2 Bene Kolinto 11 - Baibo Busansulushi Bwa Libuku Ili

Paulo abatumwi babeshi

¹ Ndasenga kwaamba ayi mundekelele mubuluya bwangu. Ono amundekeleleeko!

² Ndamufwita munyono bweenka mbuli Lesa. Mwebo muli anga ngumooye utana kukumanawo kale amusankwa, uyo ngondakamamikisha kumusankwa womwibo, Klistu.

³ Sombi ndiloondete kwaamba ayi bweenka mbuli nsoka mboyakabeca Efa mubucenjeshi bwa njiyo, amwebo inga mwabecekwa, lyalo mwacileka kulyaaba kuli Klistu amyoyo yoonse.

⁴ Ceebo na kwesa muntu utooshimikila Jesu umwi uteshi wooyo ngotwakamushimikila, na mwatambula mushimu umwi uteshi wooyo ngomwakatambula, nabi kutambula makani amwi ateshi ayo ngomwakatambula, mulafwambaana kukonkela cakutayeeya.

⁵ Ntooyeeya ayi nshiindwiiwo kubaabo mbomwaamba ayi, “Batumwi beendaawo.”

⁶ Mpashi nshina kucishiba kwaamba kabotu, sombi lushibo ndicite. Ici twakacaamba patuba munshila amushintu shoonse.

⁷ Ndakalibombya kwaamba ayi mwebo musumpulwe ceebo ndakamushimikila Makani Abotu akwe Lesa cakutamulipilisha. Sa ndakabisha kucita boobo?

⁸ Lucafwo loonse ndindakalinga kusebensela pakati kanu lwakalinga kuswa kushoonde shimwi. Ico cakalinga kuboneka anga ntoopamba shoonde isho kwaamba ayi ncafwe ndimwe.

⁹ Paciindi ndindakalinga amwebo, ndakalinga kuyanda lucafwo lwa maali, sombi nshikwe kupensha ndimwe. Bashominyineesu bakaswa kuMakedoniya bakampa shoonse nshendakalinga kuyanda. Nshikwe kupensha ndimwe palucafwo alimwi teshi mupeenshe bulya, nabi bumwi bushiku.

¹⁰ Kwiinda mulushinisho lwakwe Klistu luli muli ndime, taaku eshi akankashe kulilumbaisha uku mucishi coonse ca Akeya.

¹¹ Sa ntokwaamba boobo ceebo cakutamusuna? Sobwe, Lesa ulishi kwaamba ayi ndimusuni!

¹² Ntootolelela kucita nceentoocita bulya kwaamba ayi bamwi babule ceebo cakulilumbaisha, akwaamba ayi balacita mulimo uyu bweenka mbuli ndiswe.

¹³ Ceebo bantu abo mbatumwi babeshi, mbasebenshi beshi kuya cicenjeeka ayi baboneke anga mbatumwi bakwe Klistu bancinencine.

¹⁴ Anu tacikankamanishi mukwiinga alakwe Satana ulalisandula kuboneka anga ngumunjelo wa mumuni.

¹⁵ Aboobo tacikankamanishi kwaamba ayi abalo basebenshi bakwe balayubila mukuboneka anga mbasebenshi ba bululami. Meelelesho abo alaakuba bubete milimo yabo.

Mapensho abutumwi bwakwe Paulo

¹⁶ Ntooboshaawo kwaamba ayi taaku muntu weelete kumbona anga ndimuluya, sombi na kamuyeeya boobo, amuntambule mbuli muntu muluya ayi anebo noolilumbaisha paniini.

¹⁷ Nshintookonkelesha Mwaami Jesu ndintoolilumbaisha boobo. Ntokwaambabo anga ngumuntu muluya.

¹⁸ Bantu baanji balalilumbaisha mubuntu bwabo, anebo andilumbaisheewo yaaya!

¹⁹ Mwebo mbuli mbomulyaamba ayi muli basongo, aboobo baluya mulabatambula cakukondwa.

²⁰ Ceebo mwebo mulakondwa bantu bamutola mubusha, na bamunyengelela shintu, na bamubeca, na bamulenga buluya nabi bamuuma mpaka kumeenso.

²¹ Ono cilalensha nsoni kwaamba ayi tetwakalinga kukonsha kucita shintu sha mushobo uyo ceebo tetwakalinga bayumu. Ono mbuli muntu muluya, ntokwaamba ayi na umwi ulisuni kulilumbaisha pacintu cili coonse, anebo cinanooli bweenka ubo.

²² Sa balo mbaEbulu? Anebo ndi muEbulu. Sa mbene Isilaeli? Anebo ndi mwine Isilaeli. Sa mbamulunyungu lwakwe Abulaamu? Anebo ngumushobo womwi.

²³ Sa mbasebenshi bakwe Klistu? Nebo ndeendaawo. Ndaamba anga ngumuntu ucinkukite. Nebo ndeendaawo kusebensa ankusu, mankanda akwaangwa, mankanda akukwipwa cakutasekana, amankanda akuboolela pakalindi.

²⁴ Mankanda osanwe bamaloba ba baJuda bakankwipa misako ili makumi otatwe, yosanwe ayone.

²⁵ Ndakakwipwa misako mankanda otatwe kubeendeleshi bene Loma, alimwi ndakoomwaawo mabwe linkanda lyomwi. Bwaato bwakamfwitaawo mankanda otatwe alimwi bushiku bumwi ndakalinga kuseelabo pamaanshi mashiku amalumwi.

²⁶ Munyendo shiinji ndakalinga kupulukila kwempe kumaanshi, kubapambi, kubaJudama, kubaswamashi bakunsengwe, mumandabala anene, mumisena yatakalinga kwikala bantu, mulweenge lulaamfu akubashominyineesu babeshi.

²⁷ Lyoonse ndakalinga kuyuwaana, mankanda maanji nshindakalinga koona tulo. Liinji liinji ndakalinga kufwabo nsala anyotwa. Alimwi liinji ndakalinga kubula shakulya, kufwa mpewo mukubula ŋanda ashakufwala.

²⁸ Peculu lya shimwi shoonse, lyoonse ndacanika akulisukama kunene abuumbi ceebo ca shoonde shoonse.

²⁹ Na umwi walefuka, anebo ndalefuka. Na umwi wawita mucibiibi, nebo ndoongumana.

³⁰ Na ndyeelete kulilumbaisha, ndaakulilumbaisha pashintu shitondesha mboondefukite.

³¹ Lesa alimwi Ishi Mwaami wesu Jesu, uyo weelete kulumbaishikwa lyoonse alyoonse, ulishi ayi nshintoobeca.

³² Ndindakalinga muDamasikasi mweendeleshi wa mwaami Aletasi, wakabika beshikulindilila paminjililo yoonse ya ndabala inene iyo kwaamba ayi bancaate.

³³ Sombi ndakapushilwa pacipense ca mulubumbu akundeleesha mumutaanga, lyalo ndakaloboka kuswa mumaansaakwe.