2 Samwelo 23 - Baibo Busansulushi Bwa Libuku Ili

Maswi akweelaako akwe Defedi

¹ Ono aya ngamaswi akweelaako akwe Defedi. Ngamaswi abulaluki akwe Defedi mwanaakwe Jese, maswi a muntu wakasumpulwa kuMwaami Lesa Wiindaawo, musankwa uyo Lesa wakwe Jakobo ngwaakasala kuba mwaami. Ncakwiila uyo shikwiimba nyimbo shibotu wa bene Isilaeli.

² “Mushimu wa Mwaami Lesa ulaamba muli ndime, maswi akwe ncakwiila ngaaswa mumulomo wangu.

³ Lesa wa bene Isilaeli waamba, Mwaandami wa bene Isilaeli wandwiita ayi, ‘Mwaami weendelesha bantu mubululami, uyo weendelesha cakuloonda Lesa,

⁴ ulabala anga ngumumuni wa macuunsa, ee, mumuni wa macuunsa ndikubula makumbi. Uli anga ngumumuni umenesha bwiisu imfula ndyeemana kuloka.’

⁵ “Mboboobo Lesa mbweshi akape coolwe bamulunyungu lwangu. Mukwiinga wakapanga cipangano camuyayaya anebo, cililamitwe kabotu alimwi cilaakunoolikobo. Ono nceceecobo nceensunishi, ndolupulusho lwangu, alimwi ndishi kwaamba ayi Lesa ulaakucita ubo.

⁶ Sombi bakunsengwe boonse bali anga njimyuumfwa iwaalwa kulubasu, myuumfwa iyo muntu njaatakoonshi kucata kali maansabo.

⁷ Sombi ulyeelete kusebensesha lisumo nabi cinshimbi cimwi, ncakwiila ilatentwa peenka apo mpweenga keebete.”

Bashilumamba bakwe Defedi bakalinga kupukite

⁸ Ono ngaaya meena a bashilumamba bakwe Defedi bakalinga kupukite. Kwakalinga Joshebu Basishebeti mwine Takemoni, mutanjilili wa “Bashilumamba Botatwe Bapukite.” Musankwa uyo wakalwana bantu bali 800 akubacaya boonse kulisumo munkondo yomwi.

⁹ Wakalinga kumukonkela nguEliyasa mwanaakwe Dodayi mwine Aowa. Alakwe wakalinga womwi wa “Bashilumamba Botatwe Bapukite.” Wakalinga aDefedi ndyaakasumuna bene Filisiti abo bakalinga kubungene kuPasi Damimu ayi balwane. Ciindi ico bashilumamba bene Isilaeli bamwi boonse kabali bamana kucica.

¹⁰ Sombi lakwe wakeemikana akulwana bene Filisiti abo, wabacaya kushikila lyaansa lyakwe lyacatwa cifwe cakwaalilwa kuleka mupeeni. Bushiku ubo Mwaami Lesa wakalengesha bene Isilaeli kukoma cikankamika. Lyalo bashilumamba bakaboola kwakalinga Eliyasa akusaala baabo bakacaikwa.

¹¹ Wakalinga kukonkela Eliyasa pakati ka “Bashilumamba Botatwe Bapukite” nguShama mwanaakwe Agi mwine Aalali. Bene Filisiti ndibakabungana kuLeyi uko kwakalinga muunda wa nyangu, bashilumamba ba bene Isilaeli bamwi boonse bakacica bene Filisiti abo.

¹² Sombi Shama lakwe wakeemikana pakati ka muunda akuufuna. Wakacaya bene Filisiti baanji ceebo Mwaami Lesa wakamulengesha kukoma cikankamika.

¹³ Bumwi bushiku, muciindi cakutebula basankwa botatwe pakati ka “Bashilumamba Makumi Otatwe Bapukite,” bakaya kucimfwengo ca kuAdulamu uko kwakalinga Defedi. Ciindi ico likoto lya bashilumamba ba bene Filisiti kabali bayaka misumba muCinyika ca Lefaimu.

¹⁴ Paciindi ico Defedi wakalinga mucimfwengo alyalo likoto lya bashilumamba ba bene Filisiti lishikushinkila lyakalinga kuBetileemu.

¹⁵ Ono Defedi wakafwa nyotwa akwaamba ayi, “Kubota muntu waya wakuletelawo maanshi akunwa kumukalo uli kufwaafwi amwinjililo wa ndabala ya Betileemu.”

