2 Samwelo 15 - Baibo Busansulushi Bwa Libuku Ili

Abusalomu mbwaakabukila Defedi

¹ Mukuya kwaciindi Abusalomu wakalibambila cikoci cakweendelaamo amaaki pantu pomwi abashilumamba bali makumi osanwe bakweendaabo.

² Lyalo wakalinga kucita wabuka macuunsa akuya mukwiimikana kweelanshila kumwinjililo wa ndabala inene. Ono kulilabo na muntu uli woonse ucite litongooshi lyakutola kumwaami ayi apingule wesa, Abusalomu wakalinga kumwiipusha ayi, “Ino waswa kundabalanshi? Mpeeke na muntu uyo waamba kumukowa wa bene Isilaeli nkwaaswa,

³ Abusalomu wakalinga kumulwiita ayi litongooshi lyako lilibo kabotu kweendelana amilawo. Sombi cabicabo taaku shikwiimikanina mwaami weenga walinyumfwa.”

⁴ Lyalo wakalinga kwiilikaawo ayi, “Nebo nindakasalwabo kuba moomboloshi mucishi cino, woonse ucite litongooshi nabi mulandu naakwiinga ulesa kuli ndime alimwi nindalinga kubona kwaamba ayi woomboloshekwa cabululami.”

⁵ Mpeeke kulilabo na muntu wesa ayi afukame mukumulemeka bulemu, Abusalomu wakalinga kutandabika maansaakwe, wamukumbata akumufyonta.

⁶ Abusalomu wakalinga kucita bweenka ubo kumwine Isilaeli uli woonse wakalinga kwisa alitongooshi lyakuyanda mwaami ayi apingule mukululama. Munshila iyo bene Isilaeli baanji bakamukonkela.

⁷ Ono ndipakeenda myaaka yone, Abusalomu wakalwiita mwaami ayi, “Amunsuminishe nje kuEbuloni nkacite kweelana ambondakashomesha cakulumbila kuMwaami Lesa.

⁸ Ndindakalinga kwikala kuGeshuli mucishi ca Silya nebo nemusebenshi wanu ndakashomesha cakulumbila ayi, ‘Na noBaami baLesa mukambooshe kuJelusalemu, ndaakumulambila muEbuloni.’ ”

⁹ Mwaami Defedi wakakumbula ayi, “Weendebo kabotu.” Lyalo wakanyamuka akuya kuEbuloni.

¹⁰ Ono Abusalomu wakatuma beshinkombe cabushishi mumikowa yoonse ya bene Isilaeli ayi babaambile ayi, “Mwaakunyumfwabo mapeenga alila, mukaambe ayi, ‘Abusalomu ngumwaami muEbuloni.’ ”

¹¹ Mpeeke basankwa bali myaanda yobilo bakayaakwe kuswa muJelusalemu. Taaku ncebakalinga kwishi ceebo balo bakatambwabo kuba beensu bakwe.

¹² Lyalo Abusalomu ndyaakalinga kubenga milambu, wakatumina nkombe Ayitofelo, shikupandako maano Defedi, ayi alakwe ese kuswa kuGilo, ndabala ine mishaabo. Munshila iyo miyeeyo yakwe Abusalomu yakubukila bwaami yakalinga kuya cishimpa, abalo beshikumukonkela bakalinga kuya cifula.

Defedi mbwaakaloboka kuswa kuJelusalemu

¹³ Ono shinkombe umwi wakesa kuli Defedi akuluula ayi, “Bene Isilaeli bamwi boonse bakashomesha kukonkela Abusalomu.”

¹⁴ Mpeeke Defedi wakaambila bacinenenene bakwe boonse mbwaakalingaabo muJelusalemu ayi, “Tulyeelete kuloboka bulya bweenka kwaamba ayi Abusalomu atatucaniiko. Atweendeshe mukwiinga inga washika coonoono mukukoma akucaya bali mundabala inene ino boonse.”

¹⁵ Bacinenenene ba mwaami abo bakakumbula ayi, “Swebo sobasebenshi banu tulisuminite kucita cili coonse mwebo nobaami nceenga mwayanda.”

¹⁶ Mpomunyaawo mwaami wakanyamuka abamuŋanda yakwe boonse bakamukonkela. Sombi wakashiya bakasuwa bali likumi ayi banoolama ŋanda ya bwaami.

¹⁷ Munshila iyo mwaami mbwaakanyamuka abantu abo boonse kabaya cimukonkela. Ingayi bashike kuŋanda yakweelaako, bakeemikana.

¹⁸ Bacinenenene bakwe boonse bakamwiindilila pantu pomwi abeshikulindilila ba kubwalo. Bene Giti bali 600 abo bakamukonkela kuswa kuGati, abalo bakeenda pafwaafwi anguwe.

¹⁹ Mpeeke mwaami wakaambila Itayi mutanjilili wa bene Giti ayi, “Ino webo watukonkelelanshi? Boolela ukekaale aAbusalomu mwaami mupya ulya. Webo uli muswamashi alimwi kuno wakalobokelakobo kuswa kucishi cine mishaanu ayi ufunwe.

