Zozie 12 - NYANMIƐN NDƐ'N 1998

Famiɛn nga Izraɛlfuɛ'm be kwlali be'n bé nuan

¹ Izraɛlfuɛ'm be dun mmua kwlali famiɛn nnyɔn nga be o Zurdɛn i lika ng'ɔ kpɛ wia afiliɛ lɔ'n nun. Be fali be mɛn'n b'ɔ fɛ i Arnɔn nzue ba nuan lɔ lele fa ju Ɛrmɔn oka'm bo lɔ'n. Zurdɛn i lika ng'ɔ kpɛ wia afiliɛ lɔ'n wo nun.

² I klikli'n yɛlɛ Siɔn, Amɔrfuɛ'm be famiɛn ng'ɔ tran Ɛsbɔn lɔ'n. Lika ng'ɔ sie'n, ɔ fɛ i Arnɔn i kongo'n i bue, ɔ bo i bo Arɔɛr klɔ'n su lɛ, i kunngba'n, ɔ fa Galaad mɛn'n i bue, ɔ kɔ lele ju Zabɔk nzue ba'n i nuan. Nzue sɔ'n yɛ ɔ ti be nin Amɔnfuɛ'm be awɛ nin-ɔn.

³ Famiɛn sɔ'n i lika'n wie ekun yɛlɛ Zurdɛn kongo'n, ɔ nin Zenezarɛt fɛtɛ'n b'ɔ o wia afiliɛ lɔ'n. Ɔ fɛ i nglo lɔ lika'n nun lele fa ju jenvie b'ɔ ti njin nzue klakla'n i wun lɔ, ɔ ju Bɛt-Zɛsimɔt i lika ng'ɔ kpɛ wia afiliɛ lɔ. Lika sɔ'n fɛ lele ju ngua lɔ, Pisga oka'n i bo lɔ.

⁴ Famiɛn sɔ'n kun ekun yɛlɛ Ɔg i yɛ ɔ ti Rɛfafuɛ'm be kasiɛn nga be sieli Bazan mɛn nin-ɔn. Kan ɔ tran'n yɛlɛ Astarɔt annzɛ Edrei.

⁵ Ɛrmɔn oka'n nin Salka klɔ'n, ɔ nin Bazan mɛn'n kwlaa b'ɔ fa ju Gesirfuɛ nin Maakatfuɛ'm be awɛ'n su'n, ɔ nin Galaad lika'n i bue bɔ i awɛ yɛlɛ famiɛn Siɔn i nvle'n bɔ be flɛ i Ɛsbɔn'n, i kwlaa sɔ'n ti famiɛn sɔ'n i liɛ.

⁶ Moiz nin Izraɛlfuɛ'm be kwlali famiɛn nnyɔn sɔ mun, nan Moiz b'ɔ ti Anannganman i sufuɛ'n ɔ'a fa be mɛn ɔ'a man Ribɛn akpasua'n, ɔ nin Gad akpasua'n, ɔ nin Manase akpasua'n i bue.

⁷ I sin Izraɛlfuɛ'm be kwlali famiɛn nga be o Zurdɛn i lika bɔ kpɛ wia atɔliɛ lɔ'n. Be mɛn liɛ'n fɛ i nglo lɔ Baal-Gad mɛn'n b'ɔ o Liban i kongo'n nun i wun lɛ lele fa ju ngua lɔ oka ti su trɔnmintrɔnmin ng'ɔ mantan Seir'n i wun lɔ. Zozie fɛli i sɔ lika liɛ'n cɛcɛli Izraɛl akpasua-akpasua mun.

⁸ Lika sɔ'n yɛlɛ oka lika'n, nin lika kpɛtɛkplɛɛ'n, nin Zurdɛn kongo'n, nin kpɔlɛkpɔlɛ lika'n, nin lika kee, ɔ nin ngua lɔ lika'n. Ɛtfuɛ, nin Amɔrfuɛ, nin Kanaanfuɛ, nin Ferezfuɛ, nin Evfuɛ, ɔ nin Zɛbisfuɛ'm be yɛ be trantrannin mɛn sɔ nun la-a.

⁹ Famiɛn nga Izraɛlfuɛ'm be kwlali be'n, be klɔ mun yɛ: Zeriko, Ai b'ɔ o Betɛl wun koko lɛ'n,

¹⁰ Zerizalɛm, Ebrɔn,

¹¹ Zarmit, Lakis,

¹² Eglɔn, Gezɛr,

¹³ Debir, Gedɛr,

¹⁴ Ɔrma, Arad,

¹⁵ Libna, Adilam,

¹⁶ Makeda, Betɛl,

¹⁷ Tapiak, Efɛr,

¹⁸ Afɛk, Sarɔn,

¹⁹ Madɔn, Azɔr,

²⁰ Simrɔn-Mɛrɔn, Aksaf,

²¹ Tanak, Megido,

²² Kedɛs, Zɔkneam b'ɔ o Karmɛl lɔ'n,

²³ Dɔr b'ɔ mantan jenvie nuan lɔ'n, Gɔzim b'ɔ mantan Gilgal'n,

²⁴ ɔ nin Tirza. Kɛ be kan be kwlaa bo nun'n, be ti famiɛn ablasan-nin-kun.