2 Bene Tesalonika 2 - Baibo Busansulushi Bwa Libuku Ili

Muntu Mubiibi ulya

¹ Ono nobamakwesu, pamakani akwisa kwa Mwaami wesu Jesu Klistu ashakubunganishikwa kwaamba ayi tumutambule, ndamusenga ayi

² mutanyonyonganishikwi mumiyeeyo alimwi mutapenshekwi amyoyo pacikani cakwaamba ayi, “Bushiku bwa Mwaami bwashika.” Tacicite mulandu nabi kwaamba ayi maswi aya aswa mubulaluki, nabi ayi akaswa kuli ndiswe nabi munkalata njetwakalemba.

³ Mutasuminishi muntu uli woonse ayi amubeece. Ceebo Bushiku teshi bukashikile bantu kabatana kwaashuka camamanino alimwi Muntu Mubiibi ulya uyo utoolindilabo kunyonyoolwa kaatana kuboneka.

⁴ Muntu uyo ulaakupikisha shoonse shiitwa ayi balesa nabi isho bantu nshebapaila alimwi ulaakuliyeeyela kwiindaawo nkusu pasheesho shoonse. Ulaakwiinjila akwikala muŊanda yakwe Lesa kaalibanda ayi, “Ndime Lesa.”

⁵ Sa tamwiingashite ayi ndakamulwiitawo kale shoonse ishi ndindakalinga kooko amwebo?

⁶ Ono nkocili cilengesha kwaamba ayi cikani ici citacitiki bulya alimwi mulicishi. Paciindi ceelete caakushikila Muntu Mubiibi ulya ulaakuyubuluka.

⁷ Bulya bantu batoocita kale bubi alimwi inga twabushibabo ceebo ca sheesho nshaakayubulula Lesa. Sombi uyo utoolengesha ayi butacitiki patuba utootolelela kucita boobo kushikila Lesa akamukusheewo.

⁸ Lyalo Muntu Mubiibi ulya ulaakuyubululwa. Ono Mwaami wesu Jesu pakwisa, ulaakumucaya kwiinda mukumuyoyela akumunyonyoola kubulemu mbweshi akeshiteemo.

⁹ Muntu Mubiibi ulya ulaakuyubuluka ankusu shakwe Satana. Ulaakucita shaankamiko sha mushobo uli woonse ashitondesho shabubeshi

¹⁰ alimwi akusebensesha bubeshi bwa mishobo imwi yoonse kubaabo batoolindilabo kunyonyoolwa. Balaakunyonyoolwa ceebo bakakaka makani a lushinisho ayo ali kweelete kubaletela lupulusho.

¹¹ Ono paceebo ceeco Lesa ulaakubalengesha kulubilabo limwi cakuswa munshila, kwiinda mukushoma sha bubeshi.

¹² Aboobo abo boonse batakwe kushoma shiluleme, bakakondwa shibiibi, Lesa ulaakubapa mulandu.

Lesa wakamusala kwaamba ayi mukapulushikwe

¹³ Swebo tulyeelete kulumba Lesa lyoonse ceebo canu nobamakwesu, nomusunikwi kuMwaami Lesa mukwiinga Lesa wakamusala kuswa kumatalikilo kwaamba ayi mupulushikwe. Lesa wakamulengesha kuba bantu bakwe kwiinda mumulimo wa Mushimu Usalashi alimwi alushomo lwanu mushalushinisho.

¹⁴ Wakamwiita muMakani Abotu ayo ngotwakamushimikila kwaamba ayi amwebo mukenjile mubulemu bwa Mwaami wesu Jesu Klistu.

¹⁵ Ono aboobo nobamakwesu, amutolelele kushoma shalushinisho isho nshetwakamwiisha nditwakalinga kushimikila, nabi munkalata njetwakamulembela.

¹⁶ Ono Mwaami wesu Jesu Klistu aLesa Ishiwesu uyo wakatusuna, kutuyumyayumya mumyoyo akutupa kulangila kutamaani kwiinda muluse lwakwe,

¹⁷ aayumyeyumye myoyo yanu kwaamba ayi lyoonse kamwaamba akucita shiluleme.