1 Pita 3 - Baibo Busansulushi Bwa Libuku Ili

Banakashi abameebaabo

¹ Mbweeke ubo amwebo nobanakashi, mulyeelete kulibombya kubameebaanu, kwaamba ayi na bamwi pakati kabo tabashomi Maswi akwe Lesa, inga bashoma kwiinda mubwikaalo bwanu cakubula kwaamba maswi.

² Ncakwiila balaakushoma pakubona buumi bwanu bweelete bwakulilemeka.

³ Kulibotesha kwanu kutabibo kwapansengwe, mbuli koosa misusu, kufwala makosa agolodi alimwi ashakufwala shuulwa maali aanji.

⁴ Sombi akube kwa mukati mumoyo. Uku nkokulibotesha kutamaani, kwa buumi bwakuteekanya akulibombya. Buumi bwa mushobo wooyu Lesa mbwaabona ayi bulicite makwebo abuumbi.

⁵ Mbweeke ubo kale kale banakashi basalalite bakalinga kushoma muli Lesa, mbobakalinga kulibotesha. Ncakwiila bakalinga kulibombya kubameebaabo.

⁶ Sala mbwakalinga ubo. Wakalinga kunyumfwila Abulaamu akumwiita ayi, “Nkambo.” Aboobo inga mwaba anga mbana bakwe Sala kwiinda mukucita shiluleme alimwi akutaloonda cintu nabi comwi.

⁷ Amwebo nobasankwa mulyeelete kwikala calushibo lwa pacikwati abamakaanu. Amubalemeke mukwiinga banakashi mbantu batacite nkusu shiinji alimwi mulaakutambula cipo ca buumi butamaani pantu pomwi ambabo, ico Lesa ncaapa muluse lwakwe. Kamucita boobo kwaamba ayi Lesa anookumbula mipailo yanu.

Kupenshekwa ceebo ca bululami

⁸ Cakweelaako, noonse amucatane amoyo womwi akuba amyoyo ibombu. Mulyeelete kusunana abashominyinaanu akunoonyumfwilana nkumbu alimwi akuliceesha.

⁹ Na bantu bamubishisha nabi kumutukana, tamweelete kubabishisha nabi kubatukana amwebo. Sombi mwebo mulyeelete kusenga Lesa ayi abape coolwe mukwiinga Lesa wakamwiita kwaamba ayi mukatambule coolwe.

¹⁰ Kweelana abwaamba Malembo akwe Lesa ayi, “Uyo usuni kwikala buumi bubotu akukondwa munshiku sha buumi bwakwe, ulyeelete kucileka kwaamba shibiibi alimwi mulomo wakwe teshi ukaambe shabubeshi.

¹¹ Ulyeelete kusanduka kuswa kushibiibi akutalika kucita shiluleme. Ulyeelete kuyandoola akukonkela luumuno

¹² mukwiinga Mwaami Lesa ulalama baluleme alimwi ulakumbula mipailo yabo, sombi ulipatite bantu bacita bubi.”

¹³ Ino ngani weenga wamucitila shibiibi na kamucinkite manungo mukucita shibotu? Taakuuwo.

¹⁴ Sombi nabi mukapenshekwe ceebo ca bululami, kuli ndimwe ncoolwe. Mutaloondi bantu nabi kulisukama.

¹⁵ Sombi mumyoyo yanu kamulemeka Klistu mukwiinga ngoMwaami wanu. Munoolibambite lyoonse kusansulwita muntu uli woonse weenga wamwiipusha pakulangila nkomucite, sombi kamusansulula cakulibombya alimwi akumulemeka.

¹⁶ Amube amiyeeyo iluleme kwaamba ayi na bantu bamucobola ceebo ca shintu shibotu nshemucita kwiinda muli Klistu, bafwe nsoni ceebo ca sheesho nshebaamba.

¹⁷ Ncibotu kupenshekwa ceebo cakucita shiluleme, na kakuli kuyanda kwakwe Lesa, kwiinda kupenshekwa ceebo cakucita shibiibi.

¹⁸ Mukwiinga Klistu wakafwa linkanda lyomwibo kwaamba ayi Lesa alekelele shibiibi sha bantu boonse. Klistu lakwe uliluleme, ono wakafwita bataluleme kwaamba ayi babe beshicibusa bakwe Lesa. Wakacaikwa mumubili, sombi wakabushikwa mumushimu.

¹⁹ Mumushimu mweenka umo, wakaya mukushimikila mishimu yakalinga kwaangitwe muntolongo.

²⁰ Mishimu iyi yakalinga ya baabo batakwe kunyumfwila Lesa kale kale, ndyaakalinga kulindila amoyonteeka ciindi ico Nowa ndyaakalinga kupanga bwaato. Mwakalingabo bantu baniinibo, bosanwe abotatwe bakapuluka kumaanshi.

²¹ Maanshi ayo aleemikanina kubombekwa uko kumupulusha bulya kwiinda mukubushikwa kwakwe Jesu Klistu kuswa kubafu. Kubombekwa uku teshi kusamba pamubili ayi tukushe matombe, sombi nkushomesha Lesa amiyeeyo iluleme.

²² Jesu Klistu wakaya kwiculu alimwi uli kululyo lwakwe Lesa. Uko utokweendelesha baanjelo, beendeleshi alimwi abeshinkusu.