2 Makani 6 - Baibo Busansulushi Bwa Libuku Ili

Solomoni mbwaakaamba kubantu

¹ Lyalo Solomoni wakapaila ayi, “NoBaami baLesa, mwakaamba ayi munanooli mulikumbi lishiya.

² Ono ndayaka Ŋanda yanu ibotu abuumbi, musena uyo ngomweelete kwikalaamo kwamuyayaya.”

³ Bantu ndibakalinga kwiimfwi, mwaami Solomoni wakasanduluka walanga nkobakalinga kubete. Mpeeke wakabasengela shoolwe kuswa kuli Lesa.

⁴ Wakaamba ayi, “Aalumbaishikwe Mwaami Lesa, Lesa wa bene Isilaeli! Wacita kweelana ambwaakashomesha bata baDefedi ndyaakaamba ayi,

⁵ ‘Kuswa bushiku ndindakakusha bantu bangu muIjipiti, nshina kusalaawo ndabala imwi mucishi coonse ca Isilaeli umo mweenga mwayakilwa ŋanda yangu ayi munoonambililaamo alimwi nshikwe kusalaawo umwi ayi anoolela bantu bangu bene Isilaeli.

⁶ Sombi ono ndasala ndabala ya Jelusalemu kwaamba ayi ibe musena mweshi noolambililwa alimwi ndakasalabo ndiwe Defedi kwaamba ayi ube muleli wa bantu bangu.’ ”

⁷ Solomoni wakatolelela akwaamba ayi, “Bata baDefedi bakalinga babamba muyeeyo wakuyaka Ŋanda yakwe Lesa yakulambililaamo Mwaami Lesa, Lesa wa bene Isilaeli.

⁸ Sombi Mwaami Lesa wakaambila bata ayi, ‘Wakalulika kubamba muyeeyo wakunjakila ŋanda,

⁹ nakubi boobo teshi ukeeyaake webo. Mwanaako, ee, mwaana wakushala omwiine, ngweshi akayake Ŋanda yangu iyo.’

¹⁰ “Mboobulya ono Mwaami Lesa wakacita kweelana ambwaakashomesha. Ndakapyana bwaami bwa bata baDefedi pabene Isilaeli alimwi ndakayaka ŋanda yakulambililaamo Mwaami Lesa, Lesa wa bene Isilaeli.

¹¹ MuŊanda yakwe Lesa ndabikaamo Libokoshi lya Cipangano, umo muli mabwe apampamene a cipangano cakapanga Mwaami Lesa abene Isilaeli.”

Mupailo wakwe Solomoni

¹² Mpeeke bantu boonse kababweneeko, Solomoni wakaya weemikana kunembo lya cipaililo akunyamuna maansa.

¹³ Ono Solomoni wakalinga kupangite kale cakwiimikanawo ca bulonse cakalinga mamita ali 2.2 mumbasu shoonse alimwi amamita ali 1.3 kuya mwiculu. Wakacibika pakati napakati ka lubansa lwa Ŋanda yakwe Lesa. Lyalo wakatanta pacakwiimikanaawo ico, wafukama pameenso a bantu boonse akutambika maansaakwe kwiculu.

¹⁴ Mpeeke wakapaila ayi, “NoBaami baLesa, baLesa ba bene Isilaeli, taaku lesa uli mbuli ndimwe mwiculu nabi pacishi ca panshi! Mwebo mulacita kweelana acipangano ncemwapanga abantu banu, akubabonesha lusuno lwanu na bekala mukunyumfwila ndimwe camoyo woonse.

¹⁵ Mwakacita kweelana ambomwakashomesha bata baDefedi basebenshi banu. Sunu makani oonse ngomwakashomesha acitika cancinencine.

¹⁶ Ono bulya noBaami baLesa, baLesa ba bene Isilaeli, ndaseenga kwaamba ayi mucite acalo cimwi cilya ncemwakashomesha bata ndimwakabaambila ayi bamaami ba bene Isilaeli lyoonse bananooli bamulunyungu lwabo kulilabo na kabamunyumfwila cakukonkotanya mbweeke mbobakalinga kucita balo.

¹⁷ Mbweeke ubo nobaLesa ba bene Isilaeli, amushicite cancinencine shoonse isho nshemwakashomesha bata baDefedi basebenshi banu.

¹⁸ “Ono sa cilaamba ayi mwebo nobaLesa ndushinisho inga mwekala mucishi ca panshi pakati ka bantu? Sobwe, nabibo liculu lyaceyabo kulaale kwaamba ayi mwebo mukonshe kwikalaamo. Ino ono ŋanda njendamuyakila yakomena cabuyani kwaamba ayi mwebo mwikaaleemo?

¹⁹ NoBaami baLesa, baLesa bangu, nebo ndi musebenshi wanu. Amunyumfwe mupailo wangu akusuminisha ncentoosenga sunu.

²⁰ Kamulama Ŋanda yanu iyi mashiku amalumwi ceebo mwakashomesha ayi mumusena uyu mweshi mukanoolambililwa. Kamunyumfwila na ndalanga kuŋanda yanu pakupaila.

