Amosi 3 - Baibo Busansulushi Bwa Libuku Ili

¹ Nobene Isilaeli amunyumfwe bwaamba Mwaami Lesa pali ndimwe, ee, pali ndimwe noonse nobantu mbwaakakusha mucishi ca Ijipiti.

² Waamba ayi, “Pakati ka mishobo yoonse ya pacishi ca panshi, ndimwebo ndakasala kuba bantu bangu. Paceebo ceeco ndaakumupa mulandu pashibiibi shanu shoonse.”

Mulimo wa mulaluki

³ Sa bantu bobilo baleenda pantu pomwi kabatana kunyumfwana kucita boobo?

⁴ Sa nkalamu ilalila mumasakasaka na keetana kucana cakulya? Sa mweensha keembe ulabuluma mucimfwengo ca njiyo na kaatana kucaya munyama ayi alye?

⁵ Sa kayuni kalacatwa mukoose na taaku wakateya? Sa koose kalafupuka na taaku ceendaawo?

⁶ Na mapeenga ankondo alila mundabala, sa bantu tabatutumi? Na kunyonyooka kwacitika mundabala inene, sa teshi Mwaami Lesa ulengesha boobo?

⁷ Ncakwiila Mwaami Lesa Shinkusu shoonse taaciti cintu, kaatana kuyubulula muyeeyo wakwe kubasebenshi bakwe balaluki.

⁸ Na nkalamu yalila, ngani utakoonshi kuloonda? Na Mwaami Lesa Shinkusu shoonse waamba, ngani weenga wakaka kwaambilisha maswi akwe?

⁹ Amwaambilishe kumalinga a ndabala ya Ashidodi akumalinga akucishi ca Ijipiti ayi, “Amubungane patulundu twa Samaliya. Amubone mapensho ali muli ncico akulyatililana kuli pakati ka bantu ba ncico.”

¹⁰ Mwaami Lesa waamba ayi, “Bantu abo balasusha malinga ashintu shakusaala. Tabacishi kucita shintu shiluleme, napaceyi.”

¹¹ Paceebo ceeco Mwaami Lesa Shinkusu shoonse waamba ayi, “Balwani balaakwisa mukulwana cishi canu. Balaakupwayoola malinga anu ashiyubilo shanu, akusaala shintu shoonse shiliimo.”

¹² Mwaami Lesa waamba ayi, “Bweenka mweembeshi kuswa mukanwa ka nkalamu mbwaapulushakobo mafuwa akumyeendo yobilo ya mbelele nabibo kapansha ka kutwi, mbweeke ubo bene Isilaeli mbweshi bakapulushikwe. Ncakwiila mbweshi bakapulushikwe abo bashiite kweela malo abo muSamaliya ee, abaabo bashiite pashuuna shabo shibotu kuDamasikasi.”

¹³ Mwaami Lesa, Lesa Shinkusu shoonse waamba ayi, “Amukutike maswi aya akupa bukamboni kubamulunyungu lakwe Jakobo.”

¹⁴ Waamba ayi, “Pabushiku ndaakupa mulandu bene Isilaeli ceebo ca shibiibi shabo, ndaakunyonyoola shipaililo sha bene Betelo. Meeca a mumakonko a cipaililo alaakutimbulwa akulokela panshi.

¹⁵ Ndaakumwayulula ŋanda yamupewo akunyonyoola ŋanda yamainsa. Ee, ndaakunyonyoola maanda akaboteshekwa ameeca a nsofu, aalo maanda anene abotu ndaakwaanyonyoola oonse. Nebo neMwaami Lesa ndaamba.”