2 Bene Kolinto 3 - Baibo Busansulushi Bwa Libuku Ili

Basebenshi ba cipangano cipya

¹ Sa nkokwaamba ayi twatalika kulilumbaisha alimwi? Sa cilaamba ayi tulyeelete kwisa ankalata yakutunsansulula, nabi kubwesa nkalata ya mushobo wooyo kuswa kuli ndimwe kweelana abucita bamwi? Sobwe!

² Mwebo nweenka ndimwe nkalata yesu ilembetwe mumyoyo yesu, kwaamba ayi bantu boonse baishiibe akwiibelenga.

³ Cilibwenekete patuba kwaamba ayi Klistu mwiine ngowakalemba nkalata iyi akwiituma kwiinda muli ndiswe. Tailembetwe ainki, sombi aMushimu wakwe Lesa muumi alimwi tailembetwe pamabwe, sombi pamyoyo ya bantu.

⁴ Twaamba boobo ceebo kwiinda muli Klistu tulicite lushomo muli Lesa.

⁵ Swebo palweesu taaku ncetucite ceenga catulengesha ayi tube ankusu shakucita mulimo uyu. Nkusu nshetucite shilaswa kuli Lesa.

⁶ Lakwe ngootupa nkusu shakwaamba ayi tube basebenshi ba cipangano cipya, ico citakwe kupangwa aMilawo ilembetwe, sombi aMushimu Usalashi. Milawo ilembetwe ilaleta lufu, sombi Mushimu ulapa buumi butamaani.

⁷ Milawo ilembetwe yakabesekwa libala alibala pamabwe alya, alimwi pakupekwa kuli Mose bulemu bwakwe Lesa bwakaboneka. Ciwa cakwe Mose cakamweka kubulemu ubo. Ono nakubi kwaamba ayi bwakalinga kuya cishimingana, bene Isilaeli tabakwe kutolelela kulangilisha Mose paciwa. Na Milawo, iyo ileta lufu, yakesa abulemu bwa mushobo uyo,

⁸ ino cilaakweela kuli pamulimo wa Mushimu Usalashi?

⁹ Na mulimo wa loombolosho akupa mulandu yakesa abulemu, cilaakweela kuli pamulimo uyo uleta bululami?

¹⁰ Ceebo ca bulemu kufula alimwi bwiindaawo bwakaboneka bulya, bulemu ubo bwakalinga kwiindaawo kale kale tabwishi bulemu, sobwe.

¹¹ Ceebo na ico cakekalabo ciindi ciniini cakalinga kucite bulemu, ino ico ceshi cikekalilile cilaakweela kuli?

¹² Ceebo tulalangila sheeshi, ncetwaambila cakubula boowa.

¹³ Tatubete mbuli Mose uyo wakalifweka cisani pameenso, kwaamba ayi bene Isilaeli bataboni bulemu mbobwakalinga kuya cimana paciwa cakwe.

¹⁴ Ncakwiila maano abo alicalitwe ceebo kushikila sunu cisani ceenka ico cilafweka maano abo ndibabelenga Cipangano ca Kale kale. Cisani cilakushikwabo na muntu wekala muli Klistu.

¹⁵ Ee, kushikila acecino ciindi ndibabelenga shakalemba Mose, cisani cicibafweketebo pamyoyo.

¹⁶ Sombi na muntu wasandukila kuMwaami, cisani ico cilakushikwa.

¹⁷ Ono Mwaami nguMushimu, aboobo kulilabo kubete Mushimu wa Mwaami kuli lwaanguluko.

¹⁸ Swebo soonse sotucite shiwa shitafweketwe shisani, tuli anga nshilola shitondesha bulemu buswa kuMwaami. Tutoosandululwa kuba mbuli nguwe, kuswa mubulemu bumwi kuya mubuumbi bwiindaawo, kwiinda muMwaami uli nguMushimu.