1 Bene Kolinto 14 - Baibo Busansulushi Bwa Libuku Ili

Shimwi pashipo shipa Mushimu Usalashi

¹ Amweeleshe cankusu kuba alusuno alimwi mubike myoyo yanu yoonse kushipo sha Mushimu Usalashi, bunene cipo cakwaamba maswi akwe Lesa.

² Mukwiinga waamba mumulaka weensu taambi kubantu, sombi kuli Lesa ceebo taaku muntu nabi womwi umunyumfwa. Mushimu Usalashi ngoomwaambisha makani akwe Lesa ashisitwe.

³ Sombi waamba maswi akwe Lesa ulaambila bantu kwaamba ayi bayuminishikwe, bacafwikwe alimwi akubakalika myoyo.

⁴ Uyo waamba mumulaka weensu ulalicafwa mwiine, sombi waamba maswi akwe Lesa ulacafwa bamucoonde boonse kukula mulushomo.

⁵ Ndisuni ayi noonse kamwaamba mumilaka yeensu. Nakubi boobo ndisuni bunene bunene kwaamba ayi noonse kamucite cipo cakwaamba maswi akwe Lesa. Ceebo uyo waamba maswi akwe Lesa uleendaawo pawooyo shikwaamba mumilaka yeensu citobo kapaliiwo shikusansulula nshaamba kwaamba ayi bantu boonse mucoonde bacafwikwe.

⁶ Ono nobamakwesu, na nkese uko nkanokwaambabo mumilaka yeensu, cilaakumucafwanshi? Sa te taakuuwo citobo ndamuletela sheesho Lesa nshaakanjubulwita, lushibo, maswi aswa kuli Lesa nabi lwiiyo lumwi?

⁷ Amuyeeye shintu shitacite maswi mbuli mutolilo nabi kalumbu. Muntu inga weshiba buyani lwiimbo lutoolishikwa na takatoolishikwa cakukumweeta mulwiimbo ulo?

⁸ Alimwi na shikulisha lupeenga lwa nkondo wabula kunoolisha kabotu, ngani weenga walibambila kuya kunkondo?

⁹ Mbweeke ubo ngani weenga wanyumfwa nshootokwaamba na makani akwe Lesa ayo ngowaamba mumilaka yeensu abula kusansululwa? Cilyeelenebo akwaamba weenka.

¹⁰ Mucishi ca panshi muli shishobo shiinji shipusenepusene, ono cishobo comwi acomwi cilicite ncecaamba.

¹¹ Nakubi boobo na ndabula kunyumfwa cishobo citokwaambikwa, muntu utokwaamba ulaba mweensu kuli ndime, anebo ndaba mweensu kuli nguwe.

¹² Ono ceebo cakwaamba ayi mulisuni abuumbi kutambula shipo sha Mushimu Usalashi, mulyeelete kweelesha kusebensesha bunene isho shicafwa bamucoonde kukula mulushomo.

¹³ Anu muntu waamba mumulaka weensu ulyeelete kupaila kwaamba ayi apekwe acipo cakusansulula nshaamba.

¹⁴ Ceebo na ndapaila mumulaka weensu, muuya ulapaila cancinencine, sombi maano angu taabiiko lubasu.

¹⁵ Ono ndyeelete kucita buyani? Ndanoopaila amuuya wangu, ono alimwi ndanoopaila amaano angu. Ndanokwiimba amuuya wangu, ono sombi ndanokwiimba amaano angu.

¹⁶ Ono na walumbabo Lesa mumuuya, shikukutikabo utaaku mbwaabete uliimo mulibungano, inga waamba buyani ayi, “Ameni” pakukutika kulumba kwanu? Ceebo nshemutokwaamba taashishiiwo.

¹⁷ Nakubi kwaamba ayi walumba kabotu, taaku muntu umwi ucafwikwa.

¹⁸ Ndalumba Lesa ceebo ndeendaawo kwaamba mumilaka yeensu pali ndimwe noonse.

¹⁹ Sombi mucoonde cilambotela kwaamba maswi alibo osanwe ayo akonsha kunyumfwa bantu kwaamba ayi njiishe bamwi, kwiinda kwaamba maswi ali shuulu likumi mumilaka yeensu.

²⁰ Nobamakwesu mutabi anga mbaana mumiyeeyo, sombi mube anga mbaana mukubula shibiibi, munooli bamanene mumiyeeyo.

