1 Samwelo 21 - Baibo Busansulushi Bwa Libuku Ili

Defedi mbwaakacica kuswa kuli Saulo

¹ Mpeeke Defedi wakaya kumupailishi Aimeleki kuNobu. Aimeleki wakaswa ayi akumanye Defedi kaatutuma akumwiipusha ayi, “Ino weenda buyani weenka sunu kwisa kokuno?”

² Defedi wakakumbula ayi, “Kuli ncaantuma mwaami ayi ncite, alimwi wankasha kulwiita muntu nabi womwi milasho njaampa. Bantu bangu balo ndabalwiita kale nkoonjelete kukumaninaabo.

³ Ono mulicitewonshi shilikwa? Amumpewo shinkwa osanwe, nabibo cakulya cimwi cili coonse nceshi mucane.”

⁴ Sombi mupailishi wakakumbula Defedi ayi, “Nshiciteewo shinkwa umwi uli woonse, sombi inga ndakupa cimaande cakabikwa palubasu ayi ncakwe Lesa, kulilabo na bantu bako tabakwe kukumanaawo abalutundu coonoono.”

⁵ Defedi wakakumbula ayi, “Ee, tulalitalamusha kubalutundu lyoonsebo na tulicite lweendo naluceyi. Ono inga twabulilaanshi kulicata bulya mulweendo lusalalite mbuli loolu!”

⁶ Aboobo mupailishi wakapa Defedi cimaande cakabikwa palubasu ayi ncakwe Lesa, mukwiinga temwakalingawo shinkwa umwi uli woonse. Kwakalingabo cimaande ico cakakushikwa kunembo lya Mwaami Lesa ayi kubikwe cicikasaala bushiku bweenka ubo cimwi mbocakakushikwaako.

⁷ Ono musebenshi wa mwaami Saulo wakalingaawo bushiku ubo kaacita kweelana ambwaakashomesha cakulumbila kunembo lya Mwaami Lesa. Wakalinga Dowegi mwine Edomu, mutanjilili wa beembeshi bakwe Saulo.

⁸ Defedi wakeepusha Aimeleki ayi, “Sa tamuciteewo lisumo nabi mupeeni muno? Nshikwe kuletaawo mupeeni nabi cakulwanisha cili coonse mukwiinga ncaantuma mwaami ncalubilo.”

⁹ Mupailishi wakakumbula ayi, “Taaku mupeeni uliiko kulekabo wakwe Golyati mwine Filisiti ulya ngowakacaya muCinyika ca Ela. Ulipombeletwe mucisani, kwisule lya cakufwala ca bupailishi ciitwa ayi efodi. Na ulauyanda ubwese.” Defedi wakaamba ayi, “Amumpe weenka uyo taaku aumwi wiinda wooyo.”

Defedi mbwaakaya kuGati

¹⁰ Mpeeke pabushiku ubo Defedi wakaloboka kuswa kuli Saulo akuya kuli Akishi mwaami wa kuGati.

¹¹ Sombi bacinenenene bakwe Akishi bakaamba ayi, “Sa te ngoDefedi mwaami wa cishi cine mishaabo? Sa te ngowooyu balutundu ngobakalinga kwiimbila ayi, ‘Saulo wakacaya shuulu ashuulu, Defedi wakacaya makumi amakumi a shuulu?’ ”

¹² Cikani ico Defedi cakamucata kumoyo abuumbi akuloonda Akishi mwaami wa kuGati.

¹³ Mpeeke wakalicinkushacinkusha pameenso abo kushikila ndyaakaswaako. Wakalinga kukwaloola pacisasa ca kumwinjililo akuleka mate kaapwelela pandesu.

¹⁴ Lyalo Akishi wakaambila bacinenenene bakwe ayi, “Abone musankwa ulya! Ulicinkukite! Anu mwakamuletelanshi kuli ndime?

¹⁵ Sa ndabula basankwa bashilu cakwaamba ayi inga mwaleeta musankwa uyu ayi anoocita bobulya kunembo lyangu? Sa musankwa uyu ulyeelete kwinjila amuŋanda yangu?”