2 Makani 3 - Baibo Busansulushi Bwa Libuku Ili

¹ Lyalo Solomoni wakatalika kuyaka Ŋanda ya Mwaami Lesa muJelusalemu paKalundu ka Moliya kumusena uko Mwaami Lesa nkwaakabonekela Defedi baishi. Pakalinga palubansa lwakulupwitaawo lwakwe Alauna mwine Jebusi musena uyo Defedi ngwaakasala.

² Wakatalika kuyaka pabushiku bwabili, mumweenshi wabili, mumwaaka wane wa bwaami bwakwe.

³ Ŋanda yakwe Lesa iyo mwaami Solomoni njaakayaka yakalinga mamita ali 27 mubulaamfu, mamita ali 9 mubufwaafwi.

⁴ Cipinda cakwinjililaako cakalinga kweelene aŊanda yakwe Lesa, nkokwaamba ayi mamita ali 9 mubufwaafwi, mamita ali 54 kuya mwiculu. Lubumbu lwa mukati mucipinda ico bakalushingula golodi wiine wiine.

⁵ Kulubumbu lwa cipinda cinene bayalaako tupulanga twa sida akutunanika golodi wiine wiine. Bakatubotesha kwiinda mukutalaamo tupukupuku alimwi ancetani.

⁶ Mwaami wakabotesha Ŋanda yakwe Lesa amabwe abotu amakwebo alimwi agolodi yakoolwa kuPafayimu.

⁷ Mpeeke wakananika golodi kumitanti, kushisamu sha kumilyango, kulubumbu akushisasa sha Ŋanda yakwe Lesa akubesa bakelebu kulubumbu.

⁸ Cipinda ca mukati ico ciitwa ayi Musena Usalalite Wiindaawo cakalinga mamita ali 9 mumbasu shoonse. Cakalinga kweelenebo aŊanda yakwe Lesa mubufwaafwi. Golodi njebakasebensesha kushingula lubumbu yakalinga makilogilamu ali 20,000 akwiindilila.

⁹ Kupanga misomali bakasebensesha magilamu a golodi ali 570. Ashalo mumbu sha shipinda sha peculu bakashingula agolodi.

¹⁰ Mukati ka Musena Usalalite Wiindaawo wakapangilamo bakelebu bobilo akubananika golodi.

^11-13 Bakelebu abo bakalinga kwiimfwi lubamba kabalangite kumulyango. Womwi awomwi wakalinga kucite mapapaminwa. Lipapaminwa lyomwi alyomwi lyakalinga kulaampa mamita ali 2.2. Mapapaminwa ayo akalinga kufungulukite cakwaamba ayi akalinga kukumanina pakati ka cipinda akuya mukushika kulubumbu lwa cipinda, nkokwaamba ayi akalinga kufungulukite cakukwana mamita ali 9.

¹⁴ Bakatunga cisani cakushitilisha citeshimite cibotu ca kuMusena Usalalite Wiindaawo, citungitwe abooya bwa mbelele buboneka anga ndiculu, bufubelafubela alimwi abusalalabo pyu. Bakatungilaawo bakelebu.

Macinko a bulonse obilo

¹⁵ Mwaami wakapanga macinko obilo. Licinko lyomwi alyomwi lyakalinga kulaampa mamita ali 15.5. Macinko ayo wakaabika kunembo lya Ŋanda yakwe Lesa. Palicinko lyomwi alyomwi bakapangilaawo citwi cakalinga kulaampa mamita ali 2.2.

¹⁶ Peculu lya macinko wakapangilaawo ncetani isho shakooswa caandaŋombe pantu pomwi amwaanda wa mapomegilaneti mukushibotesha.

¹⁷ Macinko obilo ayo akabikwa kunembo lya mwinjililo wa Ŋanda yakwe Lesa. Ilyo lyakalinga kumalenge wakalitumba ayi Jakini, lyakalinga kumatwa wakalitumba ayi Bowasi.