1 Baami 3 - Baibo Busansulushi Bwa Libuku Ili

Solomoni mbwaakasenga busongo

¹ Solomoni wakapanga bushicibusa aFalawo mwaami wa kuIjipiti kweeba mwanaakwe. Wakamuleta mundabala ya Defedi umo mobakalinga kwikala kushikila ndyaakamanisha kuyaka ŋanda yakwe ya bwaami, Ŋanda yakwe Lesa alubumbu kushinguluka Jelusalemu.

² Ŋanda yakwe Lesa keetana kuyakwa bantu bakalinga kubenga milambu yabo pashipaililo shipusenepusene shiinji.

³ Solomoni wakalinga kumusuni Mwaami Lesa alimwi wakakonkela kwiisha kwa baishi baDefedi. Sombi alakwe wakalinga kubenga milambu akutenta tununkila kabotu pashipaililo shipusenepusene.

⁴ Bumwi bushiku wakaya kuGibyoni mukubenga milambu mukwiinga nkokwakalinga cipaililo cakalinga kupukite abuumbi. Uko Solomoni wakabengelaako milambu yakutenta ili cuulu.

⁵ Bushiku ubo Mwaami Lesa wakaboneka kuli nguwe muciloto akumwiipusha ayi, “Nciinshi ncoosuni ayi nkupe?”

⁶ Solomoni wakakumbula ayi, “Lyoonse mwakalinga kutondesha lusuno kuli bata baDefedi basebenshi banu mukwiinga bakalinga babotu, bashomeka alimwi baluleme mubushicibusa bwabo amwebo. Mwatolelela kubatondesha lusuno lwanu lunene alimwi lutamaani kwiinda mukubapa mwaana uyo utoopyana bwaami bwabo sunu.

⁷ “Ono noBaami baLesa, baLesa bangu mwansuminisha kupyana bwaami bwa bata, nacibi kwaamba ayi ncili mwanike alimwi nshishi abwakulela.

⁸ Mbulya ndi pakati ka bantu mbomwakasala ayi babe baanu, bantu abo baanji anga ngumuseese.

⁹ Aboobo amumpe busongo bwakukonsha kulela bantu banu cabululami akwishiba cibotu acibiibi. Kwabula boobo inga ndakonsha buyani kulela mushobo wa bantu banu uyu unene bobulya?”

¹⁰ Mwaami Lesa wakakondwa ayi Solomoni wasenga busongo.

¹¹ Lyalo wakamwaambila ayi, “Mukwiinga wasenga busongo akulela cabululami, kuleka kwikala buumi bulaamfu nabi bubile nabi kufwa kwa balwani bako,

¹² ntoocita ico ncewasenga. Ntookupa busongo alushibo kwiinda shakabawo kale amuntu uli woonse nabi nsheshi akabaasho.

¹³ Ntookupa asheesho nshootakwe kusenga. Mubuumi bwako ulaakuba abubile alimwi abulemu kwiinda bamaami boonse.

¹⁴ Ono na awebo unoonyumfwila akukonkela kwiisha kwangu amilawo bweenka bwakalinga kucita iso Defedi, ndaakukupa buumi bulaamfu.”

¹⁵ Solomoni wakapapuka akwishiba ayi Lesa walinga kwaamba anguwe muciloto. Mpeeke wakaya kuJelusalemu waya weemikana kunembo lya Libokoshi lya Cipangano lya Mwaami Lesa akubenga milambu yakutenta aya bwanabwankashi kuMwaami Lesa. Kuswawaawo bacinenenene bakwe boonse bakaba akusekelela uko mwaami nkwaakabapangila.

Solomoni mbwaakoombolosha mulandu ushupite

¹⁶ Bumwi bushiku banakashi bafuule bobilo bakesa kumwaami Solomoni akwiimikana kunembo lyakwe.

¹⁷ Umwi wakaamba ayi, “Nomulemekwa, uyu mwanakashi anebo tulekala muŋanda yomwi. Nebo ndakashala mwaana musankwa mweenka muŋanda umo alakwe kaliimo.

¹⁸ Ndipakeenda nshiku shobilo kuswa bushiku mwanaangu ndyaakashalwa, alakwe wakashala mwaana musankwa. Twakalingabo sobilo muŋanda umo, taaku aumwi wakalingaamo.

¹⁹ Bumwi bushiku mashiku kaalete wakamulimba mwanaakwe mumapuso akumucaya.

²⁰ Wakabuka mashiku, akubwesa mwanaangu musankwa kuswa kulubasu lwangu kaandete akumutola pabulo bwakwe. Lyalo wakabika mwaana ufwite pabulo bwangu.

²¹ Macuunsa ndibwakaca ndakabuka kwaamba ayi njamwishe mwanaangu, kucana ulifwite. Ndindakamulangishisha, ndakabona kwaamba ayi teshi mwanaangu.”

²² Sombi walutundu umwi ulya wakaamba ayi, “Sobwe! Mwaana muumi ngwaangu, ufwite ngwaako!” Walutundu mutaanshi wakakumbula ayi, “Sobwe! Mwaana ufwite ngwaako, uyu muumi ngwaangu!” Nkokwaamba ayi bakapikishanya bweenka ubo pameenso amwaami.

²³ Mpeeke mwaami Solomoni wakaamba ayi, “Uyu waamba ayi, ‘Mwanaangu ngooyu muumi, waako ngooyu ufwite,’ ono awebo waamba ayi, ‘Sobwe, waako ngooyu ufwite, nebo wangu ngooyu muumi.’ ”

²⁴ Lyalo mwaami wakatuma muntu kuleta mupeeni. Ndiwakaletwa,

²⁵ wakaamba ayi, “Amutimbule mwaana muumi pakati napakati mwaabanye banakashi aba aumwi cipansha aumwi cipansha.”

²⁶ Nyina mwiine wakanyumfwa nkumbu abuumbi pamwanaakwe musankwa akwaambila mwaami ayi, “Nomulemekwa, ndaseenga mutacaayi mwaana uyu! Amumupebo walutundu uyu!” Sombi umwi lakwe wakaamba ayi, “Mutapi nabi womwi pakati kesu, amumutimbulebo pakati.”

²⁷ Lyalo Solomoni wakaamba ayi, “Mutatimbuli mwaana uyu! Amupe mwanakashi mutaanshi, ngonyina mwiine.”

²⁸ Bene Isilaeli ndibakanyumfwa Solomoni mbwaakoombolosha, boonse bakatalika kumulemeka abuumbi mukwiinga ono bakeshiba ayi Lesa wamupa busongo bwakoombolosha milandu cakutanyengelela.