2 Joni 1 - Baibo Busansulushi Bwa Libuku Ili

¹ Nebo nemutanjilili, ntoolembela mwanakashi Lesa ngwaakasala alimwi abana bakwe abo mboonsuni abuumbi. Teshibo ndime neenka neemusuni, sombi abaabo boonse beshi shalushinisho.

² Tulimusuni mukwiinga lushinisho luli muli ndiswe alimwi lulaakunoolimobo lyoonse alyoonse.

³ Lesa Ishiwesu alimwi aJesu Klistu Mwanaakwe babe aluse, nkumbu alimwi aluumuno pali ndiswe mulushinisho alimwi amulusuno.

Lushinisho alusuno

⁴ Ndakasangalala abuumbi kucana kwaamba ayi bana bako bamwi batokweenda mulushinisho, bweenka mbwaakatulasha Ishiwesu.

⁵ Ono ndakusenga omwanakashi oosunikwi ayi soonse tusunane. Teshi kwaamba ayi ndakulembela mulawo upya, sombi ngooyo weenka ngotwakalinga kucite kuswa kumatalikilo.

⁶ Lusuno ndoontokwaamba ndwakwaamba ayi tulyeelete kukonkela milawo yakwe Lesa kweelana ambomwakanyumfwa kuswa kumatalikilo, nkokwaamba ayi noonse mulyeelete kusunana.

⁷ Ceebo kuli babeshi baanji balibo cishi coonse ca panshi, abo batasumini ayi Jesu Klistu wakesa mubuntu. Muntu utasumini makani aya ngumubeshi alimwi ngumulwani wakwe Klistu.

⁸ Amucenjele kwaamba ayi mutasowi ceeco ncemwakasebensela, sombi mukatambule cilambu canu coonse.

⁹ Uyo woonse utakonkeli kwiisha kwakwe Klistu, sombi kaailikawo shimwi shiteelete, taacite Lesa. Uyo woonse ukonkela kwiisha uko, ulicite Ishi alimwi aMwanaakwe.

¹⁰ Paceebo ceeco, na umwi muntu wesa kuli ndimwe kaateeishi sheeshi, mutamutambuli akumutambula mumaandaanu. Muteeleshi nabi kumwaansha.

¹¹ Mukwiinga uyo woonse weenga wamwaansha ulasuminisha micito yakwe ibiibi.

Maswi akweelaako

¹² Ndicite shintu shiinji shakumulwiita, sombi nshisuni kushilemba munkalata. Ntooyeeya kwisa mukumufwakashisha, katulangana pakumulwiita kwaamba ayi tukasangalale cancinencine.

¹³ Baana ba nankashi yako usalitwe, bakwaansha.