2 Makani 23 - Baibo Busansulushi Bwa Libuku Ili

Ataliya mbobakamubukila

¹ Mumwaaka wasanu ayobilo Jeoiyada mupailishi wakayumya moyo. Mpeeke wakapanga cipangano abamatanjilili ba bashilumamba bali mwaanda. Meena abo ngaaya: Asaliya mwanaakwe Jeloamu, Ishimaeli mwanaakwe Jeowanani, Asaliya mwanaakwe Obedi, Maaseiya mwanaakwe Adaya alimwi aElishafati mwanaakwe Sikili.

² Mpomunyaawo bakaya mucishi coonse ca Juda akuleta bene Lefi abamatanjilili ba shipani sha bene Isilaeli kuJelusalemu.

³ Boonse bakabungana kuŊanda yakwe Lesa. Lyalo bakapanga cipangano aJoashi. Mpomunyaawo Jeoiyada wakabaambila ayi, “Anooyu mwanaamwaami mulobe! Ono ngweshi abe mwaami bweenka Mwaami Lesa mbwaakashomesha pabamulunyungu lwa mwaami Defedi.

⁴ Mbulya mbomweelete kucita nobapailishi abene Lefi. Na mukese kuncito pabushiku bwakookesha bwa Cibelu, mukalibaanye mumakoto otatwe. Likoto lyomwi likalaame minjililo ya kuŊanda yakwe Lesa.

⁵ Lyabili likalaame ŋanda ya bwaami alyalo lyatatu likalaame Mwinjililo wa Tuntupu. Bantu bamwi boonse balyeelete kubungana mumansa sha Ŋanda yakwe Lesa.

⁶ Taaku umwi weshi akenjile mushipinda sha Ŋanda yakwe Lesa kukushakobo bapailishi abene Lefi abo beshi bakanooli pabulishi. Balo inga benjila mukwiinga basalashikwa, sombi bantu bamwi boonse balyeelete kukonkela milasho ya Mwaami Lesa akwikala pansengwe.

⁷ Bene Lefi balyeelete kulama mwaami Joashi cakunoomushingulukite amipeeni keeli mumaansa. Balyeelete kunooli akwe pafwaafwi cakutamushiila musena. Woonse weshi akenjile muŊanda yakwe Lesa, ngwakucayabo.”

⁸ Lyalo bene Lefi abene Juda boonse bakacita kweelana amilasho yakwe Jeoiyada. Bantu abo bakakomboka pabushiku bwa Cibelu tabakwe kupalanganishikwa ayi baye kumishaabo, nkokwaamba ayi mutanjilili wa bulishi womwi awomwi wakalinga abaabo bakalinga pabulishi alimwi abaabo bakakomboka.

⁹ Mpomunyaawo Jeoiyada wakapa bamatanjilili masumo amayawo shakalinga sha mwaami Defedi isho shakalinga kulaminwa muŊanda yakwe Lesa.

¹⁰ Beshikulindilila bakeemikana kushinguluka mwaami, womwi awomwi amupeeni mulyaansa lyakwe pafwaafwi acipaililo alimwi aŊanda yakwe Lesa kuswa kulubasu lwakumalenge kuya mukushika akulubasu lwakumatwa.

¹¹ Lyalo Jeoiyada wakakusha Joashi, wamufwalika mushini wa bwaami kumutwi. Lyalo wakamupa pakalembwa milawo ya bwaami. Munshila iyo wakaba mwaami. Jeoiyada mupailishi pantu pomwi abana bakwe basankwa bakananika Joashi mafuta a bwaami. Mpeeke bantu boonse bakoolobesha ayi, “Mwaami kaabukila buumi!”

¹² Ataliya ndyaakanyumfwa ciyobeyobe ca bantu bakalinga kucica akusekelela mwaami, wakaya lubilo kuŊanda yakwe Lesa uko kwakalinga kubungene bantu.

¹³ Ndyaakashika, wakacana mwaami mupya uliimfwi kulicinko pamwinjililo wa Ŋanda yakwe Lesa kweelana akwishibila kwabo. Wakalinga kushingulukitwe abamatanjilili alimwi abeshikulisha mapeenga. Bantu boonse bakalinga koolobesha cakusangalala akulisha mapeenga. Mpomunyaawo Ataliya wakakwamoona shakufwala shakwe akwaamba ayi, “Bambukila! Bambukila!”

¹⁴ Jeoiyada mupailishi taakalinga kusuni kwaamba ayi Ataliya acailwe muŊanda yakwe Lesa. Aboobo wakaambila bamatanjilili ba beshikulindilila ayi, “Amumutole pansengwe pakati ka mindando ya beshikulindilila. Ono mucaye muntu uli woonse weshi amukonkele.”

¹⁵ Bakamucata, bamutola kuŋanda ya bwaami akumucaila kuMwinjililo wa Maaki.

Jeoiyada mbwaakasandula shintu

¹⁶ Kuswawaawo Jeoiyada mupailishi wakaambila mwaami Joashi kwaamba ayi bantu boonse bacatane mukupanga cipangano kwaamba ayi babe bantu ba Mwaami Lesa.

¹⁷ Lyalo boonse bakaya kuŋanda yakwe Baali kuya mukwiimwayoola. Bakapwayoola shipaililo alimwi ashibumbwabumbwa akucaya Matani mupailishi wakwe Baali kunembo lya shipaililo isho.

¹⁸ Mpomunyaawo Jeoiyada wakasala bapailishi abene Lefi ayi banokweendelesha milimo ya muŊanda yakwe Lesa. Bantu abo bakalinga kucita milimo iyo yakabapa mwaami Defedi alimwi akubenga milambu yakutenta kuMwaami Lesa kweelana aMilawo njaakapa Mose. Bakalinga kweendelesha abwiimbi alimwi ashakusekelela.

¹⁹ Jeoiyada wakabika abeshikulindilila mumalishi kuminjililo ya Ŋanda yakwe Lesa ayi banookasha bantu batasalalite kweelana aMilawo kwinjila.

²⁰ Lyalo bamatanjilili ba bashilumamba, bantu bapukite mundabala iyo, bacinenenene abantu bamwi boonse bakaya pantu pomwi aJeoiyada kushindikila mwaami kuswa kuŊanda yakwe Lesa kumutola kuŋanda ya bwaami. Bakenjilila kumwinjililo unene, lyalo mwaami wakekala pacuuna ca bwaami.

²¹ Bantu boonse bakasangalala abuumbi alimwi mundabala mwakaba luumuno mukwiinga Ataliya wakacaikwa.