1 Bene Kolinto 6 - Baibo Busansulushi Bwa Libuku Ili

Milandu pakati ka bene Klistu

¹ Na umwi muntu pakati kanu kaacite makani amubye, ino nceebonshi nceenga watolela makani ayo kuboomboloshi bakunsengwe kuleka kubene Klistunyina?

² Sa tamwishi kwaamba ayi bene Klistu mbweshi bakoomboloshe bantu bakunsengwe boonse mucishi ca panshi? Ono na mulaakoombolosha cishi coonse, sa tamweelete koombolosha tukani tuniini twa mushobo uyu pakati kanu?

³ Sa tamwishi kwaamba ayi tulaakoombolosha abaanjelo? Ono inga ceela kuli pamakani apanshi pano?

⁴ Aboobo na mwaba atukani twa mushobo uyu, tamweelete kunootutola kubantu bakunsengwe bataaku mbobeemfwi mucoonde ayi batubaambe.

⁵ Ndaamba boobo kwaamba ayi munyumfwe nsoni. Sa ncakwiila mutoondwiita ayi taaku nabi womwi musongo pakati kanu weenga woombolosha bashominyina?

⁶ Sombi ncemucita ncakwaamba ayi, mushomi ulatola mushominyina kunkuta ya bantu bakunsengwe kwaamba ayi oomboloshekwe.

⁷ Ono caboneka kale kwaamba ayi mwaalilwa ceebo mulayanda kutola milandu yanu kunkuta sha bakunsengwe. Sa tacibete cibotu kwaamba ayi mwebo bantu bamubishishe? Ceebonshi tamulekibo bantu abo bamupambila shintu?

⁸ Sombi mwebo nweenka mulabishilana akwiipilana alimwi mulacita boobo akubashominyinaanu.

⁹ Sa tamwishi kwaamba ayi beshishibiibi boonse teshi bakenjile muBweene bwakwe Lesa? Mutalibeeci, boonse bafuule, balambila shibumbwabumbwa, beshibulale, basankwa boona abasankwanyinaabo,

¹⁰ beepi, balyabi, bacakolwa, beshimatushi nabi bapambi teshi bakenjile muBweene bwakwe Lesa.

¹¹ Ubo mbobabete bamwi pakati kanu. Sombi bulya mwakasanshikwa mwasalashikwa alimwi mwakalulamikwa muliina lya Mwaami Jesu Klistu aMushimu wakwe Lesa.

Amusebenseshe mibili yanu mukupa bulemu kuli Lesa

¹² Umwi muntu inga waamba ayi, “Nebo ndisuminishitwe kucita shili shoonse.” Ono teshi kwaamba ayi shintu shoonse nshibotu. Nebo inga ndaamba ayi, “Shintu shoonse shilisuminishitwe kuli ndime,” sombi inga nshileeki nabi comwi kungalula musha.

¹³ Aumwi muntu inga waamba ayi, “Cakulya nca lifumo, alyalo lifumo ndya cakulya.” Nakubi boobo Lesa ulaakunyonyoola shoonse shobilo. Mubili teshi wakucitisha bufuule napaceyi, sombi ngwakusebensesha mulimo wa Mwaami Jesu alimwi Mwaami ulaubambila shiyandika.

¹⁴ Lesa wakabusha Mwaami Jesu kuswa kubafu, ulaakutubusha aswebo kwiinda munkusu shakwe.

¹⁵ Mwebo mulishi kwaamba ayi mibili yanu nshipansha sha mubili wakwe Jesu Klistu. Ono sa inga ndabwesa cipansha ca mubili wakwe Jesu akucipaankanya amufuule? Napaceyuubo.

¹⁶ Nabi mpashi tamwishi kwaamba ayi muntu ukumankanya mubili wakwe amufuule ulaba mubili womwi anguwe? Malembo akwe Lesa alaamba cakutashisa ayi, “Abo bobilo balaba mubili womwi.”

¹⁷ Sombi uyo ulyaaba kuMwaami Jesu, ulaba mubili womwi aJesu mumushimu.

¹⁸ Bufuule kamubutalamuka. Shibiibi shimwi shoonse shicita muntu tashibishi mubili wakwe, sombi cibiibi ca bufuule cilabisha mubili wakwe mwiine.

¹⁹ Sa tamwishi kwaamba ayi mibili yanu niŋanda ya Mushimu Usalashi uli muli ndimwe uyo Lesa ngwaakamupa? Buumi mbomucite ono teshi bwaanu, sombi mbwakwe Lesa.

²⁰ Lesa wakamuula amweelo unene, aboobo amusebenseshe mibili yanu mukumupa bulemu.