1 Bene Kolinto 5 - Baibo Busansulushi Bwa Libuku Ili

Cikani ca cikololo mucoonde

¹ Ono ntoonyumfwa kwaamba ayi kuli cikololo ciyoosha citoocitika pakati kanu ico bakunsengwe ncebatakoonshi kucita. Citokwaambwa ayi musankwa utokoona abanyina bakamucanaamo.

² Sombi mucilisumpula! Mwalinga kweelete kuungumana akukusha musankwa utoocita cintu ca mushobo uyo pakati kanu.

³ Nebo nshibete anu uko mumubili, sombi ndi amwebo mumuuya. Aboobo muntu uyo wacita cikani ico ndamupa kale mulandu, bweenka mbweenga ndaciita na kaandi amwebo.

⁴ Mwaakubungana muliina lya Mwaami Jesu, anebo mumuuya nkanooli amwebo, ankusu sha Mwaami wesu Jesu shikanooli aswebo,

⁵ mukaabe musankwa uyo kunkusu shakwe Satana kwaamba ayi mubili wakwe unyonyoolwe. Lyalo muuya wakwe ndyeshi ukapulushikwe pabushiku bwakwisa Mwaami Jesu.

⁶ Kulisumpula kwanu taaku mbokubete. Sa te mulyeeshi makani aamba ayi, “Tumena tuniini tulafufumusha mulwi wa fulaulo woonse?”

⁷ Mulyeelete kukusha cimena ca kale kale ca shibiibi kwaamba ayi mube bantu basalalite cakumaninina. Lyalo mutooba anga ngumulwi upya utacite cimena alimwi mboonshi kwaamba ayi mbomubete ubo. Ceebo Klistu mwanaambelele wesu wa Pasika, wa bushiku bwakwiibaluka kusotokela, wakacaikwa kale.

⁸ Aboobo tulyeelete kusekelela bushiku bwesu bwa Pasika cakushomeka alimwi mulushinisho isho shili anga ngushinkwa utacite cimena. Tatweelete kuba ashibiibi sha mushobo uli woonse isho shiimikaninwa ashinkwa ucite cimena.

⁹ Munkalata njendakamulembela ndakamulwiita ayi mutaciti shibusa abantu beshishikololo.

¹⁰ Ono nshindakalinga kwaamba bantu bakunsengwe abo beshishikololo, balyabi, beepi nabi beshikulambila shibumbwabumbwa. Necalinga boobo, naakwiinga mwakaswaamo kale mucishi ca panshi.

¹¹ Sombi ndakalinga kwaamba ayi tamweelete kupanga cibusa amuntu uliita ayi ngumuKlistu, sombi kaali shicikololo, mulyabi, shikulambila shibumbwabumbwa, shikwaamba shibiibi kubabye, cakolwa nabi mwiipi. Tamweelete kulya amuntu wa mushobo uyo.

^12-13 Koombolosha bakunsengwe teshi mulimo wangu. Lesa ngowoombolosha bakunsengwe. Ino sa mwebo tamweelete koombolosha bashominyinaanu babisha? “Amukushe muntu mubiibi pakati kanu,” kweelana abwaamba Malembo akwe Lesa.