1 Bene Kolinto 9 - Baibo Busansulushi Bwa Libuku Ili

Mutumwi nshaaelete kucita

¹ Sa nshaangulukite? Sa nshishi mutumwi? Sa nshikwe kumubona Jesu Mwaami wesu? Sa te ndimwe shisepo sha mulimo ngondakasebensela Mwaami?

² Nakubi kwaamba ayi bamwi tabanjeeyeli kuba mutumwi, sombi kuli ndimwe ncakwiila ndi mutumwi mukwiinga wa cibusa canu aMwaami Jesu mwebo nobeene mulatondesha ayi ndi mutumwi.

³ Abo bampikisha mbulya mbombakumbula,

⁴ sa tatweelete kunootambula cakulya ashakunwa?

⁵ Sa tatweelete kweenda abamakeesu bashoma motuya mbuli batumwi bamwi, bamakwabo Jesu alimwi aPita?

⁶ Sa nebo aBanabasi ndiswebo sweenka sotweelete kusebensa kwaamba ayi tucane nshetutacite?

⁷ Sa kuli shilumamba usebensesha maali akwe mwiine mumulimo wakwe? Sa kuli mulimi ushanga muunda wa minyansa wabula kulyaamo? Sa kuli ufuba ŋombe kwakubula kukamaako mukupa?

⁸ Sa aya makani ngoontokwaamba atooswabo mubusongo bwa buntu nabi alilembetwe amuMilawo?

⁹ Ceebo cililembetwe muMilawo yakwe Mose ayi, “Mutafwaliki cinsangala musune utoomulyatweetako maila kwaamba ayi alupuke.” Sa Lesa ulayeeya bunene musune?

¹⁰ Sa te wakaamba boobo bunene bunene ceebo ca ndiswe? Ishi shintu ncakwiila shakalembelwa ndiswe ceebo mulimi alimwi ashikutebula balasebensa mukwishiba ayi balaakutambulako shishango isho.

¹¹ Swebo twakamushangila shintu sha Mushimu, sa nciyumu kwaamba ayi mwebo mutupe shintu nshetutacite mubuumi bwesu?

¹² Na bamwi balicite nkusu shakulangila lucafwo ulu kuswa kuli ndimwe, sa te swebo tulicite nkusu shakulangila lucafwo kwiinda mbabo? Nakubi boobo tatukwe kusebensesha nkusu ishi, sombi twakasuula kwaamba ayi tutashinkili bantu kutambula Makani Abotu aamba shakwe Klistu.

¹³ Mwebo mulishi cakwiila ayi abo basebensela muŊanda yakwe Lesa balacana cakulya mweenka umo, abalo beshikubenga milambu pacipaililo balabaana milambu iyo ibengwa pacipaililo.

¹⁴ Mbweeke ubo Mwaami Jesu wakaamba ayi abo bashimikila Makani Abotu, balyeelete kucana cakulya kwiinda mukushimikila uko.

¹⁵ Ono nebo nshikwe kusebenseshaawo nkusu ishi alimwi nshintoolemba sheeshi kwaamba ayi ntalike kushisebensesha, sobwe. Inga cabota kufwa kwiinda kwaamba ayi umwi muntu walengesha ceeco ncendisumpwitaawo kubula mpindu.

¹⁶ Nsheelete kulisumpula ceebo cakushimikila Makani Abotu mukwiinga Mwaami Jesu ngowakandwiita kucita boobo. Mapensho kuli ndime na ndabula kushimikila Makani Abotu!

¹⁷ Nendakaliyandila kucita mulimo uyu, naakwiinga kaanangila kutambula cilambu. Ono mukwiinga nshikwe kuliyandila, ndasebensabo ceebo Lesa ngowakantuma.

¹⁸ Ino ono cilambu cangu nciinshi? Ncakwiila nkushimikila Makani Abotu cakutatambula malipilo alimwi asheelete kutambula muntu ushimikila Makani Abotu.

¹⁹ Nebo ndyaangulukite, nshibete musha wa muntu uli woonse. Nakubi boobo ndakalisandula musha kubantu boonse kwaamba ayi ndete baanji kuli Lesa.

²⁰ Pakati ka baJuda ndakekala anga ngumuJuda kwaamba ayi mbalete kuli Lesa. Nakubi kwaamba ayi nebo nsheendeleshekwi aMilawo yakwe Mose, kubaabo bali boobo, ndakekala anga anebo ndeendeleshekwa aMilawo kwaamba ayi abalo mbalete kuli Lesa.

²¹ Mbweeke ubo pakusebensa abaswamashi bakunsengwe, nentakonkeli Milawo yakwe Mose, sombi ndakekala mbuli mbabo kwaamba ayi mbalete kuli Lesa. Ici tacaambi ayi nshikonkeli Milawo yakwe Lesa, sombi ndeendeleshekwa amulawo wakwe Klistu.

²² Pakati ka bantu bacite lushomo luniini ndakekala mbweeke mbuli mbabo kwaamba ayi mbalete kuli Lesa. Aboobo kubantu boonse ndakekala mbweeke mbuli mbabo kwaamba ayi na kacikonsheka bamwi Lesa abapulushe.

²³ Shoonse ishi ndashicita ceebo ca Makani Abotu kwaamba ayi nebo pantu pomwi ambabo tukatambule shoolwe sha ngawo.

²⁴ Ncakwiila mulishi ayi bacica lubilo lwakupingana mbaanji, sombi utambula cilambu ngomwibo. Ono amwebo mulyeelete kucica cakutambula cilambu.

²⁵ Ono umwi aumwi usuni kuba mushisekano ulalitibuka mushintu shoonse kwaamba ayi akatambule mushini uyo utekaali aciindi cilaamfu. Sombi swebo tulacita boobo kwaamba ayi tukatambule mushini utamaani.

²⁶ Paceebo ceeco nshibete anga ngumuntu utoocicilabo ncaatabwene, nabi anga ngushikulwana uumabo muuwo.

²⁷ Nebo ndashibisha mubili wangu akuukoma. Ndacita boobo mukwiinga nshisuni kwaamba ayi ndaakumana kushimikila bamwi Makani Abotu nebo nkabule kutambula cilambu.