¹⁶ Mpomunyaawo bashilumamba bakalinga kupukite botatwe abo bakaya bapalanganya beshikushinkila bene Filisiti. Lyalo bakateka maanshi kufwaafwi amwinjililo wa ndabala ya Betileemu akwaatola kuli nguwe. Nakubi boobo Defedi taakwe kwaanwa, sombi wakaatila panshi mukulemeka Mwaami Lesa.

¹⁷ Wakaamba ayi, “NoBaami baLesa, cintu ca mushobo uyu nsheelete kucicita napaceyi. Bantu aba beensha buumi bwabo mumaansa kuya mukuteka maanshi aya aboobo inga caba anga ntoonwa bulowa bwabo.” Munshila iyo wakakaka kunwa maanshi ayo. Shamushobo uyo nsheshintu bashilumamba bakalinga kupukite botatwe abo nshebakacita mukubula boowa.

¹⁸ Ono Abishayi mukwabo Joabu mwanaakwe Seluiya, lakwe wakalinga mutanjilili wa baabo bakalinga kwiitwa ayi Makumi Otatwe. Wakalwana basankwa bali 300 akubacaya alisumo. Paceebo ceeco alakwe wakapuka pakati ka “Bashilumamba Makumi Otatwe Bapukite.”

¹⁹ Nakubi kwaamba ayi taakalinga kucite bulemu bweelene abwa “Bashilumamba Botatwe Bapukite,” wakalinga kulemekwa kwiinda “Bashilumamba Makumi Otatwe Bapukite” alimwi wakaba mutanjilili wabo.

²⁰ Musankwa umwi wakalinga kupukite nguBenaya wa kuKabusiili mwanaakwe Jeoiyada. Musankwa uyo wakacita milimo iinji itondesha kubula boowa kwakwe. Benaya wakacaya bashilumamba beene beene bobilo ba bene Moabu. Bumwi bushiku kakuli caandwa wakenjila mucikanda akucaya nkalamu.

²¹ Musankwa eenka uyo wakacaya mwine Ijipiti mulaamfu alimwi ushimpite uyo wakalinga kucite alisumo. Benaya wakaya wamulwana kaacitebo nkoli. Pakulwana wakamusompola lisumo lyakwe ilyo akumucaishaako mwiine.

²² Iyi njemilimo itondesha kubula boowa yakacita Benaya mwanaakwe Jeoiyada womwi wa “Bashilumamba Makumi Otatwe Bapukite.”

²³ Wakalinga kupukite abuumbi pakati ka “Bashilumamba Makumi Otatwe Bapukite,” nakubi kwaamba ayi taakalinga kucite bulemu bweelene abwa “Bashilumamba Botatwe Bapukite.” Mwaami Defedi wakamupa bunene pakati ka beshikumulindilila.

²⁴ Ono “paBashilumamba Makumi Otatwe Bapukite” pakalinga Asayelo mukwabo Joabu, Eloanani mwanaakwe Dodo wa kuBetileemu,

²⁵ Shama mwine Alodi, Elika mwine Alodi,

²⁶ Elesi mwine Peleti, Ila mwanaakwe Ikeshi mwine Tekowa,

²⁷ Abiyesa wa kuAnatoti, Mebunayi mwine Usha,

²⁸ Salimoni mwine Aowa, Maalayi wa kuNetofa,

²⁹ Elebu mwanaakwe Baana wa kuNetofa, Itayi mwanaakwe Libayi wa kuGibiya mucishi cakwe Benjameni,

³⁰ Benaya mwine Pilatoni, Idayi wa kushinyika sha Gaashi,

³¹ Abiyaliboni mwine Alaba, Asimafeti wa kuBayulimu,

³² Eliyaba mwine Shaaluboni, bana bakwe Jasheni, Jonasani,

³³ mwanaakwe Shama mwine Ala, Aiyamu mwanaakwe Shala mwine Ala,

³⁴ Elifeleti mwanaakwe Aasibayi wa kuMaaka, Eliyamu mwanaakwe Aitofelo wa kuGilo,

³⁵ Esilo mwine Kamelo, Palayi mwine Alabu,

³⁶ Igali mwanaakwe Natani wa kuSoba, Bani mwine Gadi,

³⁷ Seleki mwine Amoni, Naalayi mwine Biyaloti shikunyamwita Joabu mwanaakwe Seluiya shakulwanisha,

³⁸ Ila mwine Jatiya, Galebu mwine Jatiya,

³⁹ alimwi aUliya mwine Iti. Boonse pantu pomwi bakalinga 37.