1 Samwelo 8 - Baibo Busansulushi Bwa Libuku Ili

Bene Isilaeli mbobakasenga mwaami

¹ Samwelo ndyaakacembela, baana basankwa mbwaakapa boomboloshi muIsilaeli.

² Munene bantu wakalinga kwiitwa ayi Jowelo, mwanike bantu kaali Abija. Bakalinga boomboloshi muBiyasheba.

³ Ono tebakalinga kweensha mulimo uyo kweelana ambobakalinga kubona baishiwabo kabacita. Balo bakalinga kusunibo kucana maali. Aboobo bakalinga kutambula makulo akoombolosha cakunyengelela.

⁴ Mpeeke bamaloba ba bene Isilaeli bakabungana, baya kuli Samwelo muLama

⁵ akwaamba ayi, “Amubone mwebo mwakuula, alimwi bana banu tabatookonkela mbomwakalinga kucita. Anu amusale mwaami pakati kesu atweendeleshe kwaamba ayi aswebo tubeewo amwaami bubete mishobo imwi.”

⁶ Samwelo taakwe kusekelaamo mukusenga kwabo, Aboobo wakapaila kuMwaami Lesa.

⁷ Mwaami Lesa wakaamba ayi, “Nyumfwila shoonse bantu nsheenga baamba kuli ndiwe. Tabatookaka ndiwe, sombi nebo. Ndime bakaka kunoocili mwaami wabo.

⁸ Kuswabo ndindakabakusha muIjipiti bantu aba lyoonse mbeshikunkaka akunootalika kulambila balesa bamwi. Ono mbulya kuli ndiwe batoocita shikani sheenka nshebashibite kucita kuli ndime.

⁹ Anu aboobo banyumfwile, sombi ubacenjeshe cakushinisha akubasansulwita bamaami baabo mbweshi bakanoobacita.”

¹⁰ Mpeeke Samwelo wakalwiita bantu abo bakalinga kusenga mwaami shoonse Mwaami nshaakamwaambila.

¹¹ Samwelo wakasansulula ayi, “Bamaami banu mbulya mbweshi bakanoomucita. Bana banu basankwa balaakunoobabika mulikoto lya bashilumamba. Bamwi balaakunooba bashilumamba balwanina mushikoci sha maaki, bamwi beshikulwanina pamaaki, bamwi balaakunoolibo beshikutanjilila beshikulwanina mushikoci abo.

¹² Bamwi balaakunooba bamatanjilili ba bashilumamba bali cuulu, bamwi ba bali makumi osanwe. Bana banu basankwa balaakunoolima myuunda yakwe, kwiitebula akupanga sheensho ashisebensesho sha beshikulwanina mushikoci sha maaki.

¹³ Bana banu banakashi mbweshi bakanoomupangila mafuta anunkila kabotu, bamwi kunootelekela mwaami alimwi bamwi kupanga shinkwa.

¹⁴ Ulaakumunyaya myuunda ibotu, ayeeyo mulimwa minyansa nabi maolifi, akwiipa bacinenenene bakwe.

¹⁵ Ulaakunoobwesa calikumi ca shili anga ngamaila aminyansa kwaamba ayi ape beshikumucafwa abacinenenene bakwe bamwi.

¹⁶ Ulaakunoobwesa basebenshi banu basankwa abanakashi, ŋombe shanu shibotu alimwi ambongolo kwaamba ayi asebenseshe.

¹⁷ Ulaakunoobwesa cipansha ca likumi ca mbelele ampongo shanu, alimwi mwebo nweenka mulaakunooba basha bakwe.

¹⁸ Ciindi ico cakushika mulaakutongooka cakulilaako ceebo ca mwaami ngomwakasala nobeene. Sombi Mwaami Lesa teshi akakutikeewo matongooshi anu.”

¹⁹ Bantu abo tabakwe kumunyumfwila Samwelo, sombi bakatolelela kwaamba ayi, “Sobwe, swebo tulisunibo mwaami,

²⁰ kwaamba ayi aswebo tube bubete mishobo imwi. Tube amwaami wesu weelete kutweendelesha, kututanjilila kuya kunkondo akulwana sobeene.

²¹ Samwelo wakanyumfwa shoonse nshebakaamba. Lyalo wakaya walwiita Mwaami Lesa.”

²² Mwaami wakakumbula ayi, “Cita ncebasuni akubapa mwaami.” Mpeeke Samwelo wakalwiita bamaloba ba bene Isilaeli ayi baboolele kumaandaabo.