1 Makani 14 - Baibo Busansulushi Bwa Libuku Ili

Micito yakwe Defedi muJelusalemu

¹ Ono Ilamu mwaami wa cishi ca Taya wakatumya beshinkombe, pantu pomwi aminkulwa ya shisamu sha sida, beshikuyakisha mabwe alimwi ababeseshi ba mapulanga. Mpeeke bakayakila Defedi ŋanda ya bwaami.

² Mpomunyaawo Defedi wakeshiba ayi Mwaami Lesa wayumya bwaami bwakwe pabene Isilaeli alimwi ayi bulelo bwakwe bwakasumpulwa abuumbi ceebo ca bantu bakwe bene Isilaeli.

³ MuJelusalemu umo Defedi wakeeba banakashi abamwi alimwi wakashala baana basankwa abanakashi abamwi.

⁴ Baana bakashalilwa kooko nguShamuwa, Shobabu, Natani, Solomoni,

⁵ Ibali, Elishuwa, Elipeleti,

⁶ Noga, Nefegi, Jafiya,

⁷ Elishama, Beliyada alimwi aElifeleti.

Defedi mbwaakakoma bene Filisiti

⁸ Bene Filisiti ndibakanyumfwa ayi Defedi wakananikwa kuba mwaami wa bene Isilaeli boonse, bakanyamuka abashilumamba babo boonse ayi bakamucate. Sombi Defedi wakanyumfwa cikani ico akuya mukukumanaabo.

⁹ Bene Filisiti bakashika kuCinyika ca Lafaimu akutalika kucisaala.

¹⁰ Mpeeke Defedi wakeepusha Lesa ayi, “Sa bene Filisiti nje nkabalwaane? Sa mutoobaaba mumaansaangu ayi mbakoome?” Mwaami Lesa wakakumbula ayi, “Koya, ntoobaaba mumaansaako ayi ubakoome.”

¹¹ Mpomunyaawo Defedi wakaya kuBaali Pelasimu uko nkwaakaya mukubakomena. Mpeeke wakaamba ayi, “Lesa wansebensesha kupula pabalwani bangu bweenka maanshi mbwaasefuka mumulonga.” Ono mboboobo musena uyo mbwaakautumba ayi Baali Pelasimu.

¹² Bene Filisiti bakashiya ashibumbwabumbwa shabo uko, lyalo Defedi wakaambila bashilumamba bakwe ayi bashiteente mumulilo.

¹³ Ono bene Filisiti bakaboolela akutalika kusaala Cinyika ca Lafaimu.

¹⁴ Ono Defedi wakeepusha Lesa alimwi, alakwe wakakumbula ayi, “Ee, sombi mutabalulami. Mubeende kwisule akubashinguluka, lyalo mubalwaane kunembo lya shisamu shiitwa ayi balusamu.

¹⁵ Na munyumfwebo coongo cakweenda kwa bashilumamba mwiculu lya shisamu isho, mweendeshe kulwana mukwiinga ingayi nebo neLesa ndatanjila kunembo lyanu kwaamba ayi nkome likoto lya bashilumamba bene Filisiti.”

¹⁶ Mpeeke Defedi wakacita kweelana abwakamwaambila Lesa. Lyalo likoto lya bashilumamba bene Filisiti bakalicaya kuswabo kuGibyoni kushikila akuGesa.

¹⁷ Lyalo Defedi wakaya mpuwo mushishi shoonse alimwi Mwaami Lesa wakalengesha mishobo yoonse kumuloonda.