2 Makani 21 - Baibo Busansulushi Bwa Libuku Ili

¹ Jeoshafati wakafwa akubikwa kushuumbwe sha bamaami muNdabala yakwe Defedi, lyalo Jeolamu mwanaakwe ngowakapyana bwaami bwakwe.

Jeolamu mwaami wa bene Juda

² Jeolamu mwanaakwe Jeoshafati mwaami wa bene Juda wakalinga kucite bamakwabo basankwa bali bosanwe awomwi, nkokwaamba ayi, Asaliya, Jeiyelo, Sekaliya, Asaliyawu, Mikaeli alimwi aShefatiya.

³ Baishiwabo bakabapa golodi uunji, silifa uunji alimwi ashintu shimwi shamakwebo, akubika ndabala yomwi yomwi pamandabala a muJuda ayo akalinga kucite malinga mumaansa a womwi awomwi. Ono ceebo cakwaamba ayi Jeolamu ngowakalinga mwaana wakwiiya, Jeoshafati wakamusala ayi akapyane bwaami bwakwe.

⁴ Jeolamu ndyaakayumya bwaami bwakamushiila baishi, wakacaya bamakwabo boonse abacinenenene bamwi bene Isilaeli.

⁵ Jeolamu wakaba mwaami kaacite myaaka makumi otatwe amyaaka yobilo. Wakalela muJelusalemu kwamyaaka yosanwe ayotatwe.

⁶ Wakakonkela nshila shibiibi sha mwaami Aabu abamaami bamwi bene Isilaeli mukwiinga wakeeba mwanaakwe Aabu. Nkokwaamba ayi wakabishisha Mwaami Lesa,

⁷ Sombi Mwaami Lesa taakwe kuyeeyawo kunyonyoola bamuŋanda yakwe Defedi mukwiinga wakapanga cipangano aDefedi akushomesha ayi bamulunyungu lwakwe balaakunoolela lyoonse.

⁸ Mubwaami bwakwe Jeolamu, bene Edomu bakabukila bene Juda akusala mwaami wabo beene.

⁹ Mpeeke Jeolamu abamatanjilili bakwe ba bashilumamba bakanyamuka ashikoci akuya mukulwana bene Edomu. Uko bashilumamba bene Edomu bakabashinguluka, sombi mashiku bakaloboka boonse.

¹⁰ Kuswabo ciindi ico bene Edomu bakaashukila bene Juda kushikila sunu. Muciindi ico ceenka bamundabala ya Libina abalo bakaashuka mukwiinga Jeolamu wakacileka kulambila Mwaami Lesa, Lesa wa bamashali bakwe bakulukulu.

¹¹ Wakayaka misena yakulambililaako ya patulundu mucishi ca tulundu ca Juda akulengesha bene Juda abene Jelusalemu kubisha pameenso a Mwaami Lesa.

¹² Lyalo Elija mulaluki wakatumina Jeolamu nkalata yakalinga kwaamba ayi, “Mwaami Lesa, Lesa wakwe Defedi mushali wanu mukulukulu, wamupa mulandu mukwiinga tamukwe kukonkela nshila shibotu sha baishiwanu, baami baJeoshafati nabi bankambiyako baAsa baami ba bene Juda.

¹³ Sombi mwebo mwakonkela nshila sha bamaami bene Isilaeli akulengesha bene Juda abene Isilaeli kutashomeka kuli Lesa, bweenka bwakalinga Aabu abamuŋanda yakwe. Mwebo mwakacaya abamakwabanu basankwa, ee, bamuŋanda ya baishiwanu, abo bakalinga bantu kabotu kwiinda ndimwe.

¹⁴ Bulya ono Mwaami Lesa utoopa mulandu bantu banu, bana banu alimwi abamakaanu. Utoonyonyoola shoonse nshemucite.

¹⁵ Mwebo nobeene mulaakuciswa kapokota ako keshi kakanooya cikomena kushikila kakabe cinkumbe.”

¹⁶ Mpeeke Lesa wakalengesha bene Filisiti abene Alabu abo bakalinga pafwaafwi abene Kushi kunyamuka kuya mukulwana Jeolamu.

¹⁷ Bakaya balwana bene Juda, basaala ŋanda ya bwaami akutola busha bayoosha ba mwaami pantu pomwi abana bakwe basankwa. Kwakacalaabo Aasiya shikeela.

¹⁸ Shoonse ndishakeenda, Mwaami Lesa wakalengesha mwaami kuciswa kapokota katashilikiki.

¹⁹ Kwamyaaka yobilo bulwashi ubo bwakalinga kuya cikomena paniininiini kushikila bwaba cinkumbe. Wakafwa lufu lubiibi abuumbi. Bantu bakwe tabakwe kukunka cibalankuni ca mulilo mukumulemeka bweenka mbuli mbobakalinga kucitila bamashali bakwe bakulukulu.

²⁰ Jeolamu wakaba mwaami kaacite myaaka makumi otatwe amyaaka yobilo. Wakalela muJelusalemu kwamyaaka yosanwe ayotatwe. Taaku wakoongumana pakufwa kwakwe. Bakamubika muNdabala yakwe Defedi, sombi kuteshi mushuumbwe sha bamaami, sobwe.