1 Samwelo 9 - Baibo Busansulushi Bwa Libuku Ili

Saulo mbwaakabonana aSamwelo

¹ Ono kwakalinga musankwa mubile alimwi wakalinga kulemekwa abuumbi uyo wakalinga kwiitwa ayi Kishi wa mumukowa wakwe Benjameni. Wakalinga mwanaakwe Abiyelo alimwi mwishikulu wakwe Seloli. Kishi wakalinga womwi wa bamuŋanda yakwe Bekolati, wa mucipani cakwe Afiya.

² Uyo musankwa wakalinga kucite mwaana wiitwa ayi Saulo. Wakalinga musankwa mubotu ciwa abuumbi. Saulo wakalinga mulaamfu pabamwi boonse muIsilaeli alimwi ngowakalinga kwiindaawo kubota ciwa.

³ Bumwi bushiku mbongolo shakwe Kishi shakalinga shasoweka. Mpeeke wakaambila Saulo mwanaakwe ayi, “Bwesaawo musebenshi womwi muye mukalangoole mbongolo.”

⁴ Wakanyamuka akwiinda mucishi ca tulundu cakwe Efuleemu amucishi ca Shalisha, sombi tabakwe kushicana. Lyalo bakeenda mucishi ca Shaalimu, sombi tabakwe kushicana akwalo uko. Mpeeke bakeenda mucishi cakwe Benjameni, nakubi boobo amwalo umo tabakwe kushicana.

⁵ Ndibakashika mucishi ca Sufu, Saulo wakaambila musebenshi wakwe ayi, “Atuboolele kumushi mukwiinga bata batootalika kulisukama pali ndiswe kuleka mbongolo.”

⁶ Musebenshi wakakumbula ayi, “Taanguna! Mundabala iyi muli muntu wakwe Lesa uyo ulemekwa abuumbi ceebo shoonse nshaamba shilacitika kweelana abwaamba. Atushikeeko mpashi inga watulwiita nkweenga twashicana mbongolo.”

⁷ Saulo wakeepusha ayi, “Ono tuye kuli nguwe, inga twamupawonshi? Shakulya ashalo nshetwalinga twanyamuna shamana. Sa te taaku shacaalaako nsheenga twamupa?”

⁸ Musebenshi wakakumbula ayi, “Ndicite lyaali lya silifa liniini. Inga ndamupa ndilyo kwaamba ayi atulwiite nkweenga twacana mbongolo shesu.”

⁹ Ono paciindi ico muIsilaeli, mulaluki wakalinga kwiitwa ayi shikubona. Aboobo muntu wayanda kuya mukwiipusha Lesa mwiipusho, wakalinga kwaamba ayi, “Tiya tukabone shikubona.”

¹⁰ Mpeeke Saulo wakakumbula ayi, “Wayeeya kabotu! Katiya.” Aboobo bakaya mundabala iyo umo mwakalinga kwikala muntu wakwe Lesa uyo.

¹¹ Lyalo ndibakalinga kuya citanta kalundu pakalinga ndabala iyo, bakakumanya banakashi bacikula bwangu kabaswa ayi bakateke maanshi. Lyalo bakabeepusha ayi, “Sa shikubona mwaali mundabala?”

¹² Banakashi balya bakakumbula ayi, “Ee, nkwaali alimwi ulibo panembo lyanu. Na mweendeshe mutoomucana washika sunu mundabala ceebo bantu batooyanda kubenga mulambu pakalundu pacipaililo.

¹³ Mwashikabo mundabala mutoomucana kaatana kuya pakalundu mukulya. Mukwiinga bantu tabakoonshi kutalika kulya kaatana kushika uko akusengela coolwe mulambu. Lyalo bantu batambwa ndyeenga balya. Ono kamuya, mulamucana ciindi ceenka cino.”

¹⁴ Mpomunyaawo Saulo amusebenshi wakaya mundabala. Ono ndibakalinga kuya cinjila, wakabona Samwelo keesa ayi aye kucipaililo pakalundu.

¹⁵ Ono bushiku bwakeenda Mwaami Lesa wakaambila Samwelo ayi,

¹⁶ “Paciindi ceenka ici ciilo ndaakutuma musankwa kuswa mumukowa wakwe Benjameni. Ukamunanike mafuta a bwaami kwaamba ayi akeendeleshe bantu bangu bene Isilaeli. Ulaakubafuna kuswa kubene Filisiti. Bantu bangu ndababona mbobapenga alimwi ndanyuumfwa kulila kwabo.”

¹⁷ Samwelo ndyaakabonabo Saulo, Mwaami Lesa wakamwaambila ayi, “Ngowooyu musankwa ngondakakulwiitaawo. Ulaakweendelesha bantu bangu.”

¹⁸ Lyalo Saulo wakaya pakalinga Samwelo ceebo lakwe wakalinga kufwaafwi amwinjililo wa ndabala. Mpeeke wakamwiipusha ayi, “Ntokwiipushaako, ino kwikala shikubona nkuli?”

¹⁹ Samwelo wakakumbula ayi, “Ndime. Amutanjile kucipaililo pakalundu ndamucana. Nobilo noonse sunu mulyeelete kulya anebo. Ciilo macuunsa ndaakukumbula miipusho yanu yoonse akumushindikila.

²⁰ Ono mbuli mbongolo shotatwe shakasoweka isona, mutalisukami pali nshisho. Shacanika kale. Sombi cinene nkwishiba wooyo bene Isilaeli ngobatoolila. Sa te ndiwe? Ee, ndiwe abamuŋanda ya baiso.”

²¹ Saulo wakakumbula ayi, “Nebo ndi wamumukowa wakwe Benjameni, mukowa wiindaawo kuceya muIsilaeli alimwi bamuŋanda ya bata mbobeendaawo kuceya pakati ka bene Benjameni. Ono nceebonshi mwaamba mushobo uyu kuli ndime?”

²² Mpeeke Samwelo wakatola Saulo amusebenshi wakwe mucipinda cinene akubekalika kutebulu nkoyakalinga kunembo, uko kwakalinga kushiitile bakatambwa abo bakalinga mpashi makumi otatwe.

²³ Mpomunyaawo Samwelo wakaambila shikuteleka ayi, “Leta nyama ilya njindakupa akukulwiita ayi wiibike palubasu.”

²⁴ Mpeeke shikuteleka wakaleta nyama ibotu ya kumweendo akwiibika kunembo lyakwe Saulo. Mpomunyaawo Samwelo wakaamba ayi, “Bona, njeeyi nyama yabambilwa ndiwe, ilye ndeesungila ndiwe ayi ulye paciindi ici pantu pomwi abantu aba mbondakatamba.” Saulo wakalya aSamwelo ubo bushiku.

²⁵ Ndibakakunkuluka kuswa pacipaililo pakalundu akuya mundabala, bakayalila Saulo paciluli ceelenebo citakuneme.

²⁶ Mpeeke wakoona apo. Kumuyamaca Samwelo wakoolobesha kuli Saulo paciluli ayi, “Buka, nkushindikile.” Saulo wakabuka. Lyalo lakwe aSamwelo bakaya kumukwakwa.

Samwelo mbwaakananika Saulo mafuta a bwaami

²⁷ Ndibakashika kweela ndabala, Samwelo wakalwiita Saulo ayi, “Aambila musebenshi wako atanjileeko.” Musebenshi wakaya, mpeeke Samwelo wakatolelela akwaamba ayi, “Imikana apa kwa ciindi ciniini, ntookulwiita ico Mwaami Lesa caamba.”