²⁰ Bona ndicilo mabalabo ndiwakesa. Ono utooyeeya kwaamba ayi alimwi sunu inga ndakulengesha kuya ciingooka aswebo? Nebo nshibwene ankoontooya. Boolela pantu pomwi abene mishaanu. Ndaseenga ayi nkuumbu sha Mwaami Lesa shibe awebo alimwi ayi ashomeke kuli ndiwe.”

²¹ Sombi Itayi wakakumbula mwaami Defedi ayi, “Bweenka mbocibete lushinisho ayi Mwaami Lesa ngumuumi, alimwi ayi mwebo nkambo nobaami bangu muli boomi, ncakwiila anebo nemusebenshi wanu ntooya kuli koonse mwebo nkambo nobaami bangu nkweshi muye nacibi kwaamba ayi cilaamba buumi nabi lufu.”

²² Mpomunyaawo Defedi wakaambila Itayi ayi, “Ncibotu! Anu inda unooya kunembo.” Lyalo Itayi mwine Giti wakatolelela lweendo ulo pantu pomwi abashilumamba bakwe alimwi abamumaanda abo mbwaakalingaabo.

²³ Mpeeke bantu bamumishi bakalila cakooloma ndibakabona mwaami abantu bakwe kabainda. Kuswawaawo mwaami Defedi wakasubuka cinyika ca Kidiloni pantu pomwi abantu boonse abo akululama kuluyanga.

²⁴ Alakwe Sadoki wakalingaawo abene Lefi boonse abo bakalinga kunyamwite Libokoshi lya Cipangano ca Mwaami Lesa. Mpeeke bakatula Libokoshi ilyo panshi kushikila bantu boonse bamana kuswa mundabala inene ya Jelusalemu. Alakwe Abyata wakalingaawo.

²⁵ Kuswawaawo mwaami Defedi wakaambila Sadoki ayi, “Amubooshe Libokoshi lya Cipangano ca Mwaami Lesa kundabala inene ya Jelusalemu. Na Mwaami Lesa akanyumfwile nkumbu ulaakumboosha ayi nkaliboone alimwi, pantu pomwi amusena uyo molikala.

²⁶ Sombi na akaambe ayi, ‘Nshikondetwe pali nguwe,’ nebo ndilibambite kwaamba ayi akanciite cili coonse ncaasuni.”

²⁷ Mpomunyaawo wakaambila Sadoki mupailishi alimwi ayi, “Boolela kundabala inene muluumuno pantu pomwi aAyimaasi mwanaako musankwa alimwi aJonasani mwanaakwe Abyata. Mwebo nobilo aAbyata kamuya abana banu basankwa bobilo abo.

²⁸ Nebo ndanoolindila pashito shisubukilwaawo mulonga kushikila nkatambule maswi akunshibisha ayo eshi akaswe kuli ndimwe.”

²⁹ Mpeeke Sadoki aAbyata bakaboosha Libokoshi lya Cipangano ca Mwaami Lesa kuJelusalemu akwikala.

³⁰ Defedi wakatolelela lweendo lwakwe akutanta Kalundu ka Olifi kaaya cilila buumpute. Paciindi ico wakalinga kulifwekete kumutwi alimwi kaali myeendobo. Abalo bamwi boonse bakalifweka kumitwi yabo akunooya cilila buumpute pakutanta kalundu ako.

³¹ Ono Defedi wakalwiitikwa ayi pabaabo batookonkela aAbusalomu, Ayitofelo alakwe mpwaali. Mpomunyaawo Defedi wakapaila ayi, “NoBaami baLesa amumunyaaye busongo bwakupanda maano kwaamba ayi anokwaambabo shifwite.”

³² Defedi ndyaakashika peculu apo pakalinga musena Lesa mpwaakalinga kulambililwa, bakakumana aUshayi mwine Aki kaafwete shakufwala shakakwamoonwa alimwi kaalibikite lusuko pamutwi.

³³ Mpeeke Defedi wakamwaambila ayi, “Na tuye soonse, utoompa ncito.

³⁴ Sombi na waboolela kundabala inene akulwiita Abusalomu ayi, ‘Aambe musebenshi wanu nobaami. Kalekale ndakalinga musebenshi wa baishiwanu, ono bulya aambe musebenshi wanu.’ Munshila iyo inga wancaafwa kwiinda mukunoofulunganya sheesho Ayitofelo nsheenga kaalwiita mwaami.

³⁵ Cabota ncakwaamba ayi Sadoki aAbyata bapailishi nkobali kweenka uko. Inga koobalwiita cili coonse nceenga wanyuumfwa kuŋanda ya bwaami.

³⁶ Abalo bana babo basankwa, Ayimaasi mwanaakwe Sadoki aJonasani mwanaakwe Abyata, bali abo kweenka uko. Inga wabatuma kuleta makani ali oonse ngweenga wanyuumfwa.”

³⁷ Lyalo Ushayi mubye Defedi wakaya washika muJelusalemu Abusalomu ndyaakalinga kwinjilabo mundabala inene iyo.