²¹ MuMalembo akwe Lesa cililembetwe ayi Lesa wakaamba ayi, “Ndaakwaamba abantu bangu kwiinda mubantu baamba mushishobo sheensu, ndaakwaambaabo kwiinda mumilomo ya beensu, sombi bantu bangu teshi bakanyumfwileewo.”

²² Ono aboobo cipo cakwaamba mumilaka yeensu ncitondesho kubatashomi kuteshi kubashomi, sombi cipo cakwaamba maswi akwe Lesa ncitondesho kubashomi kuteshi kubatashomi.

²³ Ono na bashomi boonse babungana mucoonde akutalika kwaamba mumilaka yeensu alimwi na bantubo bamwi nabi batashomi besa benjila, sa teshi bakaambe ayi mwacinkuka?

²⁴ Sombi na womwi awomwi utookwaamba maswi akwe Lesa, umwi utashomi nabi muntubo umwi wenjila mucoonde, ulaakwishiba kwaamba ayi ngumucita shibi weelete koomboloshekwa aLesa kusheesho nsheshi akanyumfwe.

²⁵ Miyeeyo yakwe yoonse ya bushishi ilaakuletwa patuba alimwi ulaakufukama akalambile Lesa, akusumina patuba ayi ndushinisho Lesa mpwaali pakati kanu!

Nshila yakulambililaamo

²⁶ Ncentokwaamba nobamakwesu nceeci. Ndimubungana ayi mulambile, womwi inga kaacite lwiimbo, umwi cakwiisha, umwi kaacite maswi akamuyubulwita Lesa, umwi maswi mumilaka yeensu aumwi kaacite busansulushi bwa milaka yeensu iyo. Ono shoonse shilyeelete kusebenseshekwa kwaamba ayi shicafwe coonde kukula mulushomo.

²⁷ Na pali baliiwo basuni kwaamba mumilaka yeensu, bobilo nabi botatwe mbaanji, inga baamba cakupaana ciindi nkokwaamba ayi umwi amanisha pesa umwi. Ono palyeelete kuba ashikusansulula shitokwaambwa.

²⁸ Na taapuuwo ukonsha kusansulula, uyo waamba mumilaka yeensu, ulyeelete kuumuna akulibandikilabo mwiine alimwi aLesa.

²⁹ Bobilo na botatwe abo bapetwe shipo shakwaamba maswi akwe Lesa balyeelete kwaamba, bamwi kabanyumfwa na nshebatokwaamba nshalushinisho.

³⁰ Ono na umwi ushiite mulikoto watambula maswi kuswa kuli Lesa, utokwaamba ulyeelete kucileka.

³¹ Noonse inga mwaamba maswi akwe Lesa kulilabo na kamwaamba womwi womwi kwaamba ayi noonse mwiiye akuyuminishikwa.

³² Abo bacite cipo cakwaamba maswi akwe Lesa balyeelete kweendelesha kabotu cipo ico.

³³ Mukwiinga Lesa taasuni kunyonyongana, sombi ulisuni luumuno. Ono kweelana amushoonde shimwi shoonse sha bantu bakwe Lesa,

³⁴ banakashi balyeelete kuumuna muciindi ca kulambila. Tabasuminishikwi kwaamba alimwi bweenka bwaamba Milawo ya baJuda, tabeelete kweendelesha.

³⁵ Na balisuni kwishiba cimwi cintu, balyeelete kwiipusha bameebaabo kuŋanda. Ncintu cilensha nsoni mwanakashi kwaamba mucoonde.

³⁶ Maswi aswa kuli Lesa taakwe kuswa kuli ndimwe alimwi teshi ndimwe nweenka nomwakaatambula.

³⁷ Na kuli umwi uyeeya ayi ulicite cipo cakwaamba maswi akwe Lesa nabi cipo cimwi ciswa kuMushimu Usalashi, ulyeelete kwishiba kwaamba ayi ncentoomulembela bulya ngumulawo uswa kuMwaami Jesu.

³⁸ Ono na washisuula, Lesa alakwe ulaakumusuula.

³⁹ Ono aboobo nobamakwesu, amweeleshe cankusu kuba acipo cakwaamba maswi akwe Lesa, sombi kwaamba mumilaka yeensu mutakukaashi.

⁴⁰ Shintu shoonse shilyeelete kucitwa munshila ibotu alimwi mumulawo.