2 Baami 18 - Baibo Busansulushi Bwa Libuku Ili

Esekiya mwaami wa bene Juda

¹ Mumwaaka watatu wa bwaami bwakwe Osheya mwanaakwe Ela mwaami wa bene Isilaeli, Esekiya mwanaakwe Aasi wakaba mwaami wa bene Juda.

² Wakaba mwaami kaacite myaaka makumi obilo amyaaka yosanwe. Wakalela muJelusalemu kwamyaaka makumi obilo amyaaka yosanwe ayone. Banyina bakalinga mbaAbija mwanaakwe Sekaliya.

³ Wakacita shiluleme pameenso a Mwaami Lesa bweenka bwakacita Defedi mushali wakwe mukulukulu.

⁴ Wakanyonyoola misena yakulambililaako ya patulundu. Wakapwaya libwe lyakeemikwa akutimboola shikoshanyo shakwe Ashela lesa mwanakashi. Ayalo nsoka ya bulonse iyo Mose njaakalinga apanga wakeepwayoola mutupanshapansha mukwiinga bene Isilaeli bakalinga kubenga tununkila kabotu mukwiilemeka. Nsoka iyo yakalinga kwiitwa ayi Neushitani.

⁵ Esekiya wakalinga kucinkite manungo muMwaami Lesa, Lesa wa bene Isilaeli. Bene Juda tabakwe kubaawo amwaami uli mbuli wooyo kaatana kuba mwaami nabi kuswa ciindi ico.

⁶ Wakalinga kushomeka kuMwaami Lesa alimwi taakwe kusuulawo milawo iyo mwaami Lesa njaakapa Mose.

⁷ Paceebo ceeco Mwaami Lesa wakalingaakwe alimwi wakalinga kuswitilila mushintu shoonse nshaakalinga kucita. Mpeeke wakabukila mwaami wa bene Asilya akukaka kumusebensela.

⁸ Wakakoma bene Filisiti akunyonyoola mandabalaabo oonse, kuswa kumishi iniini kushikila kumandabala anene kubikaawo aGasa amisena ishingukulukite.

⁹ Mumwaaka wane wa bwaami bwakwe Esekiya, mumwaaka wasanu amyaaka yobilo wa bwaami bwakwe Osheya mwanaakwe Ela, mwaami wa bene Isilaeli, Shalimanesa mwaami wa bene Asilya wakaya mukulwana cishi ca Isilaeli akushinguluka ndabala ya Samaliya.

¹⁰ Mumwaaka watatu wa nkondo, Samaliya wakakomwa. Ici cakacitika mumwaaka wasanu awomwi mubwaami bwakwe Esekiya, mumwaaka wasanu ayone wa bwaami bwakwe Osheya mwaami wa bene Isilaeli.

¹¹ Mwaami wa bene Asilya wakakoma ndabala ya Samaliya akutola busha bene Isilaeli kucishi ca Asilya. Bamwi wakabekalika mundabala ya Ala, bamwi kufwaafwi aMulonga wa Aboli mumusena wiitwa ayi Gosani, bamwi mumandabala anene a mucishi ca bene Medi.

¹² Ndabala ya Samaliya yakakomwa mukwiinga bene Isilaeli bakabisha kuMwaami Lesa, Lesa wabo, sombi bakapwaya cipangano ncaakapanga ambabo akukaka milawo yoonse yakabapa Mose, musebenshi wa Mwaami Lesa. Tabakwe kumukutika nabi kumunyumfwila.

Bene Asilya mbobakatuma beshinkombe kundabala ya Jelusalemu

¹³ Mumwaaka walikumi amyaaka yone wa bwaami bwakwe Esekiya, Senakelibu mwaami wa bene Asilya, wakaya mukulwana mandabala anene akalinga kucite malinga a bene Juda akwaakoma.

¹⁴ Esekiya mwaami wa bene Juda wakatuma nkombe kuli Senakelibu mwaami wa bene Asilya uyo wakalinga muLakishi ayi, “Ndamubishisha. Ndapapata amucileeke kulwana, ntoomulipila cili coonse ncemusuni.” Mwaami wa bene Asilya wakaamba ayi Esekiya atume makilogilamu a silifa ali 10,000 amakilogilamu a golodi ali 1,000.

¹⁵ Esekiya wakamutumina silifa yoonse yakalinga muŊanda yakwe Lesa alimwi amushipinda sha buboni ca ŋanda ya bwaami.

¹⁶ Wakakusha agolodi ngwaakalinga wasebensesha kunanika kushisasa akushisamu shishicata sha kuŊanda yakwe Lesa akutuma shoonse kumwaami wa bene Asilya.

¹⁷ Lyalo Mwaami wa bene Asilya wakatuma bamatanjilili ba bashilumamba botatwe beendaawo pantu pomwi abashilumamba baanji baanji kuswa kuLakishi kuya mukulwana Esekiya kuJelusalemu. Ono ndibakashika kuJelusalemu bakeemikana mumukwakwa uyo beshikutunga nsalu mobakalinga kusebensela, pafwaafwi amufolo wakalinga kuleta maanshi kuswa kucishiba ca peculu.

¹⁸ Mpomunyaawo bakeeta mwaami Esekiya. Lyalo bacinenenene bakwe botatwe bakaya mukubakumanya. Pakalinga Eliyakimu mwanaakwe Ilikiya uyo wakalinga kweendelesha ŋanda ya bwaami, Shebina uyo wakalinga mulembi alimwi aJowa mwanaakwe Asafu uyo wakalinga mulembi wa kubwalo.

