2 Bene Kolinto 5 - Baibo Busansulushi Bwa Libuku Ili

¹ Mubili ngotucite bulya uli anga ninkunka. Ono tulishi kwaamba ayi nkunka iyi yaakunyonyoolwa, tulaakwikala muŋanda yakatubambila Lesa kwiculu, ŋanda iyo teekwe kuyakwa amuntu alimwi njamuyayaya.

² Nceceeco ncetutongelela ceebo tutooyandishisha ayi Lesa atufwalike ŋanda yesu ya kwiculu iyo.

³ Twaakwifwala ŋanda iyo teshi tukacanike katutacite mubili.

⁴ Nditwikala munkunka iyi tulatongela mumapensho. Teshi kwaamba ayi tulisuni kufuula nkunka iyi, sombi tulisuni kwaamba ayi tufwalikwe ŋanda yesu ya kwiculu iyo kwaamba ayi ico cifwa cisandulwe akuba cabuumi butamaani.

⁵ Lesa ngowakacibamba boobo alimwi wakatupa Mushimu Usalashi ayi ube anga ncecisumina mulandu kwaamba ayi tulaakutambula shoonse isho nshaakatubambila.

⁶ Aboobo lyoonse tatucite boowa alimwi tulishi kwaamba ayi mubili uyu wa buntu ndyoocili anga niŋanda yesu, tatutookala pantu pomwi aMwaami.

⁷ Ceebo cinene mubuumi bwesu buno nkushoma, kuteshi kubona.

⁸ Ncakwiila tatucite boowa, ono ncetusuni bunene ncakwaamba ayi tuswe mumubili uno akuya mukwikala aMwaami.

⁹ Sombi ncetusuni, nkucita shikondelesha Mwaami mumubili uno nabi mumubili wa kwiculu.

¹⁰ Ceebo soonse tulyeelete kuya mukwiimikana pameenso akwe Klistu ayi atoomboloshe. Muntu woonse ulaakutambula ncaaelete kweelana ashoonse nshaakacita, shibotu nabi shibiibi mubuumi bwa buntu buno.

Kubooshekwa kuli Lesa kwiinda muli Klistu

¹¹ Ono tulishi ayi Mwaami ulyeelete kulemekwa, aboobo tuleelesha kunyengelela bantu. Lesa ulishi shoonse shapali ndiswe alimwi ndashoma kwaamba ayi amwebo mulinshi mumyoyo yanu.

¹² Tatutoolilumbaisha kuli ndimwe alimwi, sobwe. Ncetutoocita nkwaamba ayi mube aceebo cibotu cakulilumbaishilaawo muli ndiswe, ee, kwaamba ayi mube acakukumbula baabo bakondwabo musheesho shiboneka ameenso, kuteshi shili mumoyo wa muntu.

¹³ Na tulaboneka anga tulicinkukite, tulaboneka boobo ceebo cakwe Lesa. Ono ncakwiila tulikwenebo kabotu, tuli boobo ceebo canu.

¹⁴ Lusuno lwakwe Klistu ndolutweendelesha ceebo tulashoma kwaamba ayi muntu womwi wakafwita bantu boonse, paceebo ceeco boonse bakafwa kwiinda muli nguwe.

¹⁵ Wakafwita boonse, kwaamba ayi abo boomi batekali buumi bwakulisangalasha beene, sombi wooyo wakafwa akubushikwa ceebo cabo.

¹⁶ Kuswabo nditwakaba bashomi, twakacileka kuyeeyela muntu munshila sha buntu. Ndushinisho ico twakacicitaawo pali Klistu, sombi bulya twakacileka.

¹⁷ Aboobo na muntu waba muli Klistu ulaba abuumi bupya. Shikulukulu shamana, nkokwaamba ayi shoonse shaba shipya.

¹⁸ Wakacita shoonse ishi nguLesa. Kwiinda muli Klistu, Lesa wakalengesha kwaamba ayi tube beshicibusa bakwe alimwi. Bulya watupa mulimo wakunooya bulengesha bantu bamwi ayi babe beshicibusa bakwe abalo.

¹⁹ Tutooshimikila ayi, kwiinda muli Klistu, Lesa utoolengesha bantu boonse kuboosha bushicibusa anguwe. Shibiibi shabo ulabalekelela akushilubaako. Watupa makani akwaamba ayi ulisuni bantu boonse kuba beshicibusa bakwe.

²⁰ Mbulya ono, tutokwiimikanina Klistu. Nceceeco Lesa utoosengesha bantu boonse kwiinda muli ndiswe. Aboobo twamusenga muliina lyakwe Jesu kwaamba ayi mube beshicibusa bakwe Lesa.

²¹ Klistu taakalinga kucite cibiibi, sombi Lesa wakabika shibiibi shesu pali nguwe kwaamba ayi swebo tube abululami bwakwe Lesa.