1 Timoti 3 - Baibo Busansulushi Bwa Libuku Ili

Batanjilili ba coonde

¹ Ono ngaaya makani alushinisho. Muntu usunishi kuba mutanjilili wa coonde, ulisuni mulimo ubotu.

² Mutanjilili ulyeelete kuba muntu utacite kampenda, weebetebo mwanakashi womwi, ulibika mpaaelete, ulitibuka, ulemekwa, shikutambula beensu, ukonsha kwiisha bantu.

³ Taaelete kuba cakolwa, nabi mukali, sombi mubombu, shiluumuno, utasunishi maali.

⁴ Ulyeelete kweendelesha kabotu bamuŋanda yakwe akulengesha bana bakwe kumunyumfwila akumulemeka munshila shoonse.

⁵ Ceebo na muntu taaendeleshi kabotu bamuŋanda yakwe, ino inga weendelesha buyani coonde cakwe Lesa?

⁶ Taaelete kuba muntu wakasanduka onoono mukwiinga cimwi ciindi inga walisumpula akupekwa mulandu mbuli Satana.

⁷ Bantu bakunsengwe balyeelete kunoomulemeka kwaamba ayi atakanyumfwi nsoni akucatwa mukoose kakwe Satana.

Bacafwi ba coonde

⁸ Bacafwi ba coonde abalo balyeelete kuba amibo ibotu, bashomeka, bateendilishi kunwa shikola alimwi batayandooli maali munshila sha bucenjeshi.

⁹ Balyeelete kuba bantu bacatite camaansa obilo kulushinisho lwakayubululwa lwa lushomo amiyeeyo iluleme.

¹⁰ Balyeelete kutaanguna kubabona kabotu, lyalo na babula kwaalilwa, mubape mulimo wakucafwa.

¹¹ Bamakaabo abalo balyeelete kuba amibo ibotu, batafuuyi. Balyeelete kuba bantu balibika mpobeelete alimwi bashomeka mushintu shoonse.

¹² Bacafwi ba coonde balyeelete kuba bantu beebete mwanakashi womwi womwi, beendelesha kabotu bana babo abamumaanda abo.

¹³ Abo bacafwi bacita mulimo wabo kabotu balacana mpuwo ibotu alimwi balakonsha kwaamba shalushomo lwabo muli Klistu Jesu cakubula boowa.

Bushishi bunene

¹⁴ Nakubi kwaamba ayi ndaakwisa uko onoono, ntookulembela milasho iyi kwaamba ayi

¹⁵ na ndaceelwa kwisa, makani aya eenka akakuboneshe bantu mbobeelete kwikala muŊanda yakwe Lesa, iyo ili ncecoonde cakwe Lesa muumi. Coonde ndyelicinko lya lushinisho alwiimbi lwa ndulo.

¹⁶ Ncakwiila shabushishi bwa kupaila kwesu nshinene abuumbi. Nsheeshi, Lakwe wakaboneka mubuntu, wakaambwa aMushimu Usalashi ayi ngooluleme, wakabonwa abaanjelo. Wakashimikilwa pakati ka baswamashi bakunsengwe, wakashomwa kubamucishi ca panshi coonse alimwi akutolwa kwiculu mubulemu.