2 Bene Kolinto 6 - Baibo Busansulushi Bwa Libuku Ili

¹ Kweelana ambotusebensela pantu pomwi aLesa, twamusenga kwaamba ayi nomwakatambula shoolwe sha luse lwakwe Lesa mutakashinyonyoolibo.

² Ceebo Lesa wakaamba ayi, “Muciindi ceelete kwaamba ayi mupe coolwe, ndakamunyumfwa. Bushiku bwakwaamba ayi nebo mupulushe, ndakamucafwa.” Amunyumfwe ono! Bulya nceciindi cakwaamba ayi Lesa ape bantu coolwe! Buno mbobushiku bwakupulushikwa!

³ Swebo tatusuni kwaamba ayi bantu batongooke mulimo wesu kwiinda mukubashinkilisha.

⁴ Sombi mushintu shoonse tulalitondesha ayi tuli basebenshi bakwe Lesa, kwiinda mukutolelela kushoma mushiindi sha mapensho apusenepusene.

⁵ Mukuumwa, mukwaangwa, mumanyonyongano, mukusebensa cankusu, mukutoona tulo amunsala.

⁶ Alimwi kwiinda mubuumi bwesu butacite kampenda, lushibo lwesu, kukalika moyo kwesu, inkumbu nshetucite, muMushimu Usalashi, mulusuno lwancinencine,

⁷ mumaswi alushinisho alimwi amunkusu shakwe Lesa. Tulasebensesha shakulwanisha sha bululami mumaansa oonse obilo lyalulyo alyacipiko.

⁸ Bantu balatulemeka akutusebaanya, balatwaamba bubi abubotu, balatucita anga tuli babeshi, sombi tatubeci, sobwe.

⁹ Balatucita anga tatushibikitwe nakubi kwaamba ayi tulishibikitwe abuumbi. Balatubona anga mbantu bafwite, sombi tuli boomi. Nakubi kwaamba ayi tulapenshekwa cankusu, tabatucaayi.

¹⁰ Tulaboneka anga tulyuungumene, sombi tulakondwa lyoonse. Tulaboneka anga mbakandu, sombi tulalengesha bantu baanji kubila. Tulaboneka anga taaku ncetucite, sombi shintu shoonse shili mumaanseesu.

¹¹ Nobene Kolinto, swebo twaamba cakutashisa. Myoyo yesu ilitubite.

¹² Teshi ndiswe twashinkila lusuno lwesu kuli ndimwe, sombi mwebo nobeene mwashinkila lusuno lwanu kuli ndiswe.

¹³ Ono ntoomwaambila anga mbana bangu ayi, “Amutondeshe lusuno lwanu amwebo.”

Bashomi tabeelete kucatana abakunsengwe

¹⁴ Mutacatani pantu pomwi abakunsengwe. Ino bubotu abubi inga shacatana buyani? Munshilanshi mweenga mumuni amunshinshe shabeta pantu pomwi?

¹⁵ Ino Klistu aMubiibi ulya inga basuminishanya buyani? Ino ono mushomi inga weendelana buyani autashomi?

¹⁶ Ncipanganonshi ceenga caba pakati ka Ŋanda yakwe Lesa ashibumbwabumbwa? Ceebo swebo tuli Ŋanda yakwe Lesa muumi, mukwiinga Lesa ulaamba ayi, “Ndaakuba mubantu bangu, akwikala pakati kabo, Ndaakuba Lesa wabo, abalo balaakuba bantu bangu.”

¹⁷ Aboobo Lesa wakaamba ayi, “Amuswe pakati ka bakunsengwe, mwikale amwebo nweenka. Mutacati cintu citasalalite, lyalo ndaakumutambula.

¹⁸ Ndaakuba ishiwanu, amwebo mulaakuba bana bangu, basankwa abanakashi, Nebo neMwaami Lesa Shinkusu shoonse ndaamba.”