2 Bene Kolinto 7 - Baibo Busansulushi Bwa Libuku Ili

¹ Ono nomusunikwi, Lesa wakashomesha shintu shoonse ishi kuli ndiswe. Aboobo atulisalashe kushintu shoonse shibisha mibili amyoyo yesu. Kwiinda mukulemeka Lesa, atweeleshe kwikala buumi busalalite pameenso akwe.

Paulo mbwaakasangalala

² Amututambule mumyoyo yanu. Taaku ngotwakabishisha, kunyonyweeta lushomo nabi kubeca.

³ Ndindaamba boobo, nshina kwaamba ayi mushinine, sobwe. Mbuli mbondakaambawo kale, mwebo tulimusuni abuumbi cakwaamba ayi taaku ceenga catupansaanya amwebo, lufu nabi cintu cili coonse mubuumi.

⁴ Ndicite lushomo lunene abuumbi muli ndimwe alimwi ndikondetwe abuumbi ceebo ca ndimwe. Mapensho oonse ngotweendaamo taakwe kuntyongwesha, sombi lyoonse ndeendabo akusangalala.

⁵ Ceebo nabi nditwakesa kuMakedoniya mibili yesu taikwe kookeshaawo, sombi twakalinga kupenshekwa mushiindi shoonse, kupikishanya abantu alimwi akulisukama mumyoyo.

⁶ Sombi Lesa, uyumyayumya batyongola, wakatuyumyayumya ciindi ndyaakashika Taitasi.

⁷ Teshibo kupola kwakwe kwakatuyumyayumya, sombi amakani ngaakaleta ambuli mbomwakamuyumyayumya. Wakatulwiita ayi mwayeeya kumbonaawo, mbomwakoongumana ceebo ca ndime alimwi ambomulibambite kunjimikanina. Bulya ndisangalete abuumbi.

⁸ Nakubi kwaamba ayi nkalata njindakamulembela yakamulenga buumba, tacikwe kuncisa ayi ndakailemba. Ndakoongumana ndindakanyumfwa ayi nkalata yamulengesha buumba, nakubi kwaamba ayi nkwaciindi ciniinibo.

⁹ Sombi bulya ndakondwa kuteshi kwaamba ayi ceebo mwakaba abuumba, sombi ceebo buumba bwanu bwakalengesha ayi musanduke kuswa kushibiibi shanu. Buumba ubo nguLesa wakabulengesha. Anu aboobo taaku cibiibi ncitwakamucita.

¹⁰ Mukwiinga buumba busangalasha Lesa bulalengesha moyo kusandukila kuli nguwe akuleta lupulusho. Ncakwiila tacipiwo nsoni! Sombi buumba buswa kubuumi bwa buntu bulaleta lufu.

¹¹ Amubone buumba bwanu busangalasha Lesa ncebwamucitila! Bwamulengesha kuyandishisha, ayi mucite akutondesha ayi tamucite mulandu. Mwakakalala abuumbi alimwi mwakalinga kuloondete paceeco cakacitika. Bwakamulengesha kuyanda kumbona akupa mulandu wooyo wakabisha kweelana ambwaaelete. Ono mucikani coonse ici mwatondesha ayi tamucite mulandu.

¹² Ndindakalemba nkalata nshikwe kwiilemba ceebo ca wooyo wakabisha nabi wooyo wakabishilwa. Ndakailembela kwaamba ayi muboneshe patuba pameenso akwe Lesa ayi kulyaaba kwanu kuli ndiswe nkunene.

¹³ Nceceeco ncetwakayuminishikwa abuumbi. Kuteshibo boobo, sombi twakasangalala ceebo cakusangalala kwakwe Taitasi munshila mwebo noonse njimwakamutambwitaamo.

¹⁴ Ndakamutondesha mboonkondetwe pali ndimwe alimwi amwebo tamukwe kunensha nsoni. Tatukwe kumubecaawo kale alimwi mbweeke ubo kumulumbaisha nkondakacita kuli Taitasi kwalitondesha ayi nkwalushinisho.

¹⁵ Lusuno lwakwe pali ndimwe lutooya cikomenenaako ndyaibaluka mbuli noonse mbomwakalinga kulibambite kucita nshaakalinga kumwaambila alimwi ambomwakamutambula cakuliceesha abulemu.

¹⁶ Ndisangalete abuumbi kwaamba ayi ndashoma cakumaninina muli ndimwe.