boobo mukwiinga Lesa muluse lwakwe, wakasuna ayi Jesu afwite bantu boonse.

¹⁰ Cakalinga kweelete kuli Lesa, uyo wakalenga akulama shintu shoonse, ayi kwiinda mumapensho, abike Jesu pamusena wakuleta bana bakwe baanji ayi babe anguwe mubulemu bwakwe. Ceebo nguJesu ubatanjilila kulupulusho.

¹¹ Ulasalasha myoyo ya bantu kuswa kushibiibi shabo alimwi lakwe abaabo basalashikwa, boonse balaba aIshiwabo womwi. Nceceeco Jesu ncaatanyumfwili nsoni kubeeta ayi bamakwabo.

¹² Ceebo wakaamba kuli Lesa ayi, “Ndaakulwiita bamakwesu nshemwakacita. Ndaakumulumbaisha pakati ka libungano lyabo.”

¹³ Wakaamba alimwi ayi, “Ndaakushoma muli Lesa.” Alimwi ayi, “Ndiwaano abaana abo Lesa mbwaakaampa.”

¹⁴ Ono mukwiinga baana aba mbantu bacite mibili alimwi abulowa, alakwe Jesu mwiine wakaba muntu mbuli mbabo. Wakacita boobo kwaamba ayi kwiinda mulufu lwakwe anyonyoole Mubiibi uyo ucite nkusu shakucaya.

¹⁵ Mukucita boobo, wakaangulula baabo boonse bakalinga anga mbasha ceebo cakuloonda lufu.

¹⁶ Cilibwenekete patuba ayi taabikite moyo kubaanjelo, sobwe. Sombi kweelana abwaamba Malembo akwe Lesa ayi, “Moyo wakwe uli kulunyungu lwakwe Abulaamu.”

¹⁷ Nkokwaamba ayi wakaba mbuli bamakwabo munshila shoonse, kwaamba ayi abe Mupailishi wabo Munene, ushomeka alimwi shinkumbu, mukusebensela Lesa ayi shibiibi sha bantu shilekelelwe.

¹⁸ Ono mukwiinga lakwe mwiine wakasunkwa alimwi akupenshekwa, inga wacikonsha kucafwa baabo batoosunkwa.