1 Samwelo 2 - Baibo Busansulushi Bwa Libuku Ili

Mupailo wakwe Aana

¹ Mpeeke Aana wakapaila ayi, “Mwaami Lesa wansangalasha abuumbi, Ndikondetwe abuumbi ceebo ca ceeco ncaacita! Balwani bangu ntoobaseka. Ndisangalete abuumbi ceebo Lesa wancafwa!

² “Taaku usalalite mbuli Mwaami Lesa, taakuuwo uli mbuli nguwe, taaku mwaandami uli mbuli Lesa wesu.

³ Anu cileke kutumbama. Ee, maswi akulisumpula aamane. Ceebo Mwaami Lesa, nguLesa ushi shoonse, ngowoombolosha shoonse shicita bantu.

⁴ Mata a bashilumamba bashimpite atyokooka, sombi balefukite mbobaba beshinkusu.

⁵ Bantu bakalinga kukuta, bulya balacana shakulya mukusebensela bamwi. Sombi bakalinga beshinsala, bulya nsala yamana. Mwanakashi watakalinga kuciteewo baana, bulya waba abaana bali bosanwe abobilo. Sombi uyo wakalinga kucite baanji, bulya wacaalabo.

⁶ Mwaami Lesa ngooleta lufu akupa buumi. Ulatuma bantu kumusena wa bafu akubapilusha kubuumi.

⁷ Ulalengesha bantu bamwi kukanduka, bamwi kubila. Ulaceesha bamwi akusumpula bamwi.

⁸ Ulasumpula bakandu kuswabo kwiine kumiyanda, ulakusha bakandu kuswa mubuumba bwabo. Ulabalengesha kwikala mubwanabwankashi abanaabaami akubalengesha kuba mumisena ya bulemu. Lwiimbi loonse lwa nsengwe ndwa Mwaami Lesa, pali ndulo mpaakayaka cishi ca panshi.

⁹ “Lesa ulalama buumi bwa bantu bakwe bashomeka, sombi beshishibiibi balalobela mumunshinshe, ee, muntu taakomi kwiinda munkusu shakwe mwiine.

¹⁰ Balwani ba Mwaami Lesa balaakunyonyoolwa, ulaakubakalalila mbuli cilulumo ca mfula kuswa kwiculu, Mwaami Lesa ulaakoombolosha cishi ca panshi coonse. Ulaakupa nkusu mwaami ngwaakasala, mwaami uyo ulaakumulengesha kukoma.”

¹¹ Lyalo Elikana wakaboolela kuLama kumishaabo. Sombi Samwelo musankwa mwanike wakacaala kuShilo, kaasebensela Mwaami Lesa mubutanjilili bwakwe Eli mupailishi.

Baana basankwa bakwe Eli

¹² Bana bakwe Eli basankwa bakalinga babiibi. Tebakalinga kunyumfwila Lesa

¹³ nabi kulemeka milasho ya pashintu bapailishi nshebeelete kupekwa. Balo bakalinga kucita na muntu utoobenga mulambu, musebenshi wa mupailishi nkwisa afoloko wa meeno otatwe. Nyama iyo keecipya,

¹⁴ wakalinga kuyasa foloko mumupika akupa mupailishi cipumputa cili coonse ceenga cacatilila kufoloko. Bene Isilaeli boonse bakalinga kwisa kuShilo, bana bakwe Eli bakalinga kubacita mbomunya ubo.

¹⁵ Kwiilikawobo apa, mafuta kaatana kukushikwaawo akutentwa musebenshi wa mupailishi wakalinga kwisa akwaambila shikubenga ayi, “Amumpewo nyama mupailishi akateente. Teshi asumineewo kutambula nyama yakuteleka kuswa kuli ndimwe citobo ibishi.”

¹⁶ Ono na muntu wakumbula ayi, “Sobwe, atucite ciluleme. Atutaangune tutente mafuta, lyalo ndyeshi mubwese ncemusuni.” Musebenshi wa mupailishi wakalinga kwaamba ayi, “Sobwe ubo! Amumpe bulya bweenka! Na mubule kumpa, ntoobwesabo munkusu!”

¹⁷ Cibiibi cakalinga kucita bana bakwe Eli cakakomena abuumbi pameenso aMwaami Lesa, mukwiinga milambu yakalinga kupekwa kuli nguwe bakalinga kuyeendelesha cakuteepa bulemu.

Samwelo kuShilo

¹⁸ Sombi Samwelo abwanike bwakwe, wakatolelela kusebensela Mwaami Lesa. Wakalinga kufwala cakufwala ca bupailishi ciitwa ayi efodi.

¹⁹ Mwaaka amwaaka banyina bakalinga kumutungila kamungaanjo akumutolela pakuya abeebaabo kuShilo mukubenga mulambu wa pamwaaka.