¹⁹ Mpomunyaawo mutanjilili wa bashilumamba umwi wa bene Asilya wakabaambila kulwiita Esekiya ayi, “Mwaami shinkusu wa bene Asilya waamba ayi, ‘Nciinshi citookupamya?

²⁰ Sa utooyeeya ayi maswi inga eelana alushibo lwa nkondo alimwi ankusu? Ngani ngootooyeeya ayi inga wakucafwa kubukila bene Asilya?

²¹ Webo utooyeeyela kucafwikwa kubene Ijipiti. Ico inga caba anga nkushimpila kulitete pakweenda. Litete ilyo inga lyatyoka akukuyasa mulyaansa omwiine. Anu ubo mwaami wa bene Ijipiti mbwaabete na muntu wacinka manungo muli nguwe.’ ”

²² Mutanjilili mwine Asilya wakatolelela kwaamba ayi, “Sa utooyanda kundwiita ayi Mwaami Lesa, Lesa wako ngooncinkitemo manungo? Sa teshi ngomwine misena yakulambililaako ya patulundu alimwi ashipaililo shakwe isho Esekiya nshaakanyonyoola ndyaakaambila bene Juda abene Jelusalemu kunoolambililabo kucipaililo ca kuJelusalemu?

²³ Kosa tunyumfwane muliina lya mwaami wa bene Asilya. Ntookupa maaki ali 2,000 na ucane bantu beenga baatanta!

²⁴ Webo tookoonshi kukoma aweelaako pabacinenenene ba bene Asilya, nakubi boobo utooyeeya ayi bene Ijipiti bakutumine shikoci abeshikulwanina pamaaki!

²⁵ Sa utooyeeya ayi inga ndesa mukulwana cishi cako akucinyonyoola kwakubula liswi kuswa kuMwaami Lesa? Mwaami Lesa mwiine ngowakandwiita ayi nse ndwane cishi cako akucinyonyoola.”

²⁶ Lyalo Eliyakimu mwanaakwe Ilikiya, Shebina alimwi aJowa bakalwiita mutanjilili uyo ayi, “Nkambo, kamutwaambila muciAlamaiki mukwiinga acalo tulacinyumfwa. Mutanootwaambila muciEbulu ceebo bantu boonse bali kulubumbu batoonyumfwa.”

²⁷ Mutanjilili uyo wakakumbula ayi, “Sa mutooyeeya ayi mwaami wangu wantuma ayi nse ŋambe makani aya kuli ndimwebo amwaami wanu? Sobwe, ntoolwiita abantu bashiite palubumbu abo beshi bakalye tushi akunwa mikonso yabo beene bweenka mbuli ndimwe.”

²⁸ Mpomunyaawo mutanjilili uyo wakanyamuka akoolobesha muciEbulu ayi, “Amukutike mbwaatokwaamba mwaami shinkusu wa bene Asilya!

²⁹ Utoomucenjesha ayi, ‘Esekiya atamubeeci. Ncakwiila Esekiya taakoonshi kumupulusha kuswa kumaansaangu.

³⁰ Atamuyungooli ayi mucinke manungo muMwaami Lesa. Mutanooyeeya ayi Mwaami Lesa ulaakumufuna nabi kukasha likoto lya bashilumamba bene Asilya kubwesa ndabala yanu.’

³¹ Mutakutiki shitokwaamba Esekiya. Mwaami wa bene Asilya waamba ayi musweemo mundabala iyi akulyaaba mumaansaakwe. Lyalo mulaakusuminishikwa kunoolya minyansa kushisamu shanu, ankuuyu kushisamu shanu alimwi akunwa maanshi kuswa mumikalo yanu nobeene.

³² Mulaakunoocita boobo kushikila mwaami wa bene Asilya akamukalike mucishi ico cili anga ncishi canu, uko kuli minyansa yakutyanako waini alimwi kuli ashili anga ngamaila akupangisha shinkwa. Ico ncishi ca maolifi, mafuta a olifi alimwi abuuci. Na mucite shoonse nsheshi akamulwiite, teshi mukafwe. Esekiya atamubeeci ayi Mwaami Lesa ulaakumupulusha.

³³ “Sa balesa ba mishobo imwi bakafunawo kale shishi shabo kuswa kumwaami wa bene Asilya?

³⁴ Ino balesa bakwe Amati alimwi aAlipadi bali kuli cino ciindi? Ino balesa bene Sefafaimu, Ena, alimwi aIfa bali kuli? Sa kuliiwo wakapulusha Samaliya?

³⁵ Ngani pabalesa ba mushishi ishi bakakonsha kufuna cishi cabo kuswa kumwaami wesu? Ono nciinshi ncemutooyeeyela ayi Mwaami Lesa inga wafuna Jelusalemu?”

³⁶ Sombi bantu bakoomunabo tontolo bweenka mwaami Esekiya mbwaakabaambila. Tabakwe kwaambaawo nabibo liswi.

³⁷ Lyalo Eliyakimu mwanaakwe Ilikiya uyo wakalinga kweendelesha ŋanda ya bwaami, Shebina uyo wakalinga mulembi alimwi aJowa mwanaakwe Asafu uyo wakalinga mulembi wa makani a buleelo bakakwamoona shakufwala shabo kubuumba. Mpeeke bakaya mukulwiita mwaami Esekiya isho shakaamba mutanjilili wa bashilumamba ba bene Asilya.