Amosi 2 - Baibo Busansulushi Bwa Libuku Ili

Shabene Moabu

¹ Mwaami Lesa waamba ayi, “Bene Moabu bakalinga kubisha lyobilo lyobilo, aboobo ndushinisho ndaakubapa mulandu. Balo bakanyansha mafuwa a mwaami wa bene Edomu mukwaatenta kushikila aba milota.

² Ndaakutuma mulilo pacishi ca Moabu, uyo weshi ukatente malinga a ndabala ya Kelyoti. Bene Moabu balaakufwita pakati ka ciyobeyobe ca nkondo, bashilumamba kabalisha mapeenga.

³ Ndaakucaya muleli wa ncico pantu pomwi abacinenenene bakwe. Nebo neMwaami Lesa ndaamba.”

⁴ Mwaami Lesa waamba ayi, “Bene Juda bakalinga kubisha lyobilo lyobilo, aboobo ndushinisho ndaakubapa mulandu. Bakaka kukonkela Milawo yangu nebo neMwaami Lesa akukaka kukonkela milasho yangu. Balesa bakubeca babalengesha kuswa munshila, ee, balesa abo bamashali babo bakulukulu mbobakalinga kukonkela.

⁵ Aboobo ndaakutuma mulilo pacishi ca Juda uyo weshi akanyonyoole malinga a ndabala ya Jelusalemu.”

Bene Isilaeli mbobakapekwa mulandu

⁶ Mwaami Lesa waamba ayi, “Bene Isilaeli bakalinga kubisha lyobilo lyobilo, aboobo ndushinisho ndaakubapa mulandu. Bakoolisha bantu baluleme a Silifa, akushintisha bakandu ankwabilo shobilo.

⁷ Balyatoola mitwi ya bakandu anga batoolyatoola lusuko akulengesha baabo balyatililwa kulitwa masuku pamitwi. Mwaana abaishi balakumanina kumwanakashi womwi. Mukucita boobo balasebaanya liina lyangu.

⁸ Kumisena yakulambililaako yoonse balo baloonabo pashakufwala nshebacatila bakandu ceebo ca nkongole. MuŊanda yangu neLesa balanwitamo waini uyo ngobanyaya baabo bakakweleta kuli mbabo.

⁹ “Nakubi boobo ndakanyonyoola bene Amoli ceebo cabo. Bene Amoli bakalinga balaamfu anga nshisamu sha sida, alimwi bayumu anga njimibanga. Ndakanyonyoola shisepo shabo akunyonyoola miyanda yabo panshi peene.

¹⁰ “Mwebo ndakamukusha mucishi ca Ijipiti akumwiinsha mucishi citacite maanshi kwamyaaka makumi one kwaamba ayi nkamupe cishi ca bene Amoni.

¹¹ Ncakwiila ndakasala balaluki pakati kanu akusala bamwi ayi babe baNasili. Sa te mbocibete ubo mwebo nobene Isilaeli? Nebo neMwaami Lesa ndaamba.

¹² “Sombi mwebo mwakalengesha baNasili kunwa waini alimwi akukasha balaluki kulaluka.

¹³ “Ono ndaakumupwayoola bweenka cikoci mbocipwayoola na calemenwa mancebele.

¹⁴ Beshilubilo teshi bakakonshewo kuloboka. Bashinkusu teshi bakasebenseshe nkusu shabo. Ncakwiila abalo bashilumamba bacibwene kulwana teshi bakafunewo buumi bwabo beene.

¹⁵ Beshimata teshi bakakonshe kwiimikana. Bashilumamba beendaawo lubilo teshi bakaciceewo, napaceyi. Ncakwiila abeshimaaki teshi bakafunewo buumi bwabo.

¹⁶ Ee, nabi bashilumamba batacite boowa mukulwana, balaakucica matakosha pabushiku ubo. Nebo neMwaami Lesa ndaamba.”