²⁰ Mpeeke Eli wakalinga kupa coolwe Elikana aAana, akwaambila Elikana ayi, “Mwaami Lesa aakupe baana baambi kwiinda mumwanakashi uyu Aana, kwaamba ayi babwese musena wa wooyu ngowakabenga mumaansaakwe.” Na bamanisha bakalinga kuboolela kumishaabo.

²¹ Mwaami Lesa ncakwiila wakapa coolwe Aana. Mpeeke wakaba abaana basankwa abamwi botatwe abanakashi bobilo. Mwanike Samwelo wakakomena mumulimo wa Mwaami Lesa.

Eli abana bakwe

²² Ono Eli wakacembela abuumbi. Wakalinga kunoonyumfwabo shoonse shakalinga kucita bana bakwe kubene Isilaeli alimwi akwaamba ayi balakumana abanakashi bakalinga kusebensa pamwinjililo wa Tente ya Cipangano.

²³ Aboobo wakabaambila ayi, “Mutoocitilanshi shintu sha mushobo uyu? Bantu boonse balandwiita shabubi mbomutoocita.

²⁴ Amucileeke nobana bangu! Cintu ici bantu bakwe Lesa ncebatokwaamba pali ndimwe cilayoosha!

²⁵ Muntu na wabishisha muntunyina, Lesa inga wamucafwa. Ono na muntu wabishisha Mwaami Lesa, ngani weenga wamwiimikanina?” Nakubi boobo tabakwe kunyumfwila baishiwabo ceebo Mwaami Lesa wakalinga wacibamba kale ayi bafwe.

²⁶ Mwanike Samwelo wakalinga kuya bukula akuya ciba muntu ukondelesha Mwaami Lesa abantu boonse.

Shakaamba mulaluki pabamuŋanda yakwe Eli

²⁷ Mulaluki wakaya kuli Eli mukumwaambila makani akaamba Mwaami Lesa ayi, “Aloni mushali wanu mukulukulu ndyaakalinga muIjipiti mubusha kumwaami Falawo abamuŋanda yakwe, ndakaliyubulula kuli nguwe.

²⁸ Ndakasala bamuŋanda yakwe pakati ka mikowa yoonse ya bene Isilaeli, kuba bapailishi bangu, beshikusebensela kucipaililo, kutenta tununkila kabotu akufwala cakufwala ciitwa ayi efodi pameenso angu. Ndakabapa ankusu shakucaasha cipansha ca mulambu womwi awomwi wa bene Isilaeli watentwa pacipaililo.

²⁹ Ono ceebonshi tootoolemeka milambu ashipo bantu bangu nshibeelete kupa ndime? Ino nceebonshi webo Eli ulalemeka bana bako kwiinda ndime mukubaleka ayi baliinishe beene ceebo cakulya shipansha shiindaawo kubota sha milambu yoonse bantu njebabenga kuli ndime?

³⁰ Kalekale nebo neMwaami Lesa, Lesa wa bene Isilaeli ndakashomesha ayi bamuŋanda yako abeshikamukowa wako bananooba bapailishi lyoonse alyoonse. Sombi bulya sunu casutuka! Nebo ndapa bulemu abo bampa bulemu akunyansha baabo bansebaanya.

³¹ Ono kutika, cilaakushika ciindi ndyeshi nkacaaye bacikula bwangu boonse ba muŋanda yako abeshikamukowa wako, kwaamba ayi kukabule musankwa ukula cakucembela mubamuŋanda yako.

³² Mulaakupenshekwa akukumbwa shoolwe shoonse nsheshi nkape bantu bamwi bene Isilaeli, sombi mubamuŋanda yako taaku nabi womwi weshi akashike kubucembele.

³³ Nakubi boobo ndaakushiyaawo womwi pabamulunyungu lwako weshi akabe mupailishi wangu. Ono ulaakupofola kukulila alimwi akupenga mumoyo. Bamwi boonse bamulunyungu lwako balaakufwa lufu lubiibi alimwi luyoosha kabacilibo basankwa bayumu.

³⁴ Ono Ofini aFineyasi, bana bako basankwa balaakufwa pabushiku bomwi. Ici cilaakukutondesha ayi shoonse nshendaamba shilaakucitika cancinencine.

³⁵ Ndaakusala mupailishi weshi akanooshomeka akucita shoonse nsheensuni ayi acite. Ndaakumupa bamulunyungu lwakwe abo beshi bakanoosebensabo pameenso a mwaami ngweshi nkasaale.

³⁶ Uyo woonse wamulunyungu lwako weshi akapuluke ulaakunooya kumupailishi uyo mukusenga maali ashakulya. Ulaakusenga ayi asuminishikwe kucafwa mupailishi kwaamba ayi anoocanako cakulya.”