2 Bene Kolinto 9 - Baibo Busansulushi Bwa Libuku Ili

Shipo shakucafwa bashominyinaabo

¹ Ono tacicite ncito nabi ndabula kumulembela shamulimo wa lucafwo kubashominyineesu muJudeya.

² Ceebo ndishi kwaamba ayi mulayandishisha kucafwa alimwi ndakamulumbaisha abuumbi kubene Makedoniya. Ndabaambila kwaamba ayi, “Bashominyineesu muAkeya balinga kulibambite kucafwa kuswabo mwakali.” Aboobo kuyandishisha kwanu kwalengesha ayi bantu baanji bayande kucita mulimo uyu.

³ Paceebo ceeco ntootuma bashominyineesu abo kwaamba ayi kumulumbaisha kwesu kuboneke ayi nkwalushinisho. Bweenka mboondwiita bene Makedoniya kwaamba ayi munoolibambite kupa.

⁴ Ceebo na ndashika uko abashominyineesu bamwi bene Makedoniya, akucana kwaamba ayi tamukwe kulibambila shalucafwo, sa te inga twafwa nsoni abuumbi ceebo cakumushoma bunene? Ono mwebo teshi shakwaamba.

⁵ Aboobo ndakayeeya ayi cilyeelete kusengesha bashominyineesu kwaamba ayi mbatanjishe kooko mukubamba shipo nshemwakashomesha. Lyalo ndyeshi cikaboneke ayi mulapa ceebo mulisuni, kuteshi kukakatishikwa.

⁶ Amwiibaluke kwaamba ayi uyo ushanga shiniini, ulatebula shiniini, sombi uyo ushanga shiinji, ulatebula shiinji.

⁷ Womwi awomwi ulyeelete kupa kweelana amoyo mbowayanda, kuteshi myoyo yobilo nabi kukakatishikwa ceebo Lesa ulisuni bantu bapa cakusangalala.

⁸ Lesa ulakonsha kumupa shoolwe shiinji abuumbi ayi lyoonse munoocite shintu shakulicafwa nobeene ashintu shiinji shakucitisha milimo yoonse ibotu.

⁹ Bweenka bwaamba Malembo akwe Lesa ayi, “Muntu upa cakusangalala kubapenshi, bululami bwakwe tabumaani.”

¹⁰ Lesa ngoopa mbuto muntu kwaamba ayi ashange alimwi ulapa acakulya. Aboobo ulaakumupa mbuto njemukonsha kushanga akukomenesha shishango shanu. Lyalo ceebo ca nkumbu shanu ulaakulengesha ayi mukatebule shiinji.

¹¹ Ulaakumubilisha cakwaamba ayi lyoonse mwebo nkunoocitabo milimo ya luse. Aboobo bantu baanji balaakulumba Lesa ceebo ca shipo nshetutoobatolela.

¹² Ceebo mulimo uyo wa luse taweelibo mukucafwa bashomi mushintu nshebatacite, sombi cibolaawo bantu baanji balalumba Lesa abuumbi.

¹³ Mulimo uyu ulaakutondesha ayi mulashomeka alimwi baanji balaakulumbaisha Lesa ceebo ca mbuli mbomushimikila akunyumfwila bwaamba Makani Abotu apali Klistu. Peculu lya waawo balaakulumbaisha Lesa ceebo mulabaana ambabo akubaana abantu bamwi boonse nshemucite cakusangalala.

¹⁴ Aboobo bananoomupailila calusuno lwiine lwiine ceebo ca luse lwiindaawo Lesa ndwaamutondesha.

¹⁵ Atulumbe Lesa ceebo ca cipo ncaakatupa, ico nceenga tatukoonshi kusansulula.