1 Bene Kolinto 3 - Baibo Busansulushi Bwa Libuku Ili

Basebenshi bakwe Lesa

¹ Nebo palwaangu nobamakwesu, ndakaalilwa kumwaambila mbuli bantu bacite Mushimu Usalashi. Sombi ndakamwaambila mbuli bantu bakunsengwe, nabi mbuli baana mubuKlistu.

² Ndakamupa mukupa kuteshi shakulya shiyumu ceebo kamutana kushikaawo. Alimwi abobulya tamweelete shakulya shiyumu.

³ Mwebo mucicita shintu shakunsengwe. Ceebo na kapacili munyono akwaambana pakati kanu, sa ingayi ubo tamubete mbuli bakunsengwe?

⁴ Na bamwi pakati kanu balaamba ayi, “Tulakonkela Paulo,” abalo bamwi ayi, “Tulakonkela Apolosi.” Sa ubo tamubete mbuli bakunsengwe?

⁵ Anu Apolosi ngani? Alakwe Paulo ngani? Swebo tulibo basebenshi bakwe Lesa abo bakamulengesha ayi mushome. Womwi awomwi pakati kesu ulasebensa ncito iyo yakamupa Mwaami Lesa.

⁶ Nebo ndi anga ngumuntu wakashanga mbuto, alakwe Apolosi washitilila, sombi nguLesa ulengesha ayi shikule.

⁷ Mwaboona ayi ushanga autilila taaku mbobabete, sombi nguLesa ulengesha ayi shikule.

⁸ Aboobo taaku bupusano pali wooyo ushanga autilila ceebo Lesa ulaakulambula womwi awomwi kweelana amilimo njaakacita.

⁹ Swebo soonse tuli basebenshi bakwe Lesa, mwebo muli muunda wakwe. Alimwi muli Ŋanda yakwe Lesa.

¹⁰ Lesa muluse ulo ndwaakantondesha, nebo ndakakaba lwiimbi mbuli muyaki ucishi kabotu, sombi umwi muntu utooyakaawo. Ono womwi awomwi ulyeelete kucenjela mbuli mbwaatooyaka.

¹¹ Ceebo taaku muntu weenga wakaba lwiimbi lumwi kuleka loolo lwakakabwa kale. Lwiimbi ulo nguJesu Klistu.

¹² Mulwiimbi ulo muntu inga wayakisha golodi, silifa, mabwe amakwebo, nabi shisamu, bwiisu nabi matete.

¹³ Ono Bushiku bwakwisa kwakwe Klistu, milimo ya muntu ilaakuboneka patuba ceebo Bushiku ubo bulaakwiitondesha. Bushiku ubo bulaakwisa amulilo uyo weshi ukeeleshe kubota kwa milimo ya muntu womwi awomwi.

¹⁴ Na cakayaka muntu palwiimbi ulu capuluka mumulilo, muyaki uyo ulaakutambula cilambu.

¹⁵ Ono na cashukuta, ingayi mulimo wakwe wayabo amaanshi. Teshi akatambule cilambu. Lakwe mwiine ulaakupulushikwa, sombi anga ngumuntu wayokolwabo mumulilo.

¹⁶ Sa tamwishi kwaamba ayi mwebo muli Ŋanda yakwe Lesa alimwi ayi Mushimu wakwe Lesa ulekala muli ndimwe?

¹⁷ Aboobo na muntu wanyonyoola Ŋanda yakwe Lesa alakwe Lesa ulaakumunyonyoola. Ceebo Ŋanda yakwe Lesa ilisalalite alimwi mwebo ndimwe Ŋanda iyo.

¹⁸ Mutalibeeci. Na kuli muntu pakati kanu uyeeya ayi ngumusongo mubwikaalo bwa cishi ca panshi, ulyeelete kuba anga ngumuluya kwaamba ayi abe musongo wancinencine.

¹⁹ Ceebo busongo bwa buntu mbuluya mumeenso akwe Lesa. Bweenka bwaamba Malembo akwe Lesa ayi, “Lesa ulacatisha basongo mubucenjeshi bwabo.”

²⁰ Aamwi Malembo alaamba ayi, “Mwaami Lesa ulishi kwaamba ayi miyeeyo ya basongo taaku mboibete.”

²¹ Ono anu taaku muntu weelete kulisumpula ceebo ca sheesho shicita bantu. Mukwiinga shintu shoonse nshanu.

²² Paulo, Apolosi aPita, cishi cino, buumi nabi lufu, shiliiwo asheesho sheshi shikabeeko, shoonse nshanu.

²³ Amwebo muli bakwe Klistu, alakwe Klistu ngwakwe Lesa.