2 Bene Kolinto 13 - Baibo Busansulushi Bwa Libuku Ili

Kucenjesha akwaansha kwakweelaako

¹ Ono luno ndwatatu ndoondibambite kwisa kooko kuli ndimwe. Malembo akwe Lesa alaamba ayi, “Makani oonse alyeelete kwiimikaninwa abakamboni bobilo nabi botatwe.”

² Ndakacenjesha bantu abo bakabisha abamwi boonse alimwi bulya ntoomucenjesha kaantabete amwebo, bweenka mbuli mbondakacita mulweendo lwabili kaandi amwebo, ayi ndaakwisa alimwi teshi nkanyumfwilewo nkumbu bantu abo.

³ Ono ndyeshi mukabone citondesho kwaamba ayi Klistu ngowaamba muli ndime. Taalefuki pakumucita mbomweelete, sombi ulatondesha nkusu shakwe pakati kanu.

⁴ Ceebo nabi wakapopwa pamucilingano mukulefuka kwa buntu, ngumuumi kwiinda munkusu shakwe Lesa. Tulilefukite muli nguwe, sombi munkusu shakwe Lesa tulaakuba boomi anguwe kwaamba ayi tukamucite bweelete.

⁵ Amulyeeleshe nobeene akuliyeeya na mulicite lushomo. Sa tamwishi kwaamba ayi Klistu uli muli ndimwe? Na tacibete boobo, ingayi mwaalilwa!

⁶ Ndishomete kwaamba ayi mulakonsha kubona ayi tatukwe kwaalilwa, sobwe.

⁷ Tulamupailila kuli Lesa kwaamba ayi mutabishi, kuteshi kwaamba ayi tulisuni kutondesha ayi twookonsha, sombi ayi mucite shibotu, nabi swebo twaboneka ayi twaalilwa.

⁸ Mukwiinga swebo tatukoonshi kucita shiteendelani ashalushinisho, sombi kucita shalushinisho.

⁹ Swebo tulasangalala kwaamba ayi tulilefukite, mwebo muli bayumu. Aboobo ncetupailila nkwaamba ayi mukaswitilile kabotu.

¹⁰ Ndamulembela ishi kaantana kwisa uko, kwaamba ayi ndaakwisa uko, ntakasebenseshi nkusu shangu cabukali. Mwaami wakampa nkusu isho ayi njake coonde kuteshi kumwaya.

¹¹ Ono nobamakwesu, amucaale kabotu. Amululamike buumi bwanu, mukutike milasho yangu. Kamunyumfwana, mwikale muluumuno. Lyalo Lesa shilusuno aluumuno ulaakuba amwebo.

¹² Amwaanshanye mulusuno lwiine lwiine. Bashomi boonse kuno bamwaansha.

¹³ Luse lwa Mwaami Jesu Klistu, lusuno lwakwe Lesa alimwi abwanabwankashi bwa Mushimu Usalashi shibe amwebo noonse.