²¹ Kamunyumfwila mipailo yangu aya bantu banu bene Isilaeli na balanga kuŊanda yanu pakupaila. Amutukutike kwiculu uko nkomwikala akutulekelela shibiibi shesu.

²² “Na muntu wabekeshekwa ayi wabishila mubye akuletwa kucipaililo canu muŊanda yanu muno mukushomesha cakulumbila ayi taacite mulandu,

²³ noBaami baLesa, amunyumfwe kwiculu uko akoombolosha basebenshi banu. Amupe mulandu uyo ulubite kweelana ambwaaelete akuleka wooyo utacite mulandu.

²⁴ “Na bantu banu bene Isilaeli bakomwa kubalwani mukwiinga bamubishisha, ono besa kuli ndimwe mukumulambila muŊanda yanu akupaila cakulibombya ayi mubalekelele,

²⁵ amubanyumfwile uko kwiculu. Amulekelele shibiibi sha bantu banu, akubaboosha mucishi ico ncemwakapa bamashali besu bakulukulu.

²⁶ “Na mfuula mweecata ceebo bantu banu bamubishisha, ono na basanduka kuswa kushibiibi shabo akulanga kuŊanda yanu alimwi bapaila cakulibombya kuli ndimwe,

²⁷ amubakutike uko kwiculu. Amulekelele shibiibi sha mwaami asha bantu banu bene Isilaeli. Amubaiishe kucita shiluleme. Lyalo, noBaami baLesa amutume mfula mucishi canu ico ncemwakapa bantu banu ayi ncabo kwalyoonse alyoonse.

²⁸ “Na muli nsala mucishi, mwaalu, nabi shishango shayuma kumuuwo ulungula na kulikwa kucisoshi, na bantu banu balwanikwa kubalwani babo, nabi na kwaba malwashi apusenepusene pakati kabo,

²⁹ amukutike mipailo yabo. Na bamwi pakati ka bantu banu bene Isilaeli, kwiinda mukupya myoyo, batandabika maansa kulansha kuŊanda yanu pakupaila,

³⁰ amukutike mipailo yabo. Amubakutike kwiculu uko nkomwikala, mubalekelele alimwi akubacafwa. Mwebo nweenka ndimwe mwishi miyeeyo ya bantu. Amucitile muntu womwi awomwi mbuli mbwaaelete

³¹ kwaamba ayi bantu banu banoomunyumfwila lyoonse ndibekala mucishi ico ncemwakapa bamashali besu bakulukulu.

³² “Na muswamashi uyo ukala kucishi cakulaale wanyumfwa impuwo yanu ya shintu shinene isho nshemwakacita kubantu banu, ono wesa mukulambila muŊanda yanu,

³³ amukutike mipailo yakwe. Amumukutike kwiculu uko nkomwikala akucita sheesho nshaasenga kwaamba ayi bantu bamucishi ca panshi bamwishiibe akunoomunyumfwila bweenka mbuli bene Isilaeli mbobacita. Lyalo balaakwishiba ayi Ŋanda yanu iyi njendakayaka ngomusena uko mwebo nkomweelete kulambililwa.

³⁴ “Na mwaambila bantu banu kuya mukulwana balwani babo, na kuli koonse nkweenga kababete bapaila kuli ndimwe, kabalangite ndabala inene iyi njemwakasala, aŊanda yanu njendakamuyakila,

³⁵ amukutike mipailo yabo. Amubakutike kwiculu uko akubalengesha kukoma.

³⁶ “Ono na bantu banu bamubishisha ceebo taaku muntu nabi womwi utabishi, lyalo mubukali bwanu mwalengesha ayi bakomwe akutolwa busha kucishi cimwi, nabi cishi ico kacili kulaale,

³⁷ amukutike mipailo ya bantu banu. Na kucishi uko kweenka nkweenga kababete basanduka kuswa kushibiibi shabo akupaila kuli ndimwe, kabalyaambilila shibiibi shabo shoonse, noBaami baLesa amukutike mipailo yabo.

³⁸ Na basanduka camoyo woonse kuswa kushibiibi shabo mucishi ico cabusha akupaila kabalangite kucishi cino ncemwakapa bamashali besu bakulukulu, ndabala ino njemwakasala alimwi aŊanda yanu iyo njendakamuyakila,

³⁹ amukutike mipailo yabo. Amubakutike kwiculu uko nkomwikala akubanyumfwila nkumbu akulekelela shibiibi sha bantu banu shoonse.

⁴⁰ “Ono noBaami baLesa, mutuboone akuteya amatwi anu kumipailo iyo njetupaila mumusena uyu.

⁴¹ “NoBaami baLesa, ono amunyamuke mwise kuŊanda yanu akwikalaamo kwalyoonse alyoonse pantu pomwi aLibokoshi lyanu lya Cipangano citondesho ca nkusu shanu. NoBaami baLesa, bapailishi banu ababe ankusu shakutanjilila bantu kulupulusho ayi bantu banu basangalale mububotu bwanu.

⁴² NoBaami baLesa, mutakaki mwaami ngomwakananika. Amwiibaluke lusuno lunene ndomwakalinga kucite pali Defedi musebenshi wanu.”