1 Bene Tesalonika 3 - Baibo Busansulushi Bwa Libuku Ili

¹ Cakweelaako, ceebo cakwaamba ayi twakaalilwa kulicata pacikani cakutesa mukumufwakashisha alimwi, twakayeeya kucaala sweenka muAtenisi.

² Twakatuma Timoti mukwabesu muli Klistu, uyo ngotuli akwe pantu pomwi mumulimo wakwe Lesa wakushimikila Makani Abotu aamba pali Klistu. Twakamutuma kwaamba ayi ese amuyumyeyumye akushimpya lushomo lwanu,

³ kwaamba ayi kubule ushi aboole pesule ceebo ca mapensho ayo ali pakati kanu. Mwebo nobeene mulishi kwaamba ayi mapensho a mushobo uyu alasuminishikwa kweelana akuyanda kwakwe Lesa.

⁴ Ceebo nditwakalinga amwebo, twakamulwiitila limwi ayi tulaakupenshekwa alimwi kweelana ambomwishi ici cakacitika cancinencine.

⁵ Nceceeco ncendakatumina Timoti. Ndakaalilwa kulicata, aboobo ndakamutuma kwaamba ayi ese eshibe mbomwiimfwi mulushomo ceebo ndalinga kwaamba ayi cimwi ciindi Mubiibi wamusunka akulengesha mulimo ngotwakacita pakati kanu kubula mpindu.

⁶ Ono Timoti waboola kuli ndiswe akutuletela makani asangalasha abuumbi palushomo alusuno lwanu. Watulwiita kwaamba ayi kuyeeya ndiswe kulamulengesha kusangalala alimwi ayi mulisuni kwaamba ayi tukabonaneewo, bweenka aswebo mbotutookumbwa kubonanaawo amwebo.

⁷ Paceebo ceeco nobamakwesu, lushomo lwanu ndomucite muli Jesu lwatulengesha kuyumya myoyo mukuungumana amumapensho esu oonse.

⁸ Mukwiinga ono tulicite buumi bwancinencine, na muliimfwi cakutaboola pesule muMwaami Jesu.

⁹ Bulya ceebo canu tulakonsha kulumba Lesa. Twamulumba ceebo cakusangalala nkotucite pameenso akwe ceebo canu.

¹⁰ Malumwi amashiku tulamusenga camoyo woonse kwaamba ayi atusuminishe kubonanaawo amwebo alimwi. Tulisuni kumupa sheesho nshemutana kubaasho mulushomo lwanu.

¹¹ Ono Lesa Ishiwesu mwiine aMwaami wesu Jesu bakushe isho shoonse shitoolengesha lweendo lwesu lwakwisa kuli ndimwe, kutaswitilila.

¹² Mwaami Jesu aakomeneshe kusunana kwanu alusuno lwanu kubantu boonse kwaamba ayi shishike palusuno ndotucite pali ndimwe.

¹³ Lesa Ishiwesu ayumyeyumye myoyo yanu kwaamba ayi mubule kampenda alimwi musalale pameenso akwe, pakwisa Mwaami wesu Jesu abasalalite bakwe boonse.