1 Bene Kolinto 11 - Baibo Busansulushi Bwa Libuku Ili

¹ Munoonkonkela ndime bweenka anebo mboonkonkela Klistu.

Bulemu bwa banakashi pakulambila

² Ndamulumbaisha ceebo lyoonse mulanjeeya alimwi mulakonkela nshendakamwiisha.

³ Ono ndisuni mwishibe kwaamba ayi Klistu ngumunene pamusankwa womwi awomwi. Musankwa ngumunene pamukaakwe, alakwe Lesa ngumunene pali Klistu.

⁴ Aboobo musankwa woonse upaila nabi ushimikila maswi akwe Lesa mucoonde mutwi kaufwete, ulasebaanya Klistu.

⁵ Alakwe mwanakashi upaila nabi ushimikila maswi akwe Lesa mucoonde kwakubula cakufwala kumutwi ulasebaanya ibaye. Cilyeelene amwanakashi wakaceswa munkunyu.

⁶ Na mwanakashi wabula kufwala cintu kumutwi ulyeelete kucesa. Ono kweelana ambocipa nsoni mwanakashi kuceswa munkunyu nabi kucesabo peculu, ulyeelete kufwalaako cintu kumutwi.

⁷ Musankwa taaelete kufwalako cintu kumutwi ceebo ncikoshanyo alimwi mbulemu bwakwe Lesa. Sombi mwanakashi ulatondesha bulemu bwa ibaye.

⁸ Ceebo musankwa taakwe kulengwa kuswa kumwanakashi, sombi mwanakashi wakaswa kumusankwa.

⁹ Alimwi musankwa taakwe kulengelwa mwanakashi, sombi mwanakashi wakalengelwa musankwa.

¹⁰ Paceebo ceeco aca baanjelo mwanakashi ulyeelete kufwala cintu kumutwi kutondesha kwaamba ayi ibaye ulicite nkusu pali nguwe.

¹¹ Mubuumi bwesu bwa buKlistu mwanakashi taaku mbwaabete kutaaku musankwa, alakwe musankwa taaku mbwaabete kutaaku mwanakashi.

¹² Ceebo bweenka mwanakashi mbwaakaswa kumusankwa, alakwe musankwa ulashalwa kumwanakashi. Ono shilengwa shoonse shilaswa kuli Lesa.

¹³ Ono amuciyeeye nobeene na cili kabotu mwanakashi kupaila kuli Lesa mucoonde kaatafwete cili coonse kumutwi.

¹⁴ Ncakwiila bwikaalo bwa lyoonse bulatondesha ayi musankwa na kaaba amisusu ilaamfu, inga ncalensha nsoni,

¹⁵ sombi misusu ilaamfu kumwanakashi ilamubonesha kabotu, ceebo Lesa wakamupa misusu ilaamfu kwaamba ayi cibe cakufwala kumutwi.

¹⁶ Ono na kuli weenga wayanda kupikishanya pacikani ici, inga ndaamba ayi swebo tatucite cimwi ncotushibite nabi cishibite bamushoonde shakwe Lesa shoonse.

Mulalilo wa Mwaami Jesu

¹⁷ Ono pamakani amwi ngonteelete kumulumbaisha ceebo kubungana kwanu teshi kubotu, sombi nkubiibi.

¹⁸ Kutaanguna ndakanyumfwa kwaamba ayi ndimubungana mushoonde shanu mulasalululana. Anebo ndasumina ayi cikani ici ncalushinisho paniini.

¹⁹ Ndushinisho palyeelete kuba kusalululana pakati kanu kwaamba ayi abo bali mubululami baboneke patuba.

²⁰ Ono ndimubungana, teshi Mulalilo wa Mwaami Jesu ngomulya.

²¹ Ceebo ndimulya umwi aumwi ulalya cakulya cakwe mwiine, paceebo ceeco bamwi balekalabo ansala, sombi bamwi balakolwa.

²² Sa tamucite maandaanu uko nkomweelete kulita cakukuta akunwa? Nabi na camubotela kusebaanya coonde cakwe Lesa akulensha nsoni bakandu? Ono sa mutooyeeya kwaamba ayi inga ndamulumbaisha pacikani ici? Nshikoonshi napaceyuubo.

²³ Ceebo maswi ngondakatambula kuswa kuMwaami ngoaayo anebo ngondakamulwiita. Maswi ayo ngakwaamba ayi Mwaami Jesu, mashiku ayo eenka ndyaakaabwa, wakabwesa cimaande,

²⁴ walumba Lesa, wacikomoona akwaamba ayi, “Uyu ngumubili wangu uyo waabwa ceebo ca ndimwe. Kamucita bobulya mukunjibaluka.”

²⁵ Mbweeke ubo ndibakamana kulya Mulalilo wakabwesa nkomeshi akwaamba ayi, “Nkomeshi iyi ncecipangano cipya cakwe Lesa ciyuminishikwa abulowa bwangu. Lyoonse pakunwa kamucita boobo mukunjibaluka.”

²⁶ Ici cilaamba ayi lyoonse ndimulya cimaande akunwita munkomeshi iyi mulaambilisha lufu lwakwe Jesu kushikila akaboole.

²⁷ Paceebo ceeco uyo woonse ulya cimaande ici akunwita munkomeshi iyi mukutalemeka Mwaami Jesu, ulicite mulandu kumubili abulowa bwakwe.

²⁸ Aboobo muntu woonse ulyeelete kuliyeeya mwiine kaatana kulyaako cimaande akunwita munkomeshi.

²⁹ Ceebo na wabula kwishiba ncocaamba mubili wa Mwaami Jesu pakulya cimaande akunwa munkomeshi iyo, ulaliletela bukali bwakwe Lesa.

³⁰ Nceceeco nobamwi ncemucishilwa akutyolooka mushiso alimwi bamwi ncebafwita.

³¹ Netwalinga kuliyeeya katutana kulya, naakwiinga bukali bwakwe Lesa tabwisi pali ndiswe.

³² Sombi Lesa ulatoombolosha akutondesha bukali bwakwe kwaamba ayi tutakacailwi pantu pomwi abatashomi nguwe.

³³ Aboobo nobamakwesu, kulilabo ciindi ndimutoolya Mulalilo wa Mwaami, kamulindilana.

³⁴ Alimwi na umwi ulifwite nsala ulyeelete kulita limwi kuŋanda kwaamba ayi mutakalileteli bukali bwakwe Lesa ceebo cakubungana kwanu. Ono shimwi shikani ndaakushibamba ndaakwisa.