1 Pita 5 - Baibo Busansulushi Bwa Libuku Ili

Litanga lyakwe Lesa

¹ Ono ntoolwiita bamatanjililima ba coonde pakati kanu. Ndakabona ambuli Klistu mbwaakapenshekwa alimwi ntoolindila kutambulaako bulemu bwakwe Klistu bweshi bukayubululwe.

² Amweembele litanga lyakwe Lesa ilyo ndyaakamupa kuteshi cakukakatishikwa, sombi cakukondwa kweelana akuyanda kwakwe Lesa. Mutasebensi mulimo wanu ceebo cakulangoolabo maali, sombi musebense amoyo woonse cakulibenga.

³ Mutabi anga mbamaami pabantu abo mbomutoolama, sombi mube abuumi bweenka mbomusuni ayi babaabo.

⁴ Ono na Mweembeshi Munene akese, mulaakutambula mushini wa bulemu uyo weshi ukabule kumana.

⁵ Amwebo nobasankwa bacikula bwangu mulyeelete kunoolibombya kubamanene basankwa. Noonse mulyeelete kunoolibambite kusebenselana cakuliceesha. Kweelana amaswi akwe Lesa aamba ayi, “Lesa ulakaka bantu balisumpula, sombi ulapa luse kubaabo baliceesha.”

⁶ Aboobo amuliceeshe pameenso akwe Lesa shinkusu kwaamba ayi akamusumpule paciindi ceelete.

⁷ Amutole kulisukama kwanu koonse kuli nguwe ceebo ngoomulama.

⁸ Amucenjele akunoolibambite lyoonse mukwiinga Mubiibi, mulwani wanu, utokweendaanabo anga ninkalamu ifwite nsala itooyandoola wakulya!

⁹ Amutolelele kushoma cankusu akukaka Mubiibi mukwiinga mulishi ayi bashominyinaanu mucishi coonse ca panshi batoopenshekwa mbomunya ubo.

¹⁰ Pakumana kupenshekwa kwaciindi ciniini, Lesa shiluse loonse, uyo wakamwiita ayi kwiinda muli Klistu mukatambule bulemu bwakwe butamaani, ulaakumubotesha cakumaninina mumushimu. Ulaakumuyumya mulushomo, kumupa nkusu alimwi akumubika palwiimbi luyumu.

¹¹ Kuli nguwe kube nkusu shakweendelesha lyoonse alyoonse! Ameni.

Maswi akweelaako

¹² Nkalata ifwaafwi iyi, nguSailasi wanembelaako, uyo mukwabesu ushomeka. Ndisuni kwaamba ayi muyumyeyumye akumulwiitilisha ayi ulu ndoluse lwakwe Lesa lwiine lwiine. Lyoonse kamushoma muluse ulo.

¹³ Babyaanu ba mucoonde ca kuBabiloni, abo Lesa mbwaakasala bweenka mbuli ndimwe, bamwaansha. Alakwe Maako uli anga ngumwanaangu, wamwaansha.

¹⁴ Amwaanshanye mulusuno lwancinencine. Lesa amupe luumuno noonse nomuli muli Klistu.