1 Makani 17 - Baibo Busansulushi Bwa Libuku Ili

Makani akaamba mulaluki Natani kuli Defedi

¹ Ono Defedi wakakalikana muŋanda yakwe ya bwaami. Bumwi bushiku wakeeta Natani mulaluki akumwaambila ayi, “Nebo bona ntookala muŋanda ya bwaami yakayakwa kabotu ashisamu sha sida. Sombi Libokoshi lya Cipangano lilishiitebo mutente.”

² Natani wakakumbula mwaami ayi, “Amucite cili coonse ncemutooyeeya mukalango kanu mukwiinga mwebo Lesa ulyaanu.”

³ Sombi mashiku eenkaayo Lesa wakaambila Natani ayi,

⁴ “Uye ulwiite musebenshi wangu Defedi ayi, ‘Teshi ndiwe weelete kunjakila Ŋanda ayi nookalaamo.

⁵ Kuswabo kuciindi ndindakafuna bene Isilaeli kuswa mucishi ca Ijipiti kushikila asunu, nshikwe kwikalaawo kale muŊanda. Ndakalinga kwikala mutente akuya cilonga musena amusena.

⁶ Mukweenda kwangu koonse abantu bene Isilaeli nshina kwiipushawo kale mutanjilili wangu uli woonse, uyo ngondakalisalila ayi alame bantu bangu ncaatakwe kunjakila ŋanda ya shisamu sha sida.’

⁷ “Ono ulwiite Defedi musebenshi wangu alimwi ayi, ‘Mwaami Lesa Shinkusu shoonse waamba ayi ndakakukusha kumafulo, ee, kubweembeshi bwa mbelele, kwaamba ayi ube muleli wa bantu bangu bene Isilaeli.

⁸ Ndakalinga awebo kuli koonse nkowakaya alimwi ndakakoma balwani bako ayi baswe kunembo lyako. Ndaakulengesha liina lyako kupuka mbweeke mbuli nkumenkume shimwi sha mucishi ca panshi.

⁹ Ndapa musena bantu bangu bene Isilaeli akubekalika mumo kwaamba ayi babe amishaabo. Lyalo kubule ubanyonyonganya tubili. Nkokwaamba ayi bamucita shibi teshi bakatolelele kubapensha mbuli kukalekale

¹⁰ alimwi akuswabo ciindi ndindakasala boomboloshi ayi batanjilile bantu bangu bene Isilaeli. Ono ndaakukupa luumuno mukulengesha balwani bako boonse bakushingulukite kubula luta. Nebo neMwaami Lesa ndaakukupa bamulunyungu.

¹¹ Webo waakufwa akuya mukoona kwakaya bamashali bako bakulukulu ndaakusala mwanaako wakushala omwiine kwaamba ayi akapyane bwaami bwako alimwi ndaakulengesha bwaami bwakwe kuyuma.

¹² Mwanaako uyo ngweshi akanjakile ŋanda alimwi ndaakulengesha cuuna cakwe ca bwaami ayi cikanooliikobo lyoonse alyoonse.

¹³ Ndaakuba baishi alakwe ulaakuba mwanaangu. Ndaakunoomusunibo lyoonse alimwi teshi nkamusuuleewo mbuli mbondakacita Saulo akumukusha munshila yako.

¹⁴ Ndaakumupa bweendeleshi pabantu bangu apabwaami bwangu kwalyoonse alyoonse. Buleelo bwakwe teshi bukamaneewo.’ ”

¹⁵ Natani wakaluula kuli Defedi shoonse isho Lesa nshaakamuyubulwita.

Mupailo wakwe Defedi

¹⁶ Mpomunyaawo Defedi wakenjila muTente lya Cipangano, waya wekala kunembo lya Mwaami Lesa akupaila ayi, “Anu nebo noBaami baLesa ndime ni? Abalo bamuŋanda yangu mbaani pameenso anu cakwaamba ayi inga mwanshisha mpoombete sunu?

¹⁷ Ono nobaLesa, pasheeshi shoonse mweelikaawo akushomesha shabamulunyungu lwangu nemusebenshi wanu kuciindi citoosa. NoBaami baLesa mucinanga anga ngumuntu usumpukite kwiinda bamwi boonse.

¹⁸ “Anu nebo neDefedi inga ndaambanshi acimwi? Mukwiinga mwebo mulinshi kabotu nebo nemusebenshi wanu.

¹⁹ NoBaami baLesa ceebo ca ndime nemusebenshi wanu aca kuyanda kwanu, mwakacita shintu ishi shinene akunjubulwita shintu shinene nshemwashomesha.

²⁰ “Taaku wiinda ndimwe alimwi taaku lesa aumwi, sombibo mwebo nweenka bweenka mbotunyumfwa amatwi esu.

²¹ Sa pacishi ca panshi paliwo mushobo uli mbuli wa bene Isilaeli uyo wa bantu mbomwakafuna kuswa mubusha ayi babe bantu banu? Taapuuwo. Mwakabacitila shintu shikankamika isho shakalengesha liina lyanu kuya mpuwo mucishi ca panshi coonse. Mwakatanda mishobo imwi kuswa kunembo lya bantu banu. Ee, bantu abo mbomwakafuna kuswa mucishi ca Ijipiti.

²² Ncakwiila mwakalisalila bene Isilaeli ayi babe bantu banu kwalyoonse alimwi mwebo noBaami baLesa mwaba Lesa wabo.

²³ “Ono anu noBaami baLesa kushomesha kwanu uku, nkomwakashomesha pali ndime nemusebenshi wanu abamulunyungu lwangu, amukulaame kwanshiku shoonse shicisa. Amukacite kweelana ambomwakashomesha

²⁴ kwaamba ayi liina lyanu linokwiinditewobo bulemu kwanshiku shoonse. Lyalo bantu bakanokwaamba ayi, ‘Ee, Mwaami Lesa Shinkusu shoonse nguLesa weendelesha bene Isilaeli!’ Munshila iyo mulaakupa coolwe bamulunyungu lwangu nebo nemusebenshi wanu ayi bakanokweendelesha bene Isilaeli lyoonsebo.

²⁵ “Ncakwiila nobaLesa bangu mwayubulula shintu shoonse kuli ndime nemusebenshi wanu alimwi mwaamba ayi, ‘Ndaakukupa bamulunyungu lwako beelete kuba mpyani sha bwaami bwako.’ Nceceebo ceeco ncindabulila boowa kupaila mushobo uyu.

²⁶ Mwebo noBaami baLesa muli baLesa alimwi mbulya mwashomesha shintu shibotu kuli ndime nemusebenshi wanu.

²⁷ Ono ndamusenga ayi mupe coolwe bamulunyungu lwangu kwaamba ayi batolelele kwikala mulusuno lwanu. Mwebo nobeene noBaami baLesa ndimwe mwashomesha kucita shintu shoonse ishi. NoBaami baLesa ndimwe mwakapa bamulunyungu lwangu shoolwe alimwi mulaakunoobapa shoolwe kwalyoonse alyoonse.”